«ياپىراي», «ءبىر ارپا بيداي», «ءشاپيباياۋ», «ءتىلەۋقاباق», «ەكى جيرەن», «اق قۋراي», «باياناۋىل», «سۇرجەكەي» سىندى حالىق ءاندەرىنە قوسا اقان سەرىنىڭ «سىرىمبەت», سەگىز سەرىنىڭ «قارعاش», ءمادي ءباپي ۇلىنىڭ «قاراكەسەك», ەستايدىڭ «قۇسني-قورلان», جاياۋ مۇسانىڭ «اق سيسا», اباي قۇنانباي ۇلىنىڭ «كوزىمنىڭ قاراسى», مۇحيت مەرالى ۇلىنىڭ «اينامكوز», زىلقارا بايتوقا ۇلىنىڭ «جيىرما بەس» شىعارمالارى, اسپاپتىق تۋىندىلاردان م.تولەباەۆتىڭ سكريپكاعا, ك.كۇمىسبەكوۆتىڭ ۆيولونچەلگە ارنالعان پوەمالارى, ءا.مامبەتوۆتىڭ تريو-ەلەگياسى سىرشىل دا سازدى سيپاتتا ورىندالىپ, سەزىم تولقىنىنداعى ءان جەلكەنى جان تەربەدى.
الەمنىڭ 50-دەن استام ەلىندە شەبەرلىك سىنىبىن وتكىزىپ, قازاق ۇلتتىق وپەرا ونەرىنىڭ دامۋىنا ولشەۋسىز ەڭبەك سىڭىرگەن شاحيماردان ءابىلوۆتىڭ كىم ەكەنىن تاعى ءبىر مارتە ايگىلەپ ايتىپ جاتۋ, ارتىق بولار, ءسىرا. دەي تۇرعانمەن احمەت جۇبانوۆ پەن لاتيف ءحاميديدىڭ «اباي» وپەراسىنداعى ول سومداعان اباي بەينەسى بۇگىندە قازاق ۇلتتىق وپەرا ونەرى تاريحىنداعى شوقتىعى بيىك ايتۋلى پارتيا رەتىندە جوعارى باعالاناتىنىن, اقىننىڭ ۇلى جۇرەگىنىڭ ماحابباتىن, ىشكى جان تەبىرەنىسىن, تولعانىس-تولقۋى مەن ارمان-اڭسارىن اسقاقتاتا شىرقاپ, اۋپىلدەكتەي اۋەلەتكەن ءار ءساتىن كوپشىلىككە ونەگە ەتە ءجۇرسەك, مۇنىڭ ءوزى كەيىنگى وسكەلەڭ ۇرپاق ءۇشىن ءمانى زور ونەگە بولماق. شاحيماردان ءابىلوۆ بەينەلەۋىندەگى اباي مۇراسى بۇعان دەيىنگى ءسۇرلەۋ-سوقپاققا ۇقسامايتىن وزگەشە سۇلۋ ورنەگىمەن, بايسالدى دا سىمباتتى كۇيىمەن ەرەكشەلەنىپ, كوڭىلدى ءاردايىم سىرشىل سازبەن كومكەرىپ تۇراتىندىعى ەڭ الدىمەن, قاي شىعارمانى دا ونىڭ كوڭىل بەزبەنىنە سالىپ, جۇرەكپەن ورىنداۋىندا. ال ۆەرديدىڭ «ريگولەتتو», «تراۆياتا» جانە «ايدا» سپەكتاكلدەرىندەگى ريگولەتتو, جەرمون, اموناسرو, چايكوۆسكيدىڭ «قارعانىڭ ءماتكەسىندەگى» – تومسكي, ريمسكي-كورساكوۆتىڭ «پاتشا قالىڭدىعىنداعى» – گريازنوۆ, ەركەعالي راحماديەۆتىڭ «ابىلاي حانىنداعى» بۇقار جىراۋ سىندى شوقتىعى بيىك پارتيالارى ءوز الدىنا بولەك ءيىرىم, الەمدىك ءھام وتاندىق رۋحاني قازىنانى قاتار يگەرۋدەگى سان تاراۋ ءىرى جەتىستىك دەر ەدىك.
تۇركيا پرەزيدەنتى س.دەميرەلدىڭ باستاماسىمەن ساحنالانعان «ارارات تۋرالى اڭىز» وپەراسىنداعى احمەت ءرولىن ءتۇبى تۇركى جۇرتىنان تۇرىك تىلىندە سايراتقان تۇڭعىش قازاعىڭىز دا, تۇرىك باۋىرلاردىڭ «كوروعلى» وپەراسىنا ارنايى شاقىرتىلىپ, باس پارتيانى ورىنداعان تۇلعاڭىز دا مىنە, وسى ءانشى ەكەنىن بىرەۋ بىلسە, بۇگىندە بىرەۋ بىلە بەرمەۋى مۇمكىن-اۋ!
