بىراق جۇرتتىڭ سەنىمىن پايدالانىپ باسەكەگە قابىلەتتى كاسىپورىن ونىمدەرىن دە ساپاسىز دەپ كۇستانالاۋشىلار, تاسادا تۇرىپ تاس اتۋشىلار كوبەيىپ بارا جاتقانىن ايتۋ كەرەك. سونىڭ ءبىرى – وزىمىزدە عانا ەمەس, حالىقارالىق نارىقتاعى ءوز ورنىن تاپقان, كۇرىش ءوسىرىپ, اقتاۋشى «بايدالا» سەرىكتەستىگى.
جاقىندا الەۋمەتتىك جەلىلەردە «قىزىلوردالىق «بايدالا» سەرىكتەستىگىنىڭ كۇرىشى ساپاسىز» دەگەن سارىندا بەينەروليك تارادى. وسى حاباردان كەيىن «بايدالانىڭ» باسشىسى كومەك سۇراپ, كاسىپكەرلەر پالاتاسىنا ءوتىنىش تۇسىرگەن ەدى. ماسەلەنى زەرتتەگەن پالاتا قىزمەتكەرلەرى سالا ماماندارىنىڭ باسىن قوسىپ, ءباسپاسوز ءماسليحاتىن وتكىزدى.
جيىندا كاسىپكەرلەر پالاتاسى ديرەكتورىنىڭ اگروونەركاسىپتىك كەشەن ماسەلەلەرى بويىنشا ورىنباسارى ءپىرمۇحاممەد سىزدىقوۆ: «ناقتى زەردەلەۋ جۇمىستارى جۇرگىزىلمەي تاراتىلعان اقپاراتتىڭ سالدارىنان كاسىپكەر شىعىنعا ۇشىراپ وتىر. كاسىپكەر پالاتادان كومەك سۇرادى. قازىر زاڭگەرلەرىمىز قۇقىقتىق قولداۋ كورسەتۋدە», دەدى.
«بايدالا» جشس ديرەكتورىنىڭ ورىنباسارى ازامات بايداليەۆ كومپانيانىڭ بۇگىندە وبلىسقا قاراستى شيەلى, سىرداريا, جالاعاش اۋداندارىندا كۇرىش ەگىپ, ونى ءوز زاۋىتتارىندا اقتايتىندىقتارىن ايتتى. بۇگىندە «بايدالانىڭ» زاۋىتىندا تۇراقتى 80 ادام جۇمىس ىستەسە, ەگىندىكتەردە ماۋسىمدىق جۇمىستارعا 2 مىڭعا جۋىق ادام تارتىلعان. ونىمدەرىن تاجىكستان, ۋكراينا, رەسەي, وزبەكستان, قىرعىزستان جانە وزگە دە ەلدەرگە ەكسپورتقا شىعارۋدا.
قىزىلوردا وبلىسىندا ءوندىرىلەتىن كۇرىشتىڭ ساپاسىنا قاتىستى «قازاقستان اگرارلىق ساراپتاماسى» اق قىزىلوردا فيليالىنىڭ باسشىسى مەيرامبەك سەرىكباي دا پىكىرىن ءبىلدىردى.
«ءبىزدىڭ وبلىستا زاۋىتتا ءوندىرىلەتىن جانە ەكسپورتقا شىعارىلاتىن كۇرىشتەر ءۇش تەكسەرۋدەن وتەدى. ولار سايكەستىك سەرتيفيكاتى, كارانتيندىك سەرتيفيكاتى جانە ساپا سەرتيفيكاتى. ساپا سەرتيفيكاتىنان ءوتۋ ءۇشىن زاۋىتتان شىققان كۇرىش ونىمدەرىنىڭ سىناماسى الىنىپ, تەكسەرۋدەن وتكىزىلەدى. قاپتىڭ موينىنداعى تۇپنۇسقاسىندا شىققان مەرزىمى جازىلىپ تۇرادى. بەينەروليكتى تۇسىرگەن ازاماتتار كۇرىشتىڭ ساپاسىز ەكەنىن شىن مانىندە دالەلدەگىسى كەلسە, كۇرىش قابىن كورسەتۋى قاجەت ەدى. تۇتىنۋشىلارعا ايتارىمىز, قالتادان كەلگەن, تارەلكاداعى شىعۋ تەگى بەلگىسىز كۇرىشتەرگە سەنبەڭىزدەر. وبلىس ديقاندارى رەسپۋبليكاداعى كۇرىشتىڭ 80 پايىزىن وندىرەدى. ءبىزدىڭ وڭىردە ءوندىرىلەتىن كۇرىشتەردىڭ بۇرىن 20-30 پايىزى عانا شەتەلگە شىعاتىن بولسا, قازىر 70 پايىزى ەكسپورتقا شىعارىلادى. سوندىقتان دا ءوڭىر كۇرىشى تۋرالى جالعان اقپارات تاراتۋ قيسىنسىز تىرلىك. «بايدالانىڭ» كۇرىشى ساپالى, تۇتىنۋشىلاردان جوعارى باعاسىن الىپ جۇرگەن, ەكسپورتتا سۇرانىسقا يە ءونىم», دەدى.
پ.سىزدىقوۆ وسىنداي كەلەڭسىزدىكتەرمەن ۇدايى كۇرەس جۇرگىزىلەتىندىگىن ايتتى.
ال ساپالى ءونىمدى ساپاسىز دەپ كاسىپورىننىڭ بەدەلىن تۇسىرمەك بولعاندار زاڭ اياسىندا جازاسىن الادى.
قىزىلوردا وبلىسى
