قازىر ەلىمىزدىڭ بارلىق ءوڭىرلەرى اباي ولەڭدەرىن وقۋ ءىس-شاراسىنا بەلسەندى اتسالىسۋدا. ءمادەني شارا قازاقستان حالقى اسسامبلەياسى جاستارى تاراپىنان دا قولداۋ تاۋىپ, الەۋمەتتىك جەلىلەردە #Abai175 چەللەندجىنە بەلسەنە قاتىسا باستاعان بولاتىن.
دوستىق ۇيىندە جالعاسىن تاپقان شارا بارىسىندا جانسەيىت تۇيمەباەۆ الماتى قالالىق «احىسكا» تۇرىك ەتنومادەني ءبىرلەستىگى توراعاسىنىڭ ورىنباسارى قازاقباي قاسىموۆ باستاعان ەستافەتا قاتىسۋشىلارىنا ابايدىڭ كىتابىن سىيلىققا تارتۋ ەتىپ, 37-ءشى قارا ءسوزىن وقىدى. اسسامبلەيا جاستارى دا ۇلى اقىننىڭ ولەڭدەرىن جاتقا ايتىپ, ءان-كۇيمەن ارلەدى.
مادەني كەش باعدارلاماسىنا وراي ج.تۇيمەباەۆ قازاقستان حالقى اسسامبلەياسىنىڭ رەسپۋبليكالىق ەتنومادەني بىرلەستىكتەرىنىڭ باسشىلارىمەن كەڭەس وتكىزىپ, ەلىمىزدەگى ۇلت وكىلدەرى ورتالىقتارىنىڭ جۇمىسىنا قاتىستى بىرقاتار ماسەلەلەرمەن ءبولىستى.
ال پارلامەنت ءماجىلىسىنىڭ دەپۋتاتى, ۇيعىر ەتنومادەني ورتالىعىنىڭ توراعاسى شايماردان نۇرىموۆ اباي ولەڭدەرىن رەسپۋبليكا جۇرتشىلىعى بولىپ وقۋ جاستار اراسىندا ادەبيەتىمىز بەن مادەنيەتىمىزدى ناسيحاتتاۋعا, وتانسۇيگىشتىكتى دامىتۋداعى ماڭىزدى رۋحاني شارا ەكەندىگىن اتاپ ءوتتى.
