شىنى كەرەك, الپىس جىلعا جۋىق كوك بازاردىڭ الدىندا تۇرعان ەسكەرتكىشتىڭ توزىعى جەتكەن. بىراق ەسكى ەسكەرتكىشتى دە قوقىسقا لاقتىرىپ تاستاعان ەشكىم جوق. تەك ونى قايتادان ءجوندەۋدەن وتكىزىپ, ءتيىستى جەرگە ورناتۋدىڭ مۇمكىندىگى قاراستىرىلىپ جاتقان بولاتىن. الايدا «بىتكەن ءىسكە سىنشى كوپ» دەگەندەي, جامبىل ەسكەرتكىشى ءوڭىردىڭ باس عيماراتىنىڭ الدىنا ورناتىلعان كۇننەن باستاپ اڭگىمە كوبەيدى. بۇل باستامانى قۇپتاعاندار دا, قۇپتاماعاندار دا تابىلدى. اسىرەسە الەۋمەتتىك جەلىلەردە جامبىل ەسكەرتكىشىنە قاتىستى داۋ ءورشىدى. كوپ جاعدايدا جەلى بەلسەندىلەرى ەسكەرتكىشتىڭ ءوز ورنىندا قالۋىن تالاپ ەتىپ جاتتى.
بۇل ماسەلەنىڭ ءدۇبىرى تەك جامبىل وڭىرىندە عانا ەمەس, رەسپۋبليكا بويىنشا دا بەلگىلى بولدى. ءتىپتى كەيبىر ازاماتتار بۇل ماسەلەگە قاتىستى اقىننىڭ ۇرپاقتارى نە دەيدى ەكەن دەگەن اڭگىمەلەرگە دە بارعان ەدى. جۋىردا جىر الىبىنىڭ شوبەرەسى مۇراتحان جامبىلوۆ وڭىرگە كەلىپ, وبلىس اكىمى اسقار مىرزاحمەتوۆپەن كەزدەسكەن بولاتىن. اقىننىڭ ۇرپاعى ءوز سوزىندە بۇل باستامانىڭ وتە ورىندى ەكەنىن, سوندىقتان دا جامبىل اۋلەتىنىڭ اتىنان العىس ايتاتىنىن جەتكىزدى.
مۇراتحان جامبىلوۆ تاراز قالاسىنا العاش رەت جەتى جاسىندا كەلىپتى. سودان كەيىن دە جولى تۇسكەندە كەلىپ جۇرگەن. ول ءوز سوزىندە كوك بازار ماڭىنداعى جامبىل ەسكەرتكىشىن العاش كورگەندەگى ەستەلىگىمەن دە ءبولىستى. «ءالى ەسىمدە, سوندا ەسكەرتكىشتىڭ اينالاسى قۇجىناعان حالىق. الدى كوك بازار. ابىر-سابىر تاڭنان قارا كەشكە دەيىن ءبىر باسىلمايتىن. سوندا ەسكەرتكىشتىڭ كولەڭكەسىندە ەسىنەن ايىرىلعانشا ىشىمدىك ءىشىپ, كولەڭكەسىندە ۇيىقتاپ جاتقانداردى دا كورگەنمىن. ال قازىر بابامىزدىڭ ەسكەرتكىشى ءوز ورنىن تاۋىپ, وبلىستىڭ باس عيماراتىنىڭ الدىندا مەنمۇندالاپ تۇر. بىزگە, بابا ۇرپاقتارىنا بۇدان اسقان قانداي باقىت كەرەك», دەيدى ول. بۇل ورايدا جامبىل وبلىسىنىڭ اكىمى اسقار مىرزاحمەتوۆ تە ءوزىنىڭ پىكىرىن ءبىلدىردى. «ەگەر ەسكەرتكىشتىڭ جاعدايى جاقسى بولسا, ءبۇتىندى ءبۇلدىرىپ نەمىز بار. ماسەلەن, وبلىستىق قازاق دراما تەاترىنىڭ الدىنداعى باۋىرجان مومىش ۇلىنىڭ ەسكەرتكىشى جارامدى بولعاندىقتان سول كۇيىندە «جەڭىس» ساياباعىنا قويدىق. ال جامبىل جاباەۆتىڭ ەسكەرتكىشىنىڭ توزىعى جەتكەندىكتەن اۋىستىرۋعا تۋرا كەلدى. بۇل اسىعىس جاسالعان قادام ەمەس. الدىمەن بارلىعى جان-جاقتى زەردەلەندى», دەيدى اكىم.
ەل بولعان سوڭ ءتۇرلى پىكىرلەر دە بولادى. كەزىندە امەريكانىڭ ءبىر گازەتى «قازاقستان دەيتىن ەلدە, جامبىل دەيتىن جەردە اشارشىلىققا ارنالىپ ەسكەرتكىش قويىلىپتى. قولىندا قاسىعى بار ءبىر شال الاقان جايىپ تۇر ەكەن», دەپ جازىپتى دەگەندى دە ەستىگەنبىز. سوندا جامبىل اقىننىڭ قولىنداعى دومبىرانى قاسىق دەپ, قولىن سەرمەپ تۇرعانىن الاقان جايىپ تۇر دەپ جازىپتى دەگەن دە ءسوز بولعان. ەندى بۇگىندە جامبىل ەسكەرتكىشىنە بايلانىستى مىناداي داۋ شىقتى. ارينە, ەسكەرتكىشتىڭ ورنىن اۋىستىرعاننان ەشتەڭە ءوزگەرمەسە دە, ەسكىنى جاڭالاۋدى قۇپتاعان ءجون. ەندىگى جەردە بۇل داۋدىڭ نۇكتەسى قويىلدى دەگەن ءۇمىت بار.
