وسى جايتتاردى سارالاعان ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ قاتىسۋىمەن جەتەگە جەتەتىندەي-اق جۇيەلى ءسوز ايتىلدى. تەك جۇلگەسىن تاپسىن دەيمىز.
البەتتە, قازاق ەلى وسىناۋ شيرەك عاسىردان اسا كەزەڭدە كوپ يگىلىككە قولى جەتسە دە, ۋىسى تولماي كەلە جاتقانىنىڭ سەبەبىن ىزدەيمىز عوي ازەلدەن. اسىرەسە شەرلەنىپ شىن ءسوزدىڭ ساداعىن شىرەنە تارتقان شەراعانىڭ, كەمەل سانداردى سويلەتكەن سايىن ساعىڭ سىناتىن كامال سمايىلوۆتىڭ سوناۋ مىڭجىلدىقتار توعىسىنداعى تولعاۋ حاتتارىن قايتالاپ وقىساڭىز ءالى دە وزەكتىلىگىن جويماعانىن بايقايسىز. ناليسىز با, ناليسىز. ءيا, ءبىز ءالى دە التىن ساندىقتىڭ ۇستىندە جالاڭبۇت وتىرعان كۇلشەلى بالا ءتارىزدىمىز.
بارشاعا بولماسا دا, وسى ءبىر نامىستى ءسوز بازبىرەۋىمىزدى قامشىلامايتىنى, نامىسىمىزدى وياتپايتىنى, شابىمىزعا تۇرتپەيتىنى تاڭعالدىرادى. ءبىزدى قامشىلايتىن ءالى دە ورىنتاق ويىندارى, نامىسىمىزدى تۋ ەتىپ, شابىمىزعا تۇرتەتىنى ءالى دە رۋلىق, جەرشىلدىك دەرتى بولىپ قالۋدا, وكىنىشكە قاراي. سودان دا بولار, قازىر ۇلكەندى-كىشىلى قايسىبىر مانساپقا تاعايىندالعان ازاماتتىڭ ءومىربايانىنداعى قاسيەتتى «تۋعان جەر» گرافاسى كورسەتىلمەيتىن بولدى. جۇمىس بارىسىنداعى جۇيەسىزدىكتەر جاريا بولسا, سالدارى كاسىبيلىكتىڭ ەمەس, جەڭ ۇشىنان جالعاسۋدىڭ جەمىسى بولىپ شىعا بەرەدى, شىعا بەرەدى...
قازاقستان يندۋستريالاندىرۋ باعدارلاماسىنىڭ ءۇشىنشى بەسجىلدىعىنىڭ الدىندا تۇر. بىراق الدىڭعى ەكى بەسجىلدىقتىڭ جەمىسى قانداي, كەمشىلىگى قانداي؟ باعامداي, تارازىلاي الدىق پا؟ قوعامنىڭ جادىندا اشىلا سالىپ, جابىلاتىن, ءتىپتى اشىلماسا دا اشىلعانداي قىلىپ كورسەتىلگەن ءىرى جوبالاردىڭ «گراند» تۇساۋكەسەرلەرىمەن قالعان قاتەلىكتەردەن قانشالىقتى ساباق الدىق؟ جالپى «مەگاجوبالاردان» بۇرىن قاراپايىم عانا قاجەتتىلىكتەرىمىزدى قامتاماسىز ەتىپ الۋدى نەگە ويلاستىرمايمىز؟ بۇل ماسەلەدە ۇكىمەتتىڭ ءوزى قولداۋ بەرۋگە بەكىنىپ وتىرعان «قاراپايىم زاتتار ەكونوميكاسى» الەۋەتىن ءتيىمدى پايدالانا الامىز با؟ مىنە, وسىنداي ساۋالداردى توڭىرەكتەگەندە كىمگە كىنا قويارىمىزدى, كىمگە ءۇمىت ارتارىمىزدى بىلمەي داعداراتىنىمىز بار. حالىق جۇمىس بەر دەيدى. ۇكىمەت جۇمىس بار, ىستە دەيدى. وسى ورتادا دانەكەرلىك تانىتاتىن مەنەدجەرلەر بۋىنى ءوسىپ-جەتىلمەگەن بە دەگەن ويعا قالساڭىز, شەتەلگە اعىلىپ جاتقان وي-سانا كوشى ەسىڭىزگە تۇسەدى. ال مەملەكەت ناقتى الەۋمەتتىك قولداۋلارعا بەت بۇرا باستاسا, ونى دا ءسىز بەن ءبىزدىڭ سالىعىمىزعا الدەكىمدەردىڭ قول جايعانى دەپ كوز الارتاتىنىمىز بار. سوندا قالاي؟..
قازاق «كىسىدەن سۇراعاننىڭ ەكى كوزى شىعادى» دەگەن ەكەن. ءاسىلى, «حان سىرتىنان جۇدىرىق» كورسەتەردەن بۇرىن تاقياسىنا قاراي تار ۋىسىن تولتىرعىسى كەلەتىن الەۋمەتتىڭ قاي توبىنا دا «سۋدىڭ دا سۇراۋى بارىن» بىلمەك ءلازىم. سوندا ءار دۇنيەنىڭ باعاسى بولماق. ايتپەسە الەۋمەتتىك قولداۋعا ارقا سۇيەگەن حالىقتىڭ جۇمىسسىز وتىرعانى وتىرعان, بيۋدجەت قارجىسىنا بيزنەس جۇرگىزگىسى كەلەتىن بازبىرەۋلەردىڭ الاقان جايعانى جايعان بولىپ قالا بەرەدى.
سانامالاۋدىڭ قاجەتى جوق, بيۋدجەت قارجىسى جەلگە ۇشقان جوبالار جەتەرلىك. سونىڭ الدىن الۋ ءۇشىن پرەزيدەنت جوسپارلاۋدىڭ دۇرىس جۇرگىزىلۋى جونىندە ايتتى. بۇل سوعان سايكەس قارجىلاندىرۋدى قامتاماسىز ەتپەك.
