جاقىندا كۇرشىم اۋدانىنىڭ قاراتوعاي اۋىلىندا شاعىن ءسۇت زاۋىتى اشىلدى. زاۋىتتىڭ ىسكە قوسىلۋى العاباس پەن سارىولەڭ اۋىلدارىندا ءسۇت قابىلداۋ بەكەتتەرىنىڭ اشىلۋىنا سەبەپ بولىپتى.
– باسقا اۋىل تۇرعىندارىنان ءسۇت قابىلدايتىن ارنايى كولىكتەرىمىز بار. 40 توننالىق توڭازىتقىش جۇمىس ىستەپ تۇر. ەندى تۇرعىندار وزدەرىندە بار ءسۇتتى 80-100 تەڭگەدەن وتكىزىپ, قوسىمشا تابىس تابادى. قازىر ءار سيىردان كۇنىنە 15 ليتر ءسۇت الامىز, ساۋىلعان ءسۇت زاۋىتتا ءوڭدەلەدى, – دەيدى اۋىلدا زاۋىت اشىپ, جەرلەستەرىن جۇمىسپەن قامتۋدى جوسپارلاپ وتىرعان «ارىن» شارۋا قوجالىعىنىڭ باسشىسى باقىتجان بايمۇحامبەتوۆ.
ازىرگە ءسۇت, ايران, ىرىمشىك, قۇرت, كىلەگەي سياقتى 8 ءتۇرلى تاۋار شىعارىپ, تاۋلىگىنە 2 توننا ءسۇت ءوندىرۋدى الدارىنا ماقسات قىلىپ قويعان شارۋا قوجالىعىنىڭ ونىمدەرى جاقىن ارادا اۋدانداعى بالاباقشا, مەكتەپ, اسكەري ءبولىم, اۋرۋحانا سياقتى الەۋمەتتىك نىساندارعا, بارلىق دۇكەن سورەلەرىنە تۇسە باستايدى. ەندى كۇرشىم تۇرعىندارى وسكەمەننەن كەلەتىن باعاسى 400-500 تەڭگە شاماسىنداعى ءسۇت ءونىمدەرىن ەمەس, وزدەرىندە شىعاتىن باعاسى 220-250 تەڭگەلىك ءسۇت ونىمدەرىن ساتىپ الاتىن بولادى.
– ءبىزدىڭ ونىمدەرىمىز تابيعي, ەشقانداي قوسپاسىز, مايلىلىعى – 2,5, 3,2 %. ازىرگە ساتىلىمعا شىققان جوق, قۇجاتتار دايىندالىپ جاتىر, – دەيدى ب.بايمۇحامبەتوۆ.
شارۋا قوجالىعى 2 جىل بۇرىن شۇجىق, بۇقتىرىلعان ەت شىعاراتىن تسەح اشىپتى. مۇندا كۇنىنە 250 كەلى شۇجىق پەن 4800 دانا كونسەرۆى جاسالادى ەكەن. – ەشقانداي قوسپاسىز, تازا ەتتەن جاسايمىز. شۇجىعىمىز حالال. دۇكەندەردە ساۋدالاناتىن تاۋارلارعا قاراعاندا الدەقايدا ارزان. ءبىر كەلىسى 1200 تەڭگە اينالاسىندا. مەملەكەتتىڭ قولداۋىمەن كاسىپورىندى تولىق جاڭعىرتۋعا مۇمكىندىك الدىق. زاماناۋي جاڭا قۇرىلعىلارمەن تولىقتىرىپ, قولدا بار جابدىقتاردى جەتىلدىردىك, – دەيدى اتالعان تسەح جەتەكشىسى ەراسىل بايمۇحامبەتوۆ.
جۋىردا سارىولەڭ اۋىلىنداعى «ءتىرشىلىك» شارۋا قوجالىعىنىڭ يەسى باقىتجان مياسەلەۆ 50 ورىندىق تاۋارلى-ءسۇت فەرماسىن اشىپتى. بىلتىر «سىباعا» باعدارلاماسى ارقىلى 25 ميليون تەڭگە نەسيە الىپ, وعان ءوز قاراجاتىن قوسىپ, رەسەيدەن اسىل تۇقىمدى 42 سيممەنتال سيىرىن ساتىپ اكەلگەن ازامات الداعى ۋاقىتتا ءسۇت وڭدەۋ زاۋىتىن اشقىسى كەلەتىنىن ايتادى.
اۋدان اكىمى دۋلات قاجانوۆتىڭ ايتۋىنشا, كۇرشىم-مارقا وڭىرىندە سوڭعى 30 جىلدا ءسۇت ءوندىرۋ جانە وڭدەۋ ءىسى كەنجەلەپ قالعان كورىنەدى. بۇل جۇمىس قازىر اۋداندا جولعا قويىلىپ, 100 جانە 50 باسقا ارنالعان 3 ءسۇت تاۋارلى فەرماسى جۇمىسىن باستاپ, ەكى ءسۇت قابىلداۋ پۋنكتى اشىلىپتى.
– شيكىزات قاراتوعاي اۋىلىنداعى ءسۇت ءوڭدەۋ زاۋىتىندا وڭدەلەدى. سونداي-اق اۋدانىمىزدا 1000 باسقا ارنالعان اسىل تۇقىمدى مال بورداقىلايتىن 2 كەشەن سالىندى. كەشەن تولىعىمەن اۆتوماتتاندىرىلعان. مالدىڭ جەم-ءشوبىن بەرۋدى قوسا العاندا, ونى سويۋ دا اۆتوماتتى تۇردە جۇرگىزىلمەك. وعان كۇرشىم, قاراتوعاي, اباي اۋىلدارىنىڭ 26 قوجالىق مال باسىن بىرىكتىرەدى. وسى جانە وزگە دە اۋقىمدى شارالار ارقىلى قوسىمشا جۇمىس ورىندارى اشىلۋدا. اۋدانىمىزدى گۇلدەندىرۋ ماقساتىندا ىسكەر ازاماتتارمەن تىزە قوسىپ جۇمىستى ودان ءارى جالعاستىراتىن بولامىز. اۋدان تۇرعىندارىن وزىمىزدە وندىرىلەتىن تابيعي تازا ونىمدەردى تۇتىنۋعا شاقىرامىن. جاقىندا ءوز ءونىمىمىزدى دۇكەن سورەسىنەن كورە الاسىزدار. باعاسى دا سىرتتان كەلەتىن تاۋارلاردان الدەقايدا ارزان, – دەيدى اۋدان اكىمى.
