– ناۋرىز ايىندا ءاىۆا-نىڭ باسشىلىق قىزمەتىنەن وزبەكستاندىق عافۋر راحيموۆ كەتتى. ەندى ونىڭ ورنىن كىم باسۋى مۇمكىن؟
– توكيو وليمپياداسىنا ءبىر جىلدان ءسال عانا استام ۋاقىت قالدى. بوكس وليمپيا ويىندارىنىڭ باعدارلاماسىنان شىعارىلۋى مۇمكىن دەگەن پىكىر ايتىلعان. ال بوكسسىز وليمپيادا وتپەيدى. قازىر ءاىۆا تاراپىنا ايتىلاتىن سىن كوپ, قارجى ماسەلەسى بولسىن, تورەشىلىك جاعىنان بولسىن, ءتىپتى, جەمقورلىققا قاتىستى دا داۋلار تۋىنداعان. بالكىم, باسقا ءبىر اگەنتتىك قۇرىلىپ تا قالار.
– سوندا ءاىۆا تاراتىلۋى مۇمكىن عوي؟
– بۇل ويدى دا جوققا شىعارۋعا بولمايدى. ويتكەنى حوك باسشىلىعى بوكس ۇيىمىنىڭ جۇمىسىنا كوڭىلى تولمايتىنىن اشىپ ايتقان. بىراق تورتكۇل دۇنيە قىزىعاتىن, تاريحى تەرەڭدە جاتقان سپورتتىڭ بۇل ءتۇرىن وليمپيادا باعدارلاماسىنان الىپ تاستاۋعا بولمايدى, ونى حالىقارالىق وليمپيادا كوميتەتى دە جاقسى بىلەدى دەپ ويلايمىن.
– راحيموۆ كەتتى. بۇعان دەيىن قىسىم كورسەتىلىپ كەلدى دەگەن قازاقستاندىق بوكسشىلاردىڭ ەندى شىن الەۋەتىن بايقاي الامىز با؟
– مۇنى ءبىر راحيموۆپەن بايلانىستىرعان دۇرىس ەمەس. ونىڭ بارلىعى ءاىۆا تاراپىنان جىبەرىلگەن قاتەلىكتەر. تورەشىلەردىڭ «بارماق باستى, كوز قىستى» ارەكەتتەرىنەن قازاقستاندىق بوكسشىلار عانا زارداپ شەكتى دەۋگە كەلمەيدى. قاي قۇرلىق چەمپيوناتىن الىپ قاراساق تا, ونداي ولقىلىقتار تولىپ جاتىر.
– حوك-ءتىڭ ەشبىر ەسكەرتۋىنە قاراماستان وزبەكستاندىق كاسىپكەر باسشىلىق قىزمەتكە سايلانىپ, جارتى جىلدان سوڭ ورنىن بوساتتى. راحيموۆ بۇل ورىنعا نەگە كەلدى جانە نەگە كەتتى؟
– بىرىنشىدەن, مۇنى جالعىز راحيموۆ شەشپەيتىنىن ۇمىتپايىق. سوندىقتان كەمشىلىكتىڭ ءبارىن وزبەكستاندىق كاسىپكەرگە ىسىرا سالۋعا بولمايدى. جۇيەدەن, قۇرىلىمنان كەتكەن قاتەلەردىڭ كەسىرى. ءوزىمىز ءاىۆا-نىڭ كوپتەگەن جيىندارىنا قاتىستىق. سوندا اتقارۋ كوميتەتى مۇشەلەرىنىڭ توقسان بەس پايىزىنىڭ بوكسقا مۇلدە قاتىسى جوق. كەلەسى جىلى قۇرىلعانىنا عاسىر تولاتىن ءاىۆا-نىڭ وسىنداي جاعدايعا دۋشار بولۋىنا اكەپ سوققان جايتتار انىقتالادى, رەسمي مالىمدەمەلەر جاسالادى دەپ ۇمىتتەنەمىز.
– ەندى اڭگىمەنىڭ اۋانىن گەننادي گولوۆكينگە بۇرساق. ساۋل الۆارەسپەن بولعان ايقاستا جەرلەسىمىزدىڭ تاراپىنا ءبىراز سىن ايتىلدى. ءتىپتى «بوكستان كەتكەنى دۇرىس» دەگەندەر دە از ەمەس. جەرلەسىمىزدىڭ ءارى قارايعى كارەراسىنا قاتىستى ءپىكىرىڭىزدى بىلسەك.
