بيجامال رامازانوۆا ءومىردىڭ بۇرالاڭى, بۇرىلىسى كوپ جولدان ابىرويمەن وتكەن, ومىردە قينالسا دا سىر بەرمەگەن, مايىسسا دا سىنباعان, تۇعىرى بيىك تۇلعا. ومىردە كوپتى كورگەن, كوپ جايلاردى ويىنا تۇيگەن ونىڭ اق جۇرەكپەن اقتارىلا ايتار اڭگىمەسى از ەمەس. دارا تۋعان دانالاردىڭ ءبىرى بيجامال انامىزدىڭ سونداي سىمباتى بولەك سۇلۋ سىرلارىنىڭ ءبىر پاراسى ونىڭ «دايك پرەسس» باسپاسىنان كورگەن, «تاريحي كەزدەسۋلەر» اتتى كولەمىمەن عانا ەمەس, كوركەمدىلىگىمەن دە كورىكتى كىتابىندا توعىسىپتى.
كىتاپتىڭ قۇرىلىسى دا تاپقىر تۇزىلگەن. بۇل ايتارى انىق, بوياۋى قانىق دەرەكتى, كەرەكتى كىتاپ: «كسرو باسشىلىعى جانە تانىمال تۇلعالار», «قازاقستاننىڭ كورنەكتى قايراتكەرلەرى», «قازاقستان قاھارماندارى», «جازۋشىلار», «كورنەكتى قايراتكەرلەر» جانە «عالىمدار. ءارىپتەستەر. دوستار» اتتى التى ءبولىمنەن تۇرادى. كىتاپتىڭ ءماتىنىن بايانداپ, كوزىقاراقتى وقۋشىنىڭ ۋاقىتىن الماي-اق قويالىق, سەبەبى ءار ءبولىمنىڭ اتتارى اڭگىمەنىڭ كىم, نە جايلى ەكەنىن تۋاراي, شىعار كۇندەي ايقىن, انىق ايتىپ تۇر. اسىرەسە, ءوزى جۇزدەسكەن نيكيتا حرۋششەۆ, لەونيد برەجنەۆ, ۆياچەسلاۆ مولوتوۆ, يۋمجاگين تسەدەنبال, ءدىنمۇحاممەد قوناەۆ, نۇرسۇلتان نازارباەۆ, ءىلياس وماروۆ سىندى مەملەكەت قايراتكەرلەرى, باۋىرجان مومىش ۇلى, راقىمجان قوشقارباەۆ, ساعادات نۇرماعامبەتوۆ ءتارىزدى قاھارماندار; مۇحتار اۋەزوۆ, ءسابيت مۇقانوۆ, عابيت مۇسىرەپوۆ, ميرزو تۇرسىنزادە قاتارلى ادەبيەت الىپتارى; پاتشايىم تاجىباەۆا, زىليقا تامشىباەۆا, كۇلاش قۇنانتاەۆا, ت.ب. دوستارى جايلى جازبالارى, جوعارىدا اتتارى اتالعان تاريحي تۇلعالاردىڭ ءىس-ارەكەتتەرى, كەيبىرىنىڭ وسال تۇستارى, حرۋششەۆتىڭ كۇلكىلى ارەكەتتەرى, بارشا كەيىپكەرلەردىڭ مىنەزدەرى ءمىنسىز مۇسىندەلگەن.
كىتاپ اۆتورى بيجامال رامازانوۆا 12 جىل قازاق كسر جوعارى كەڭەسى پرەزيديۋمىنىڭ حاتشىسى بولىپ ۇلكەن مەملەكەتتىك قىزمەت ىستەگەن, قازاقستاننىڭ ازيا جانە افيرا ەلدەرىمەن ىنتىماقتاستىق كوميتەتىنىڭ توراعاسى بولعان, ۇزاق جىلدار بويى الماتى قالالىق ارداگەرلەر قوعامىنىڭ مۇشەسى بولىپ, ەل ومىرىنە بەلسەنە ارالاسقان كورنەكتى مەملەكەت جانە قوعام قايراتكەرى. مۇنى تىزبەلەپ وتىرعانىمىز ول ءوزىنىڭ جازبالارىندا ويدان ەشتەڭە قوسپاعان, ءوزى كورگەن, كۋا بولعان تاريحي تۇلعالار مەن تاريحي وقيعالاردى قاز-قالپىندا ويعا قونىمدى, اقىلعا سىيىمدى ەتىپ بايسالدى بايانداپ بەرگەن. سونىسىمەن دە بۇل ەڭبەك قۇندى. الەمدىك دەڭگەيدەگى اسا كورنەكتى ساياساتكەر قاسىم-جومارت كەمەل ۇلى توقاەۆ 2003 جىلى جارىق كورگەن «ءومىر مەن تاعدىر» اتتى كىتابىندا بىلاي دەپ جازدى: «اكەمنىڭ جوعارى كەڭەس پرەزيدۋيمىنداعى كوپ جىلعى جۇمىسى تۋرالى ايتقاندا, بيجامال رامازانوۆا تۋرالى ايتپاي كەتۋ مۇمكىن ەمەس. 12 جىلدان استام رەسپۋبليكانىڭ مەملەكەتتىك بيلىگىن كورسەتەتىن وسى وتە ماڭىزدى ورگاندا ەكىنشى تۇلعا بولدى. ب.رامازانوۆا – اسا بىلىكتى باسشى, ەڭبەكقورلىعىمەن, سىپايىلىعىمەن ارىپتەستەرىنە دەگەن دوستىق نيەتىمەن ەرەكشەلەندى. ونىڭ جوعارعى كەڭەس پرەزيديۋمىنىڭ حاتشىسى قىزمەتىنەن كەتىپ, قازاق كسر مينيسترلەر كەڭەسى جانىنداعى باس ارحيۆ باسقارماسىنا باسشى بولىپ تاعايىندالۋى رەسپۋبليكا بيلىگى ءۇشىن كەمشىن بولدى. ول قازاقستاندىق پارلامەنتاريزم تاريحىنا جارقىن تۇلعا بولىپ ەندى».
مەملەكەت باسشىسىنىڭ تاپ باسىپ, تاماشا ايتقان سوزىنە الىپ, قوسارىمىز جوق.
توبىقتاي ءسوزدىڭ ءتۇيىنى – بيجامال رامازانوۆانىڭ توقسان جاستىڭ تورىنەن تومەنگە, ءوتكەنگە كوز جىبەرە تۇرىپ ايتقان ماعىنالى ءسوزى جاسقا دا, جاسامىسقا دا وي سالاتىن ءتاربيەلىك ءمانى زور, ايتارى انىق, بوياۋى قانىق ۋاقىتپەن بىرگە جاساي بەرەتىن اسا باعالى ەڭبەك.
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى
