ۇكىمەت باسشىسى جاڭا فەرروقورىتپا زاۋىتىنىڭ اشىلۋىمەن قۇتتىقتاپ, ءوڭىردىڭ ودان ءارى الەۋمەتتىك-ەكونوميكالىق دامۋى ءۇشىن جوعارى تەحنولوگيالىق كاسىپورىننىڭ ماڭىزدىلىعىن اتاپ ءوتتى. جوبانىڭ ەرەكشەلىگى – «يندۋستريا 4.0» باعدارلاماسى اياسىندا وندىرىستىك تسيكلدىڭ جاڭا تەحنولوگيالىق ازىرلەمەلەرىن ەنگىزۋى.
كاسىپورىندا العاشقى كەزەڭدەردە جىلىنا تولىقتاي ەكسپورتقا باعدارلانعان 180 مىڭ توننا ءونىم شىعارۋ كوزدەلگەن.
«الداعى ۋاقىتتا جىل سايىن 240 مىڭ تونناعا دەيىنگى كولەمدە ءونىم شىعارۋ كوزدەلگەن», دەگەن ا.مامين, گاز تازارتۋ جۇيەلەرى كەشەنى مەن كومىردىڭ ورنىنا ەلەكتر قۋاتىن پايدالانۋ اتموسفەراعا تارالاتىن زياندى قالدىقتاردى تولىقتاي بەيتاراپتاندىراتىنىن, ءسايكەسىنشە, قورشاعان ورتاعا تەرىس اسەرى بارىنشا از بولاتىنىن اتاپ ءوتتى.
جاڭا فەرروقورىتپا زاۋىتى مەتاللۋرگيا سالاسىنداعى باستى كاسىپورىنداردىڭ بىرىنە اينالادى جانە ءوڭىردىڭ عانا ەمەس, ەلىمىزدىڭ الەۋمەتتىك-ەكونوميكالىق دامۋىنا وڭ ۇلەسىن قوسادى.
فەرروسيليتسيدىڭ نەگىزگى كولەمى رەسەيگە, تۇركياعا, ءوڭتۇستىك كورەياعا, اقش-قا جانە ەۋروپالىق وداق ەلدەرىنە جەتكىزىلەدى. سونىمەن قاتار دايىن ءونىم ءوندىرۋ كەزىندەگى قازاقستاندىق قامتۋ ۇلەسى 94%-دان اسادى.
زاۋىت قۇرىلىسى كەزەڭىندە مىڭ جارىمنان استام جاڭا جۇمىس ورنى قۇرىلدى. ونى پايدالانۋ كەزەڭىندە 350 تۇراقتى جۇمىس ورنى اشىلادى, ەكىنشى كەزەڭ ىسكە اسىرىلعان جاعدايدا, ولاردىڭ سانى 550-گە دەيىن ارتادى.
پرەمەر-مينيستر قاراعاندى وبلىسىنىڭ قازاقستاننىڭ وڭدەۋ, مەتاللۋرگيا, تاۋ-كەن ءوندىرۋ ونەركاسىبى, قارا جانە ءتۇستى مەتاللۋرگيا, ماشينا جاساۋ سالاسىن دامى-
تۋداعى ماڭىزدى ءرولىن اتاپ ءوتتى.
«قاراعاندى وبلىسىندا ونەركاسىپتى ءارتاراپتاندىرۋ, جۇيە قۇرۋشى كاسىپورىنداردى جاڭعىرتۋ, ينۆەستيتسيالار تارتۋ جۇمىستارى جالعاسىپ جاتىر», دەگەن ا.مامين, بارلىق تارتىلعان ينۆەستيتسيالاردىڭ 93%-ى – جەكە, ونىڭ جارتىسى شەتەلدىك قاراجات ەكەنىن ايتتى. وبلىستا 1 ترلن-نان استام تەڭگەگە 35 جاڭا ءىرى ينۆەستيتسيالىق جوبا ىسكە اسىرىلىپ جاتىر, ولاردىڭ 17-ءسى شەتەلدىكتەردىڭ قاتىسۋىمەن قولعا الىندى. 2019 جىلدىڭ ءبىرىنشى جارتى جىلدىعىندا ينۆەستيتسيالار ءوسىمى 72%-دى قۇرادى.
پرەمەر-مينيستر وڭىرگە جۇمىس ساپارى بارىسىندا «الايعىر» كەن ورنىنىڭ قورعاسىن-كۇمىس كەنىن وڭدەيتىن جانە بايىتاتىن, كاتودتى مىس ءوندىرەتىن كاسىپورىندارىنا, سونداي-اق «كوكتاسجال» كەن ورنى بازاسىنداعى تاۋ-كەن بايىتۋ كەشەنىنە باردى.
اسقار مامين «SES ساران» كۇن-ەلەكتر ستانساسىن تەكسەرىپ, قاراعاندى قالاسىنىڭ سولتۇستىك جانە شىعىس اينالما جولىنىڭ رەكونسترۋكتسيالانعان بولىگىمەن تانىستى. ۇزىندىعى 20 شاقىرىمنان استام «قاراسور كولىنەن اينالا كوكپەكتى-قاراعايلى» اينالما تەمىر جول جەلىسى قۇرىلىسى جوباسىن قاراۋ بارىسىندا سۋ تاسقىنى سالدارىنان زيان كەلتىرىلگەن شويىن جول جەلىسىنىڭ بولىگىن قالپىنا كەلتىرۋ جۇمىستارىنىڭ بارىسى تۋرالى باياندالدى.
