ارگەنتينا مەن برازيليا اراسىنداعى جارتىلاي فينالدىق ويىننان كەيىن فۋتبول سۇيەر قاۋىم ەكىگە جارىلدى. ءبىرى «البيسەلەستەنى» جەڭىسكە جەتەلەي الماعان ليونەل مەسسيدى ايىپتاسا, كەلەسىسى تورەشى ءادىل بولماعانىن ايتادى.
ەكى تاراپتى دا تۇسىنۋگە بولادى. ەندى شە, «جاتجەرلىك», الەمنىڭ ەڭ ۇزدىك فۋتبولشىسى سانالاتىن مەسسي ۇلتتىق قۇراما ساپىندا ءالى بىردە-ءبىر رەت چەمپيون اتانعان جوق. ونىڭ ۇستىنە, «نە بەل, نە بەلبەۋ كەتەر» ساتتە شابۋىلشىنىڭ ويىنى جۇرمەي-اق قويدى. سەنبەيسىز بە؟ فۋتبول جىلناماسىنا ءۇڭىلىپ كورىڭىز.
لەو مەسسي ۇلتتىق قۇراما ساپىندا العاش رەت ءدۇبىرلى دودانىڭ ءدامىن 2006 جىلى تاتىپتى. گەرمانيادا وتكەن الەم چەمپيوناتىندا «البيسەلەستەنىڭ» التىن السام دەگەن ارمانىنا شيرەك فينالدا نەمىستەر تۇساۋ سالدى. 2010 جىلى وڭتۇستىك افريكادا وتكەن بايراقتى باسەكەدە ارگەنتينانى تاعى دا «بۋندەستيم» توقتاتتى. قۇرامىندا «التىن دوپتىڭ» يەگەرى بار «البيسەلەستە» شيرەك فينالدا 0:4 ەسەبىمەن وڭباي ۇتىلعان-دى. 2014 جىلعى باسەكەدە مەسسي باستاعان كوماندا فينالعا دەيىن جەتكەن-تۇعىن. بۇل جولى دا ارگەنتينا گەرمانيادان ايلاسىن اسىرا العان جوق. ال بىلتىر رەسەيدە وتكەن تۋرنير ءالى ەسىمىزدە. 1/8 فينالدا فرانتسيا قۇراماسى «البيسەلەستەدەن» ءبىر ءباس جوعارى ەكەنىن دالەلدەدى.
بۇدان بولەك, لاتىن امەريكاسىنىڭ كۋبوگىندا دا ارگەنتينانىڭ جولى بولار ەمەس. مەسسي ۇلتتىق قۇراماعا كەلگەلى بەرى «البيسەلەستە» 5 مارتە «كوپا امەريكاعا» قاتىسىپ, 3 مارتە كۇمىس, ءبىر قولا مەدال جەڭىپ الدى. 2011 جىلى عانا شيرەك فينالدا ۋرۋگۆايعا پەنالتيدەن ەسە جىبەرگەن-تۇعىن.
جالپى, ارگەنتينا ساپىندا ءجۇرىپ مەسسي كۋبوك المادى دەۋ اعاتتىق بولار. ول 2005 جىلى جاستار اراسىندا الەم چەمپيونى اتاندى. 2008 جىلى وليمپيادا ويىندارىندا توپ جاردى. ايتسە دە, بۇل ەكى ءتۋرنيردىڭ الەم چەمپيوناتى مەن «كوپا امەريكامەن» يىق تەڭەستىرە المايتىنى ايتپاسا دا ءتۇسىنىكتى. بۇل ەكى باسەكەدە باس ءجۇلدە يەلەنبەگەن فۋتبولشىنىڭ ءباسى ءبىر مىسقال كەم ءتۇسىپ تۇراتىنى بار.
ءبىر جاعىنان ارگەنتينانىڭ ناتيجەلەرى سونشالىقتى جامان ەمەس. سوڭعى وتكەن 10 تۋرنيردىڭ التاۋىندا «البيسەلەستە» ءجۇلدەلى ورىننان كورىندى. كەز كەلگەن قۇراما مۇنداي جەتىستىكپەن ماقتانۋى ءتيىس. كەيبىر كوماندالار بالىقشىلار مەن قۇرىلىسشىلاردى جەڭىپ جۇرگەندە, بۇل ۇلكەن جەتىستىك ەمەس پە؟!
