1911 جىلدىڭ 13 ماۋسىمىندا جازىلعان «قازاق ەلىنىڭ ۋستاۆى» سونىڭ ايقىن ايعاعى. «قازاق» گازەتىنىڭ 1914 جىلعى №90 سانىندا ءا.بوكەيحاننىڭ «بارلىبەكتى ۇمىتپاسقا» اتتى ءمۇناھيب-ماقالاسىنىڭ جازىلۋ سىرى دا وسىندا جاتىر.
جاقىندا قالامگەر, جاس عالىم ەلدوس توقتاربايدىڭ تاريحي تولعامعا نەگىزدەلگەن «بارلىبەك تۋرالى بىرەر ءسوز...» اتتى كىتابى جارىق كوردى. كىتاپتا ساياسي قايراتكەر, قازاق حالقىنىڭ قۇقىعىن قورعاۋعا جان سالعان ب.سىرتتانوۆتىڭ ءومىر جولى, قىزمەتى جانە وتباسى مەن ۇرپاقتارى جايىندا كەڭىرەك قامتىلعان. زاڭگەر بارلىبەك سىرتتانوۆتىڭ ەسىمىن جاڭعىرتىپ, قازاق تاريحىنداعى ورىنىن انىقتاۋدا اتالعان كىتاپتىڭ ماڭىزى زور. جاڭاشىلدىعى سول, كىتاپقا بۇرىن-سوڭدى جاريالانباعان تىڭ اقپاراتتار مەن ارحيۆتەن تابىلعان قۇجاتتار ەنگىزىلگەن. ەڭبەكتە بارلىبەكتىڭ عۇمىر جولى مەن قىزمەتىنە قاتىستى وزىندىك بولجامدارى مەن تۇجىرىمدارى دا قامتىلعان. ءتىپتى, تاريح تاساسىندا قالعان تارلاننىڭ جان-جاقتى قابىلەتىن انىقتاپ, تىلگە تيەك ەتكەنى دە كورىنەدى. ماسەلەن, كىتاپ كەيىپكەرى ءبىلىم-عىلىمنان بولەك, دارىگەرلىك سالانى دا مەڭگەرگەنگە ۇقسايدى. سوندىقتان ونىڭ «دارىلىك وسىمدىكتەر» ەڭبەگىن جازۋى تەگىن ەمەس. ەڭ باستىسى كىتاپتى وقىپ شىققان وقىرمان وتكەن كەزەڭدەردە قازاق قوعامىنىڭ دەرتى بولىپ جابىسقان, وزەكتى ماسەلەلەردى ساۋاتتى تۇردە جەتكىزىپ, كۇرەسە بىلگەن ەرەن تۇلعانىڭ تۇتاس عۇمىرىنان حاباردار بولادى.
