ناقتىراق ايتساق, قىرعىز ەلىنىڭ باتكەن وبلىسىنداعى اق-ساي اۋىلى مەن تاجىكستاننىڭ ۆورۋح انكلاۆىنىڭ شەكاراسىندا كيكىلجىڭ شىقتى. قىرعىز شەكاراشىلارىنىڭ مالىمەتىنشە, ۆورۋح تۇرعىندارى اۋىلعا كىرە بەرىستە فلاگشتوك ورناتقان كەزدە جانجال شىققان, سوڭى قارۋلى قاقتىعىسقا جالعاسقان. شەكاراشىلار اۋىل تۇرعىندارى اڭشى مىلتىعىنان وق اتقان دەپ وتىر.
ال تاجىكستان تارابىنىڭ ءمالىمەتى باسقا. ولاردىڭ سوزىنە سەنسەك, جانجال بارىسىندا قىرعىز اۋىلىنىڭ ازاماتتارى وق اتقان. تاجىكستان ىشكى ىستەر مينيسترلىگىنىڭ اقپاراتىنشا, تاجىكستاندىق ءبىر ازامات قازا بولىپ, تاجىك ميليتسياسىنىڭ پودپولكوۆنيگى جارالانعان. زارداپ شەككەن ون ادامنىڭ ۇشەۋىنە وق تيگەن, جەتى ازامات تيگەن تاستان جاراقات العان. قىرعىز جاعىنان 15 ادام جارالانعان, ونىڭ 12-سىنە وق تيگەن, ءۇش ادام تاستان زارداپ شەككەن. جارالانعاندار اراسىندا ميليتسيا قىزمەتكەرى مەن شەكاراشى بار كورىنەدى.
ال 23 شىلدە كۇنى تاعى دا اتىس بولىپ, ءبىر شەكاراشى جارالاندى. ايماقتا شەكارا قىزمەتى كۇشەيتىلگەن تارتىپكە كوشتى. قازىر يسفارا – ۆورۋح جولى جابىلدى. تاجىك جاعى لەيلەك اۋدانىنا اپاراتىن يسفانا-باتكەن جولىنداعى قوزعالىستى دا توقتاتتى. قىرعىز ەلىنە قاراستى باتكەن اۋدانىنداعى اق-ساي اۋىلىنان 315 ادام باسقا جەرگە كوشىرىلدى.
جالپى قوس ەلدىڭ اراسىنداعى شەكارادا مۇنداي قاقتىعىستار ءجيى تىركەلىپ تۇرادى. بيىل ناۋرىز, ماۋسىم ايلارىندا دا وسىنداي وقىس وقيعالار بولعان ەدى. ونىڭ سەبەپتەرى دە بار: ەكى تاراپتىڭ حالقى سۋ, جەر, جايلاۋدى بولىسە الماي قالادى. قانتوگىسكە دەيىن جەتكەن كەزدەر دە بارشىلىق. ءالى انىق شەكارا سىزىلماعان ءارى داۋلى جەر دەپ تاجىكستاننىڭ بوبودجون-گافۋروۆ جانە يسفارين اۋداندارى مەن قىرعىز رەسپۋبليكاسىنىڭ لەيلەك جانە باتكەن اۋداندارى شەكتەسكەن تەرريتوريا ەسەپتەلەدى. ەكى ەل اراسىنداعى شەكارانىڭ جالپى ۇزىندىعى 970 شاقىرىم, ونىڭ تەك 519 شاقىرىمى بويىنشا ەكى ەل اراسىندا كەلىسىم جاسالعان.
شەكاراداعى جانجال قىرعىز ەلىنىڭ پرەزيدەنتى سوورونباي جەەنبەكوۆتىڭ تاجىكستانعا ساپارى قارساڭىندا شىقتى. وسى كەزدەسۋدە قوس تاراپ شەكارانىڭ ءالى بەلگىلەنبەگەن بولىگىن, جوعارىدا اتالعان جانجالداردى تالقىلاۋى مۇمكىن.