يتاليان, ورىس, نەمىس, ت.ت. سول سياقتى نەبىر الەمدىك ءان مەكتەپتەرىن شەبەر مەڭگەرە ءجۇرىپ, ءوزىڭنىڭ حالقىڭنىڭ جان دۇنيەسىنە ەتەنە جاقىن, ءحىح عاسىردىڭ وزىندە-اق كاسىبي تۇرعىدا كەمەلدىككە جەتكەن قازاق ۇلتتىق ءان مەكتەبىن ءاردايىم قادىر تۇتىپ ءوتۋدى, قاي ساحنادا بولسىن ءتول مۇرانى, دالا مادەنيەتىن باسقا ءوركەنيەتتىڭ مادەنيەتىنەن وق بويى وزدىرتىپ, مەرەيىن ۇستەم ەتۋدى ومىرلىك ۇستانىمعا اينالدىرعان ءانشى لوندوننىڭ ايگىلى باربيكان ورتالىعىندا, ءپاريجدىڭ ەڭ مىقتى پلەيەل زالىندا, ماسكەۋدەگى كومپوزيتورلار وداعى زالىندا, چايكوۆسكي اتىنداعى كونسەرۆاتوريانىڭ كىشى زالىندا, اسىرەسە حالىق اندەرىن ۇزىلدىرە شىرقاعاندا ونداعى حالىق ورىندارىنان ورە تۇرەگەلىپ, قازاقتىڭ حالىق اندەرىنىڭ كەرەمەتتىگىنە تاڭداي قاققانىن ءانشىنىڭ ءوز اۋزىنان ەستىپ قالعان جايىمىز بار.
بۇل تۋرالى ءوزى: «شەتەلدەگى سونداي ءبىر كەزەكتى كونتسەرتتەن كەيىن تانىمال ءبىر تۇلعا كەلىپ: «مىناۋ نەتكەن عاجاپ دۇنيە! الگىندە ورىنداعان تاماشا تۋىندىڭىزدىڭ اۆتورى كىم, كومپوزيتورى كىم؟ مۇنداي كلاسسيكالىق ۇلگىدەگى حالىقتىق شىعارمانى العاش رەت ەستۋىمىز» دەپ ءان تاريحىن قىزىعا سۇراستىرىپ, ءسۇيسىنىس ءبىلدىردى» دەپ جازدى.
ال «استانا وپەرا» تەاترىنىڭ جەتەكشى ءسوليسى جۇپار عابدۋللينانىڭ ۆوكالدىق, ساحنالىق شەبەرلىگى, داۋىس ەرەكشەلىگى كوپشىلىككە كەڭىنەن ءمالىم دەسەك, جاقىندا عانا ول تۇركيادا وتكەن حالىقارالىق ىستانبۇل وپەرا جانە بالەت فەستيۆالىنىڭ مەرەيتويلىق ونىنشى اشىلۋ سالتاناتىنا قاتىسىپ قايتتى. دج.ءپۋچچينيدىڭ «تۋراندوت» وپەراسىنداعى باستى پارتيانى ورىنداعان قازاق ءانشىسىنە ساراپشىلار جوعارى باعا بەردى. «2500 ورىنعا شاقتالعان Zorlu PSM Studio كونتسەرت زالىندا ينە شانشار ورىن بولعان جوق», دەپ جازدى بۇل تۋرالى جەرگىلىكتى باسىلىمدار.
جۋرناليستەرگە بەرگەن سۇحباتىندا جۇپار عابدۋللينا كونتسەرتتىڭ ەرەكشەلىگى تۋرالى ايتا كەلىپ:
– سەبەبى وپەرا ءانشىسى ءۇشىن كامەرالىق مۋزىكانىڭ ورنى قاشاندا بولەك, – دەدى. – قۇرمانعازى اتىنداعى كونسەرۆاتوريانىڭ اسپيرانتۋراسىندا شاحيماردان اعانىڭ سىنىبىندا وقىدىم. سول سەبەپتى كامەرالىق زالدا ۇستازىممەن بىرگە ونەر كورسەتۋ باقىتىنا يە بولعانىما قۋانىشتىمىن.
ەكىنشىدەن, كورەرمەنگە قازاق حالقىنىڭ ءتول تۋىندىلارىن ورىنداۋ, سىرناي, دومبىرا اسپاپتارىندا شىرقالعان كونە دۇنيەلەردى, سال-سەرىلەر مەن دالا كومپوزيتورلارىنىڭ شىعارمالارىن ۇسىنۋ باعا جەتپەس بايلىقتى ۇلگى تۇتۋ دەپ ەسەپتەيمىن. ۇلان-عايىر, كەڭ-بايتاق ولكەمىزدە تۋعان بايىرعى سانسىز سارىندى ۇدايى دارىپتەپ وتىرۋ – ءاربىرىمىزدىڭ باستى پارىزىمىز. اتا-بابالارىمىزدان قالعان وسىناۋ اسىل مۇرانى, ۇرپاقتان-ۇرپاققا اۋىزشا ساقتالىپ جەتكەن جاۋھار تۋىندىلاردى كلاسسيكالىق ۇلگىدە جاڭعىرتۋ جوباسى مۇنان كەيىن دە ءارى قاراي جاراسىمدى جالعاسىن تابا بەرەرىنە سەنەمىن.
كلاسسيكالىق مۋزىكا كەشىندە سونداي-اق قازاقستاننىڭ ەڭبەك سىڭىرگەن ءارتىسى ماقپال بەكماعامبەتوۆا (سكريپكا), اسقار مۇقانوۆ (ۆيولونچەل), راۋشان بەسكەمبيروۆا (فورتەپيانو) ونەر كورسەتتى.
