ەلىمىزگە تانىمال سۋرەتشى عاني يلياەۆتىڭ ۇلى عانا ەمەس, ونىڭ ونەرىن دە جالعاستىرعان مۇراگەرى سۇلتان عاني ۇلى جۋىردا شىمكەنت قالاسىندا جەكە شىعارماشىلىق كورمەسىن وتكىزدى. كورمەنىڭ قۇرمەتتى قوناعى بولعان بەلگىلى قىلقالام شەبەرى, مەملەكەتتىك سىيلىقتىڭ لاۋرەاتى ەربولات تولەپباي: «سۇلتاننىڭ ءاربىر تۋىندىسى تولعانۋدى قاجەت ەتەدى. كەسكىندەمە ونەرىندە كومپوزيتسيالىق شەشىم دەگەن بولادى. سۋرەتشى تۋىندىلارىنىڭ باسىم بولىگىندە وتە ءساتتى كومپوزيتسيالىق شەشىمدەر بار. ونەر جولىندا بىردەن ۇلكەن دارەجەگە جەتە قويۋ قيىن. وعان ساتىلاپ جەتەدى. ال سۇلتاننىڭ كەيبىر جۇمىسىندا وتە ءساتتى شىققان دۇنيەلەرى بار ەكەن», دەپ پىكىرىن ءبىلدىردى.
«مەگاپوليس» اتتى كورمەگە اۆتوردىڭ سوڭعى جىلدارى سالىنعان 100-دەن استام تۋىندىسى قويىلعان. اتاپ ايتقاندا, «اۋىل», «التىن اي», «ارناۋ», «اعاش كولەڭكەسىندە», «قالىڭدىق», «بەسىك», «تەڭىزدىڭ جاعاسىندا», «ۇشۋ» سىندى 28 پولوتنو مەن «بالالىق شاق», «بالا ءتۇسى», «يديلليا», «ۇشۋ», «ويانۋ», «كۇن مەن ءتۇن», «اۋەن», «كۇن استىنداعى ءۇي», «بالىقتار مەن قۇستار» سياقتى گرافيكالىق كەسكىندەمەلەر بار. قىلقالام شەبەرلەرىنىڭ باعالاۋىنشا, س.يلياەۆ ونەرىنە سيمۆولدار مەن تاڭبالارعا تولى كەسكىندەمەدەگى ەرەكشە فورمانى تاپقان سۋرەتشى. ول ءوز كارتينالارىنا ەتنومادەني سيپاتقا تولى قۇراق, شاڭىراق سىندى قازاقتىڭ ساندىك-قولدانبالى ونەرىنىڭ ەلەمەنتتەرىن كىرگىزگەن. ونەرتانۋشىلار سۋرەتشى شىعارمالارىنىڭ باستى تۇجىرىمى – قاساڭ شەڭبەردى بۇزىپ, قاراپايىم ادامدار بايقاي بەرمەيتىن الەمگە, كەز كەلگەن كەسكىنگە جاڭا كۇي سىيلاۋىمەن دارالانۋ ەكەنىن ايتۋدا. كوپشىلىك جوعارى دەڭگەيدە ۇيىمداستىرىلعان كورمەگە جاقسى باعا بەرىپ, ونەر يەسىنە العىسىن بىلدىرۋدە.
ايتا كەتەيىك, سۋرەتشىنىڭ جۇمىستارى بۇگىندە الماتى, ءماسكەۋ, تاشكەنت, سوچي قالالارىنداعى مۋزەيلەردە جانە الەمنىڭ ءتۇرلى قالالارىنداعى جەكە گالەرەيالاردا ساقتاۋلى.
