ەۋرووداقتان شىعۋدى جاقتاۋشى
بۇل جەڭىس ەندى بيلەۋشى پارتيانىڭ باسشىسى رەتىندە ب.دجونسونعا ەل ۇكىمەتىن باسقارۋعا مۇمكىندىك بەرەدى. جاڭا پرەمەر-ءمينيستردىڭ الدىندا «Brexit» جوباسىن جۇزەگە اسىرۋ جانە كونسەرۆاتورلاردىڭ پوزيتسياسىن نىعايتا ءتۇسۋ مىندەتى تۇر.
دجونسوننىڭ جەڭىسى بريتانيا تاريحىنداعى ازشىلىق ۇكىمەتىنىڭ پارتياىشىلىك سايلاۋ جولىمەن اۋىسۋى بولىپ وتىر.
بوريس دجونسون جاڭا قىزمەتكە سايلانا سالىسىمەن 31 قازانعا دەيىن ۇلىبريتانيانى ەۋرووداقتان شىعارۋعا, ەلدى بىرىكتىرە وتىرىپ, وپپوزيتسيالىق لەيبوريستىك پارتيا جەتەكشىسى دجەرەمي كوربيننەن باسىم تۇسۋگە ۋادە ەتتى.
وعان جاۋاپ رەتىندە د.كوربين: «دجونسون بايلارعا ارنالعان سالىقتى تومەندەتۋگە ۋادە ەتىلگەن جانە ەۋرووداقتىڭ كەلىسىمىنسىز-اق «برەكسيت» الۋعا نەگىزدەلگەن باعدارلاما ارقىلى 100 مىڭ ادامدىق توپتىڭ اتىنان تاڭدالدى. ەندى ول ەلدىڭ الار باعىتىنا ماڭىز بەرىپ ويلانۋى كەرەك. ەو قۇرامىنان كەلىسسوزسىز شىعۋ مەديتسينالىق ماقساتتاعى تاۋارلار كەلىسىمىن شەكتەيدى, اۋىل شارۋاشىلىعى مەن ونەركاسىپكە, جالپى ەكونوميكاعا نۇقسان كەلتىرەتىندىكتەن, بوريس دجونسون دونالد ترامپپەن ساۋدا كەلىسىمىن جاساۋعا ءماجبۇر بولادى, بىراق ول كەلىسسوزدەردى دجونسون ءالسىز جاقتىڭ پوزيتسياسىنان جۇرگىزەدى», دەپ ءۇن قاتتى.
ال امەريكا پرەزيدەنتى بولسا دجونسوننىڭ تانىمالدىعىن ونىڭ «بريتاندىق ترامپ» دەگەن لاقاپ اتىنا بايلانىستى ەكەنىنە رياسىز سەنىم ءبىلدىرىپ وتىر.
مىنە, وسىنداي پىكىر قايشىلىقتارىنان كەيىن بوريس دجونسوننىڭ ۇلىبريتانيا پرەمەر-ءمينيسترى لاۋازىمىنا تاعايىندالۋىن جاقتاۋشىلار مەن قارسى توپ لوندون كوشەلەرىنە شىعىپ كەتتى. ال وپپوزيتسيا بولسا, جاڭا كوشباسشىعا سەنىمسىزدىك بىلدىرۋگە قامدانىپ جاتىر.
شىققان تەگىندە جاقىندىق بار
55 جاستاعى بوريس دجونسون نيۋ-يورك قالاسىندا دۇنيەگە كەلگەن جانە 2016 جىلعا دەيىن اقش ازاماتى دا بولعان. تولىق نىسپىسى – الەكساندر بوريس دە پفەففەل دجونسون. بىراق ءبىزدى قىزىقتىرعان ماسەلە باسقا – بوريس دجونسون وسمانلى مەملەكەتىنىڭ سوڭعى ىشكى ىستەر ءمينيسترى بولعان الي كەمالدىڭ شوبەرەسى. ماماندىعى جۋرناليست بولعان اتاسى 1920-شى جىلدارى قازا تاپقان. ال اكەسى ستەنلي دجونسون كونسەرۆاتيۆتىك پارتيانىڭ قاتارىندا ءجۇرىپ, دۇنيەجۇزىلىك بانكتە جۇمىس ىستەگەن, ەۋروپارلامەنتتىڭ مۇشەسى بولعان.
