ايماقتار • 22 شىلدە, 2019

جامبىلدىق قۇرىلىسشىلاردىڭ جۇمىسى قارقىندى

331 رەت

كورسەتىلدى

3 مين

وقۋ ءۇشىن

جامبىل وبلىسىنىڭ اكىمى اسقار مىرزاحمەتوۆ ارىس قالاسىنا ارنايى بارىپ, ءوڭىر شتابىنىڭ جۇمىسىمەن تانىستى. اكىم جامبىل وڭىرىنە تيەسىلى 3-سەكتورداعى قالانى قالپىنا كەلتىرۋ شارالارىنىڭ بارىسىن كورىپ, 11 كوشەنىڭ تۇرعىندارىمەن كەزدەستى. ارىس قالاسىنا ساپارى بارىسىندا ا.مىرزاحمەتوۆ اتالعان بولىنىستەگى جەرگىلىكتى تۇرعىنداردىڭ وي-پىكىرلەرى مەن ۇسىنىستارىن تىڭدادى. سونىمەن قاتار شتاب مۇشەلەرى مەن جۇمىسشىلارعا جوندەۋ جۇمىستارىن ۋاقتىلى ءارى ساپالى ورىنداۋدى تاپسىردى.

حاميت ەسامان

جامبىلدىق قۇرىلىسشىلاردىڭ جۇمىسى قارقىندى

بۇگىنگى تاڭدا جامبىل وبلىسىنا تيەسىلى 3-سەكتوردا 50 جەكە تۇرعىن ءۇي قۇرىلىسى مەن جوندەۋ جۇمىستارى اياقتالىپ وتىر. مۇنىڭ ءبارى دە كۇننىڭ ىستىعىنا قاراماي جۇمىس ىستەپ جاتقان جامبىلدىق قۇرىلىسشىلاردىڭ ەڭبەگى. ايتا كەتەيىك, قازىرگى كەزدە 3-سەكتور اۋماعىنداعى تۇرعىن ۇيلەردى قالپىنا كەلتىرۋ جۇمىستارىنا جامبىلدىق 4 قۇرىلىس كومپانياسىنان 450-دەن اسا قۇرىلىسشى مەن 21 تەحنيكا جۇمىلدىرىلعان. ولار 242 جەكە تۇرعىن ءۇي بويىنشا جوندەۋ جۇمىستارىن جۇرگىزۋدە.

ارىس قالاسىن قالپىنا كەلتىرۋگە باعىتتالعان جامبىل وبلىسىنىڭ شتابىنا قاراستى 3-سەكتورعا 11 كوشە بەكىتىلگەن بولاتىن. وندا 312 تۇرعىن ۇيمەن بىرگە 14 الەۋمەتتىك جانە كوممەرتسيالىق نىسان بارى انىقتالعان. زەردەلەۋدەن وتكەن جەكە تۇرعىن ۇيلەردىڭ ءبارىنىڭ اقاۋ اكتىلەرى تولتىرىلىپ, سمەتالاۋ جۇمىستارى جاسالعان. قيراعان 3 ءۇيدىڭ ەكەۋى قايتادان بوي كوتەرىپ, بىرەۋى تولىق جاڭعىرتىلاتىن بولادى. قالعان 309 ۇيگە ءارتۇرلى جوندەۋ جۇمىستارىن جۇرگىزۋ جوسپارلانعان. مۇندا قاجەتتى قۇرىلىس ماتەريالدارى كەزەك كۇتتىرمەي كۇن سايىن جەتكىزىلۋدە. ال ءتيىستى شىعىندار رەسپۋبليكالىق بيۋدجەت پەن ارنايى قورعا جيناقتالعان قارجىدان قاراستىرىلۋدا.

ءوز كەزەگىندە 3-سەكتور اۋماعىنداعى ارىستىق تۇرعىندار اۋليەاتالىق قۇرىلىسشىلاردىڭ جۇمىسىنا وڭ باعاسىن بەرىپ, العىس ءبىلدىردى. جامبىلدىق قۇرىلىسشىلار ەڭبەگىنىڭ ەلەۋلى ەكەنىنە توقتالدى. سونىمەن قاتار ارىستىق تۇرعىندار مۇنداعى جۇمىستاردىڭ ساپالى ورىندالىپ جاتقانىن, وقيعا ورىن العان سىن ساتتە جامبىلدىقتاردىڭ العاش بولىپ كومەككە كەلگەندەرىن دە ايتتى. ماسەلەن, ارىس قالاسىنداعى جارىلىستان زارداپ شەككەن ازاماتتارعا قولداۋ كورسەتۋ بويىنشا «ارىس, ءبىز بىرگەمىز!» رەسپۋبليكالىق اكتسياسى اياسىندا تاراز قالاسىنان 4 قابىلداۋ پۋنكتى اشىلعان بولاتىن. Nur Otan پارتياسىنىڭ وبلىستىق جانە اۋداندىق فيليالدارىندا ۇيىمداستىرىلعان ارنايى پۋنكتتەردە جينالعان كومەك ماتەريالدارى, ازىق-ت ۇلىك پەن العاشقى قاجەتتىلىكتەگى زاتتار ارىس قالاسىنا جونەلتىلگەن ەدى. بۇگىنگە دەيىن بارلىعى 400 توننادان استام گۋمانيتارلىق كومەك بەرىلگەن. ال تۇرعىندارعا مەديتسينالىق كومەك كورسەتۋ ءۇشىن 2,2 ميلليون تەڭگە قاجەتتى ءدارى-دارمەكتەرمەن قامتىلعان ارنايى جاساقتالعان 4 رەانيموبيلمەن 8 فەلدشەر ارىس قالاسىنا جىبەرىلگەن. ەندى «اۋليە اتا – دەمەۋ» قايىرىمدىلىق قورىنا بيۋدجەتتىك مەكەمەلەر مەن كاسىپورىنداردان اقشا اۋدارىلۋدا. ارىس قالاسىنداعى توتەنشە جاعدايعا بايلانىستى جامبىل وبلىسى تاراپىنان كورسەتىلەتىن گۋمانيتارلىق كومەك ءالى دە جالعاسۋدا. بۇگىندە ارىس قالاسىنان كەلگەن 323 بالا ءاۋليەاتا وڭىرىندەگى «تاۋ سامالى», «جۇرىندىساي», «جۇلدىز» سياقتى جازعى ساۋىقتىرۋ لاگەرلەرىندە دەمالۋدا.

جامبىل وبلىسى