بايقاۋعا بيىل 66 ۇكىمەتتىك ەمەس ۇيىمنان 91 ءوتىنىش تۇسكەن. جارمەڭكەگە تۇسكەن شاعىن جانە جەرگىلىكتى قوعامداستىق پروبلەمالارىن شەشۋگە باعىتتالعان جوبالار بايقاۋى كادىمگى دۋىلداعان بايگە ىسپەتتەس. كەلۋشىلەر دە, كوميسسيا ءمۇشەلەرى دە جوبالاردا كوتەرىلگەن ماسەلەلەردىڭ وزەكتىلىگىن تارازىعا سالادى. كوتەرىلگەن ماسەلەنىڭ الەۋمەتتىك وزەكتىلىگى وتكىر بولعان سايىن, جەڭىس مارەسى دە جاقىنداي تۇسەدى. ساراپتاۋ كوميسسياسى بيىل شاعىن جوبالاردان 7 اتالىم بويىنشا 7 جۇمىستى تاڭداپ الىپ, ولاردىڭ ارقايسىسىنا 200 مىڭ تەڭگەنىڭ سەرتيفيكاتىن تابىس ەتتى.
جوبا شاعىن بولعانىمەن, ماڭىزدىلىعى جونىنەن سالماعى جەڭىل ەمەس. «ەڭبەك – قوعام نەگىزى» اتالىمى بويىنشا مەڭدىعارا اۋدانىنداعى «ەسكەرتكىش شىراقشىلارى» باستاماشى توبىنىڭ «جۇمىسشى ماماندىقتارىنىڭ مارتەبەسىن كوتەرۋ جانە ەڭبەك اۋلەتتەرىن ناسيحاتتاۋ» جوباسى جەڭىمپاز اتاندى. ماسەلەنىڭ ماڭىزدىلىعىن جوبانىڭ اتى-اق ايتىپ تۇر. سول سياقتى «جەرگىلىكتى ءوزىن ءوزى باسقارۋ جانە جەرگىلىكتى قوعامداستىقتار», «شەكاراسىز الەم», «بۇگىنگى باقىتتى بالالىق – ەرتەڭگى مىقتى قازاقستان», «ادام كاپيتالى – جاڭعىرتۋ نەگىزى», «اقىلدى تەحنولوگيالار», «مىقتى جاستار – مىقتى ەل» اتالىمدارى بويىنشا سەرتيفيكاتقا يە بولعان جوبالاردىڭ بارلىعى دا دەمەۋدى, قارجىلاندىرۋدى قاجەت ەتەتىن وتكىر پروبلەمالاردى ورتاعا سالعان.
الەۋمەتتىك ماسەلەلەردى جەرگىلىكتى قوعامداستىقتارمەن بىرلەسىپ شەشۋدى ماقسات ەتكەن 4 جوبا تاڭداپ الىنىپ, ولاردىڭ ارقايسىسىنا 500 مىڭ تەڭگەنىڭ سەرتيفيكاتى تابىستالدى. سولاردىڭ ءبىرى ۇزىنكول اۋدانىنداعى «ۇزىنكول اۋدانى جاستارى» قوعامدىق بىرلەستىگىنە مۇشە باستاماشى توپ كوتەرگەن «قاناتتى دوپ» جوباسى اۋىلداعى مەكتەپ وقۋشىلارى ءتاربيەسىنە قاجەتتى وتكىر ماسەلەنى قوزعايدى. اۋىل مەكتەبىنىڭ سپورت الاڭى جوق. اۋدان ورتالىعىنداعى №2 ۇزىنكول ورتا مەكتەبىنىڭ 242 وقۋشىسى, 1 اۋلا كلۋبى مەن بالالاردىڭ 4 سپورت سەكتسياسى سپورت الاڭىنا ءزارۋ. وقۋشىلاردىڭ دەنەشىنىقتىرۋ ساباعى كوشەدە وتەدى. ال سپورت الاڭىن سالۋ قارجىعا كەلىپ تىرەلەدى. جەرگىلىكتى اتقارۋ ورگاندارىنا قاراتپاي-اق, مۇنى «ۇزىنكول جاستارى» قوعامدىق بىرلەستىگى وزدەرى شەشۋدى قولعا الىپتى. وسى مەكتەپتەگى دەنەشىنىقتىرۋ ءپانىنىڭ مۇعالىمى الماس وسپانوۆ جوباسىن الەۋمەتتىك باستامالار مەن جوبالار ءجارمەڭكەسىنە ۇسىنىپ كورۋگە تاۋەكەل ەتتى. ول ۇتقان قارجىعا باستاپقى قۇرىلىس ماتەريالدارىن السا, قالعان جۇمىسقا اۋدانداعى شارۋا قوجالىقتارى كومەك بەرۋگە ۋادە ەتتى. ا.وسپانوۆتىڭ جولى بولدى, جارمەڭكەدە 500 مىڭ تەڭگەنىڭ سەرتيفيكاتىن ۇتتى.