اجەسى دە كاۆكاز اۋماعىنان تۇركياعا اۋعان شەركەس قىزى ەكەن. جالپى, ب.دجونسوننىڭ ناعاشىلارىن دا وسال دەۋگە كەلمەيدى – اقپارات قۇرالدارى جاڭا پرەمەردىڭ اناسى ۇلىبريتانيا كورولى II گەرتسوگتىڭ تۇقىمىنان ەكەنىن جارىسا جازىپ جاتىر.
ساياساتكەردىڭ ءوزى بريتاندىق كوپتەگەن ارىپتەستەرىنە ءتان قالىپپەن يتون جانە وكسفوردتا ءبىلىم العان. وقىپ ءجۇرىپ, وكسفورد پىكىرتالاس وداعىنىڭ تەڭ توراعاسى رەتىندە كوزگە تۇسكەن. ەڭبەك جولىن جۋرناليستىك سالادان باستاپ, The Times باسىلىمىندا ازدى-كوپتى جۇمىس ىستەگەن. بىراق الەمگە ايگىلى گازەتتەن جالعان دەرەكتەردى قولدانعانى ءۇشىن قۋىلىپتى. كەيىننەن The Daily Telegraph باسىلىمىندا جۇمىس ىستەي ءجۇرىپ, ناعىز ەۋروسكەپتيك بولىپ قالىپتاسقان.
ال 1997 جىلدان بەرى ۇلكەن ساياساتقا بەلسەنە ارالاسىپ, مينيستر لاۋازىمىنان لوندون مەرىنە دەيىنگى دارەجەگە كوتەرىلدى. جالپى, ب.دجونسون تەلەۆيزيالىق شوۋلارعا ءجيى قاتىسىپ, وتكىر پىكىرلەرى ارقىلى ەلدىڭ ىشىندە تانىمالدىعىن ارتتىرا تۇسكەن. ونىڭ سول شوۋلارداعى بۇيرەكتەن سيراق شىعاراتىن ويلارى بەدەلىن وسىرە تۇسكەنى دە انىق.
2016 جىلى بوريس دجونسون پارلامەنتكە ورالۋدى كوكسەيدى. ءبىر قىزىعى, ونىڭ ورنىنا لوندون باسشىسى بولىپ بۇل قىزمەتتى يەلەنگەن تۇڭعىش مۇسىلمان سادىق حان قالدى. ال ب.دجونسوننىڭ ءتۇبى تۇرىك بولعانىمەن, مۇسىلماندارعا دا, تۇركى الەمىنە دە ىشتارتقان كەزى بەلگىسىز. كەرىسىنشە, جوعارىدا ايتىلعانداي, ۇر دا جىق مىنەزى ارقىلى وقشاۋلانىپ تۇراتىن يمپەريالىق پيعىلداعى ساياساتكەردىڭ مۇسىلماندار مەن افريكا تۋرالى ايتقان سوزدەرى كوپشىلىكتىڭ نارازىلىعىن تۋعىزعان. سىرتقى ىستەر ءمينيسترى بولىپ تۇرعان ۋاقىتىندا ەل ۇكىمەتىنىڭ باسشىسىمەن «برەكسيت» ماسەلەسى بويىنشا كەلىسە الماي, قىزمەتىنەن كەتتى.
اقپارات كوزدەرىندەگى مالىمەتتەرگە قاراعاندا, ەكى رەت ۇيلەنگەن ب.دجونسوننىڭ ءتورت بالاسى بار ەكەن.
جالپى, اڭگىمە باسىندا ب.دجونسوننىڭ الدىندا تۇرعان مىندەت – ۇلىبريتانيانى ەشقانداي مامىلەسىز ەۋروپالىق وداقتان ءبولىپ شىعارۋ ەكەنىن ايتتىق. ساياساتكەر بۇل جولداعى كەدەرگىلەردەن تايسالماي, بىربەتكەي مىنەزى ارقىلى ماقساتىنا جەتپەي تىنبايتىنداي كورىنەدى. ول كەسكىن-كەلبەتى دە وزىنە ۇقسايتىن امەريكالىق ارىپتەسى دونالد ترامپتىڭ ساياسي بيلىكتەگى جەتىستىكتەرىن قايتالاۋدان ءۇمىتتى ەكەنىن جاسىرمايدى. بىراق ونىڭ بۇل پيعىلىنا بريتاندىق وركەنيەت كونە قويسا جاقسى...