بىراق مەسسي, اگۋەرو, دي ماريا سەكىلدى تالانتتارى بار قۇرامانىڭ دەڭگەيىن التىنمەن ەسەپتەيدى ەمەس پە؟ ەندەشە الا دوپتى ۇرشىقشا يىرەتىن تالانتتارى بار كوماندانىڭ جولى بولماۋىنىڭ سىرى نەدە؟ بار كىنانى كومانداسىن جەڭىسكە جەتەلەي الماعان مەسسيگە ارتىپ قويۋعا بولاتىن شىعار. بىراق ماسەلەگە تەرەڭىرەك ۇڭىلگەندە, ءبىراز جايدىڭ بەتى اشىلادى.
نەگىزى, ارگەنتينا قۇراماسىنىڭ ساتسىزدىكتەرىنە باستى كىنالى فۋتبولشىلار ەمەس, ەلدەگى فۋتبول فەدەراتسياسىنىڭ تىزگىنىن ۇستاعان ازاماتتار. بۇعان دەيىن باتىستىڭ بۇقارالىق اقپارات قۇرالدارىندا فەدەراتسياداعى بىلىق, جەمقورلىق تۋرالى تالاي جازىلعان-تۇعىن. ارگەنتينا فۋتبولىنىڭ تىزگىنىن 35 جىل ۇستاعان حۋليو گروندونانىڭ پارا العانى جونىندەگى اقپاراتتار شىققان-دى.
گروندونا 2014 جىلى قايتىس بولدى. الايدا فەدەراتسياداعى جەمقورلىقتىڭ سالدارى بۇگىنگە دەيىن جالعاسىپ كەلەدى. قازىرگى تاڭدا افا الەمدەگى ەڭ كەدەي فۋتبول فەدەراتسياسىنىڭ ءبىرى سانالادى. ماسەلەن, Diario Uno گازەتى فەدەراتسيا كۇزەت قىزمەتىنە بەرەتىن قارجى تاپپاي, ولاردىڭ جالاقىسىن ليونەل مەسسي تولەپ بەرگەنىن جازعان ەدى.
بۇدان بولەك, باپكەرگە ءتولەيتىن اقشانىڭ جوقتىعى دا ءجيى ءسوز بولادى. ماسەلەن, تەگى ارگەنتينالىق سيمەونە مەن پوچەتتينونىڭ قاي-قايسى دا ۇلتتىق قۇرامانى جاتتىقتىرۋعا لايىق. الايدا ولارعا 15-20 ميلليون ەۋرو جالاقى تاۋىپ بەرۋگە ارگەنتينا فۋتبول مەكەمەسىنىڭ شاماسى كەلمەيدى.
فەدەراتسيا, ءتىپتى ۇشاقتان دا ۇنەمدەيدى. سوندىقتان باعاسى ارزان, قاۋىپسىزدىكتى ساقتاي بەرمەيتىن اۋە كومپانيالارىنا جۇگىنەدى. ءناتيجەسىندە فۋتبولشىلار اۋەجايدا ساعاتتاپ كۇتۋگە ءماجبۇر. قايبىر جىلى ليونەل مەسسي ينستاگرامداعى پاراقشاسىنا بۇعان نارازىلىق تانىتىپ, «تاعى دا ۇشاقتى كۇتۋگە ءماجبۇرمىز. و قۇداي, ارگەنتينا فۋتبول فەدەراتسياسى سونشالىقتى بايقۇس» دەپ جازعانى ەسىمىزدە.
ايتپاقشى, 2016 جىلى ۇلتتىق قۇرامانى بەلۋ-وريزونتي قالاسىنان اكەتۋ ءۇشىن فەدەراتسيا چارتەرلىك كومپانيا ىزدەپ, ەڭ ارزانىن تاڭداپتى. فۋتبولشىلار ءوز ەلىنە امان-ەسەن قونعان-تۇعىن. ەكى اپتا وتكەننەن كەيىن بوليۆيالىق La Mia كومپانياسىنا تيەسىلى ءدال سول ۇشاق اپاتقا ۇشىرادى. اۋە كەمەسىنىڭ بورتىندا «شاپەكوەنسە» كلۋبىنىڭ ويىنشىلارى بولعان ەدى...