– جەتى شارۋاشىلىق كومەك بەرەمىز دەپ وتىر. ءالى قيىرشىق تاس, جۇمىس كۇشى, تەحنيكالار كەرەك. وعان كومەك بەرەتىندەر بار. الداعى وقۋ جىلى مەكتەپتىڭ ءوزىنىڭ سپورت الاڭى بولادى, – دەيدى ا.وسپانوۆ.
جارمەڭكەگە تەك الەۋمەتتىك باستامالار عانا ەمەس, بيزنەس-قوعامداستىقتار دا قاتىستى. وندا «ميلح» ءسۇت زاۋىتى قوستاناي قالاسىنداعى «ەكوپاترۋل» باستاماشى توبىنىڭ «گۇلدەنە بەر, تۋعان جەرىم!» جوباسىن 200 مىڭ تەڭگەمەن قارجىلاندىردى. سونىمەن قاتار بيىل قوستاناي وبلىسى بويىنشا «گرين» ازاماتتىق اليانسى» قوعامدىق قورى اۋىلداعى ۇكىمەتتىك ەمەس ۇيىمدار الەۋەتىن كۇشەيتۋ ماقساتىندا 8 جوبانى قارجىلاندىرىپ, ولاردىڭ ارقايسىسىنا 500 مىڭ تەڭگەنىڭ سەرتيفيكاتىن تاپسىردى.
– جارمەڭكە باستاماشى توپتاردىڭ ۇكىمەتتىك ەمەس ۇيىمدار دەڭگەيىنە دەيىن ءوسۋىنە مۇمكىندىك بەرەدى. ونىڭ قالالار مەن اۋدانداردا جاقسى مىسالدارى كوپ. باستاماشى توپ جارمەڭكەگە قاتىسقان سايىن وزدەرىنىڭ پىكىرلەستەرىن تابادى, قوعامداستىققا ءبىرىگەدى. اۋتيزممەن اۋىراتىن بالالار مەن ءمۇگەدەك بالالار انالارى ءبىرىگىپ, جارمەڭكەگە وتە وزەكتى ماسەلەلەر جوبالارىن ۇسىنىپ وتىردى. ولار جارمەڭكەدەن ۇتقان قارجى ارقىلى كابينەتتەر اشتى, ونى قۇرالدارمەن جابدىقتادى, سولاي ءوز اياعىنان تۇرىپ كەتتى, – دەيدى وبلىس بويىنشا «گرين» ازاماتتىق اليانسى» قوعامدىق قورىنىڭ ءتورايىمى دينارا وتەباەۆا.
الەۋمەتتىك باستامالار مەن جوبالار جارمەڭكەسى ارقىلى يگىلىكتى ىستەردىڭ جۇزەگە اسىپ جاتقانىن جەڭىمپازدارعا وبلىس اكىمى اتىنان سەرتيفيكاتتار تاپسىرعان وبلىس اكىمىنىڭ ورىنباسارى مارات جۇندىباەۆ تا جالعاستىردى.
– قوعامداعى الەۋمەتتىك ماسەلەلەردى شەشۋدە ۇكىمەتتىك ەمەس ۇيىمداردىڭ ماڭىزى ارتا ءتۇستى. ءتورت-بەس جىلدا بۇل ىسكە بيزنەس قوعامداستىقتاردىڭ بەلسەندىلىگى ارتىپ كەلەدى. سوڭعى ءجارمەڭكەدەگى جوبالارعا ون بيزنەس ۇيىمى قاتىسىپ, الەۋمەتتىك ماسەلەلەردىڭ شەشىمىن تابۋىنا قولداۋ ءبىلدىردى, – دەدى مارات قونىسباي ۇلى. بيىل 516 ميلليون تەڭگەگە 312 جوبا ءجۇزەگە اسادى. جوبالاردى قارجىلاندىرۋ وسىدان ءۇش جىل بۇرىنعى ۋاقىتقا قاراعاندا ءۇش ەسە كوبەيدى. ازاماتتىق قوعامنىڭ دامۋى وسىلاي ىستەن كورىنە باستادى.
قوستاناي
