مەملەكەت باسشىسى قاسىم-جومارت توقاەۆ قازاقستان تۋىن كوكتە جەلبىرەتۋدىڭ ماڭىزى تۋرالى ايتتى.
– قازاقستاننىڭ تۋى جوعارى اۋەلەپ كوتەرىلگەندە جۇرەگىمىزدى تاۋەلسىز ەلىمىزدىڭ بارلىق جەتىستىگىنە دەگەن ماقتانىش سەزىمى باۋراپ الادى. باس قالامىز قالىپتاسقان ساتتەن باستاپ, دامۋدىڭ قازاقستاندىق ۇلگىسىنىڭ ايقىن جەتىستىككە جەتكەنىن كورسەتىپ كەلەدى, – دەدى قاسىم-جومارت توقاەۆ.
مەملەكەت باسشىسى اسكەري وقۋ ورنى تۇلەكتەرىنىڭ الدىندا سويلەگەن سوزىندە قازاقستاننىڭ تۋىن وڭىردە جانە بۇكىل جەر شارىندا قاۋىپسىزدىك پەن تۇراقتىلىقتى قامتاماسىز ەتۋگە باعىتتالعان بەيبىتشىلىك پەن ساليقالى ساياساتتىڭ سيمۆولى رەتىندە بۇكىل الەم بىلەتىنىن ايتتى.
– قازىرگى كۇردەلى جاھاندىق احۋالدا ءبىزدىڭ ەر-ازاماتتارىمىز ءتۇرلى شيەلەنىس وشاقتارىنا بارىپ, بىتىمگەرلىك ميسسياسىن ابىرويمەن اتقارۋدا. بىلىكتى اسكەري قىزمەتكەر ادامگەرشىلىك قۇندىلىقتارىن بيىك ۇستايتىن, تەمىردەي ءتارتىپتى ساقتايتىن, تاباندى ەڭبەك ەتەتىن ادام بولۋى ءتيىس. قازاقستاننىڭ قاۋىپسىزدىگى – سىزدەردىڭ ساپالى جۇمىستارىڭىزعا تىكەلەي بايلانىستى, – دەدى قاسىم-جومارت توقاەۆ.
ءراسىم بارىسىندا جوعارى اسكەري وقۋ ورىندارى مەن اكادەميالاردىڭ 27 ۇزدىك تۇلەگى قازاقستان پرەزيدەنتى – قازاقستان قارۋلى كۇشتەرىنىڭ جوعارعى باس قولباسشىسىنىڭ قولىنان وفيتسەر پوگونىن الدى.
مۇنداي مارتەبەگە قورعانىس مينيسترلىگى قۇرلىق اسكەرلەرى اسكەري ينستيتۋتى, راديوەلەكترونيكا جانە بايلانىس اسكەري-ينجەنەرلىك ينستيتۋتى, ۇلتتىق قاۋىپسىزدىك كوميتەتى شەكارا قىزمەتى اكادەمياسى, ىشكى ىستەر مينيسترلىگىنىڭ الماتى, قاراعاندى, قوستاناي پوليتسيا اكادەميالارى مەن توتەنشە جاعدايلار كوميتەتىنىڭ كوكشەتاۋ تەحنيكالىق ينستيتۋتىنىڭ تاڭداۋلى تۇلەكتەرى يە بولدى.
وسىناۋ سالتاناتتى شارا بارىسىندا يىعىندا سۋ جاڭا جۇلدىزدار جارقىراعان جاس لەيتەنانتتارعا دا ءسوز بەرىلدى.
ىشكى ىستەر مينيسترلىگى قاراعاندى اكادەمياسىنىڭ تۇلەگى, لەيتەنانت ارنايى اتاعىن يەلەنگەن نازگۇل قوجامجاروۆا:
«اسا مارتەبەلى جوعارعى باس قولباسشى مىرزا! ەڭسەلى ەلوردا كۇنىنىڭ الدىندا ءسىزدىڭ قولىڭىزدان وسىناۋ اسكەري شەندى سالتاناتتى تۇردە الۋ مەن ءۇشىن ۇلكەن قۋانىش. بۇگىن ءسىزدىڭ قولىڭىزدان العان وفيتسەر جۇلدىزشاسى بىزگە ۇلتتىق قاۋىپسىزدىكتى ساقتاۋعا, ازاماتتاردىڭ, ارىپتەستەرىمىز بەن وتباسىلارىمىزدىڭ تىنىشتىعىن قورعاۋعا, سونداي-اق ىشكى ىستەر ورگاندارىندا قالىپتاسقان بەرىك ءداستۇردى جالعاپ, قازاقستان وفيتسەرىنىڭ مارتەبەسىن تۇسىرمەۋ جولىندا ۇلكەن جاۋاپكەرشىلىك جۇكتەيدى» دەسە, ۇلتتىق ۇلان اسكەري ينستيتۋتىنىڭ تۇلەگى, لەيتەنانت ارنايى اتاعىنىڭ يەگەرى ابىلاي توقتان:
«مەن ءۇشىن بۇگىنگى كۇن – ەرەكشە قۋانىشتى كۇن. ەلوردامىزدىڭ مەرەكەسىندە سالتاناتتى تۇردە اسكەري شەن الۋ ءاربىر ساربازدىڭ ارمانى دەپ ءبىلەمىن. ەلوردا – قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازارباەۆتىڭ ەگەمەن ەلىمىزدىڭ تاۋەلسىزدىك جولىندا اتقارعان وڭ ىستەرىنىڭ مازمۇنىمەن ورنەكتەلگەن كەستەسى. ەلوردامىز كۇننەن-كۇنگە وزگەرىپ, دامىپ كەلەدى. ءبىز, قازاقستاننىڭ جاس وفيتسەرلەرى جاستار جىلى اياسىندا جوعارى وقۋ ورنىن اياقتاپ, بار كۇش-جىگەرىمىزدى ەگەمەن ەلىمىزدىڭ دامۋىنا جانە اسكەري كۇشتەرىمىزدىڭ قاتارىن نىعايتۋعا جۇمسايمىز دەپ سەندىرەمىز», دەدى.
مۇنان سوڭ جوعارىدا اتالعان وقۋ ورىندارىنىڭ كۋرسانتتارى ساپ تۇزەپ, كوپشىلىك الدىنان كەرنەيلەتىپ ءجۇرىپ ءوتتى.
سوڭىندا ق.توقاەۆ بارلىق قاتىسۋشىلاردى كەلە جاتقان استانا كۇنىمەن قۇتتىقتاپ, قازاقستان حالقىنا بەيبىتشىلىك پەن باق-بەرەكە تىلەدى.