– گەنناديدىڭ التى جەكپە-جەك ءوتكىزەتىنىن ەستىگەندە شىنىمەن دە قۋانىپ قالدىق. ويتكەنى ول ءبىزدىڭ جۇلدىز بوكسشىمىز, ەلىمىزدە عانا ەمەس, الەمدە مويىندالعان بىلعارى قولعاپ شەبەرى. ءالگىندە ايتقانىمداي, كاسىبي بوكس ول – بيزنەس. سوندىقتان مۇندا شاماسى جەتكەندەر قىرقىندا دا قامال بۇزا الادى. گولوۆكين دە سولاردىڭ قاتارىنان. كارەراسىن اياقتاۋعا كەلسەك, الەۋەتىڭ مەن مۇمكىندىكتەرىڭدى وزىڭنەن ارتىق ەشكىم بىلمەيدى. ونىڭ دا ءبىر ويلاعانى بار شىعار. كەزىندە دجوردج فورماننىڭ 45 جاسىندا الەم چەمپيونى اتانعانىن ۇمىتپايىق. كوپشىلىكتىڭ اراسىندا جۇرگەن سوڭ سىن دا, ماقتاۋ دا بولادى. وتانداسىمىزعا الداعى جەكپە-جەكتەرىندە ساتتىلىك تىلەيمىن.
– GGG مەن «كانەلو» اراسىندا ءۇشىنشى جەكپە-جەك ءوتۋى مۇمكىن بە؟
– وتەدى. مىندەتتى تۇردە. بابىندا بولسا, ەلۋ جاستا دا چەمپيوندىق بەلبەۋ يەلەنۋگە بولادى.
– باسقا-باسقا, سىزدەن «استانا ارلاندارى» جايلى سۇراماساق بولماس. سول كلۋبتىڭ نەگىزىن قالاپ, ءبىرنەشە جىل باسشىسى بولدىڭىز. ەلوردانىڭ بوكس كلۋبى تاراعانى تۋرالى جاڭالىقتى ءسىز قالاي قابىلدادىڭىز؟
– ءاىۆا العاش وسى جوبانى پاش ەتكەن كەزدە بوكستىڭ توڭىرەگىندە جۇرگەن كوپتەگەن ازاماتتار كادىمگىدەي قۋانىپ قالدى. ليگالىق جۇيە بويىنشا داميتىن جوبا رەتىندە قاراستىرىلدى. بىراق العاشقى ماۋسىم اياقتالىسىمەن-اق سپورتتىق جاعىنان دا, ۇيىم جۇمىسىنا دا قاتىستى شارتتار مەن تالاپتار وزگەرە باستادى. بۇل جىلدا قايتالاناتىن ۇردىسكە اينالدى. الدىمەن «ءاربىر كوماندا قالاعا بەكىتىلسىن» دەلىنگەن. ءبىز دە ويلانا كەلە كوشپەندىلەر ءۇشىن ورنى بولەك ارلان اتاۋىن الىپ, «استانا ارلاندارى» دەگەن بايلامعا كەلدىك. كەلەسى جىلى سالماقتار سانى بەستەن ونعا دەيىن كوبەيتىلدى. «مەملەكەت تاراپىندا بولسىن» دەگەن تالاپ قويىلدى. مەدياحولدينگتەردىڭ اراسىندا بىردە-ءبىر سەرىكتەس بولعان جوق. باستاپقىدا ۇسىنىسپەن كەلگەن الپاۋىت ING كومپانياسى دا ەكىنشى ماۋسىمدا بىرلەسىپ جۇمىس ىستەۋدەن باس تارتتى. جۇمىس جۇيەلەندىرىلمەي جاتىپ قىرۋار قارجى سۇرالعان عوي. سول كەزدە-اق ۇيىم الىسقا بارمايتىنىن تۇسىندىك.
– الداعى ۋاقىتتا مۇنداي جوبالار كەرەك پە؟
– كەرەك, ەگەر ناقتى جۇيە بولسا. ايتپەسە قالاعان ۋاقىتتا وزگەرە بەرەتىن ەرەجەلەر كىمگە قاجەت؟! ۇيىم جۇمىس ىستەگەن سەگىز جىلدىڭ ىشىندە تالاي كوماندا كەلىپ-كەتتى. دامىعان مەملەكەتتىڭ وكىلدەرى العاشقى ماۋسىمنان كەيىن-اق كەتىپ قالدى. ويتكەنى تابىستان گورى شىعىن كوبەيىپ كەتتى.
