ۇكىمەت باسشىسى كوپپاتەرلى جانە جەكەمەنشىك ۇيلەر ورنالاسقان «كوكتەم-1» جانە «كوكتەم-2» تۇرعىن ءۇي الاپتارىنا باردى, زالال كەلگەن جەرگىلىكتى مەكتەپ, قالالىق اۋرۋحانا مەن حالىققا قىزمەت كورسەتۋ عيماراتتارىن كوردى.
توتەنشە جاعداي سالدارىن جويۋعا تىكەلەي اتسالىسقان جەرگىلىكتى اقساقالدارمەن جانە ماماندارمەن اڭگىمەلەستى. ولاردىڭ قاتارىندا ساپەرلەر, مەديتسينا قىزمەتكەرلەرى, قۇتقارۋشىلار جانە جەرگىلىكتى بيلىك ورگاندارى وكىلدەرى بار. پرەمەر ولارعا العىس ايتىپ, «بىرلەسكەن ۇيلەسىمدى جۇمىستىڭ ارقاسىندا تۇرعىنداردى ۋاقتىلى ەۆاكۋاتسيالاپ, تۋىنداعان توتەنشە جاعدايدىڭ اۋقىمدىراق سالدارىنىڭ الدىن الۋ ءمۇمكىن بولعانىن» اتاپ ايتتى.
ا.مامين ارىس قالاسىندا توتەنشە جاعدايلار سالدارىن جويۋ جونىندەگى ۇكىمەتتىك كوميسسيا وتىرىسىن وتكىزدى. كوميسسيا قۇرامىنا مينيسترلىكتەر مەن وبلىستىق اكىمدىكتەردىڭ باسشىلارى كىردى.
اعىمداعى جاعداي مەن توتەنشە جاعداي سالدارىن جويۋ بويىنشا قابىلدانىپ جاتقان شارالار تۋرالى قورعانىس ءمينيسترى ن.ەرمەكباەۆ, ىشكى ىستەر مينيسترى ە.تۇرعىمباەۆ, دەنساۋلىق ساقتاۋ ءمينيسترى ە.ءبىرتانوۆ, ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ, ءبىلىم جانە عىلىم مينيسترى ا.ايماعامبەتوۆ, ەكولوگيا, گەولوگيا جانە تابيعي رەسۋرستار ءمينيسترى م.مىرزاعاليەۆ, تۇركىستان وبلىسىنىڭ اكىمى ءو.شوكەەۆ, پاۆلودار وبلىسىنىڭ اكىمى ب.باقاۋوۆ باياندادى.
پرەمەر-مينيستر ا.مامينگە قازىرگى ۋاقىتتا قالا اۋماعىن ينجەنەرلىك بارلاۋ, مينادان تازالاۋ بويىنشا جۇمىستار جالعاسىپ جاتقانى, ازاماتتاردى ءوز ۇيلەرىنە قايتارۋ ءجانە ولاردىڭ مال-مۇلكىنىڭ قورعالۋىن قامتاماسىز ەتۋ بويىنشا شارالار قابىلدانىپ جاتقانى تۋرالى باياندالدى. اۋماقتارعا جۇرگىزىلگەن تەكسەرۋلەر ەكولوگيالىق جاعدايعا قاۋىپ ءتونىپ تۇرماعانىن كورسەتتى.
– وزدەرىڭىز بىلەتىندەي, ەلباسى مەن مەملەكەت باسشىسى قالانى جەدەل قالپىنا كەلتىرۋدى تاپسىرعان بولاتىن. بىزگە ارىس قالاسىن شۇعىل قالپىنا كەلتىرۋ بويىنشا بارلىق كۇش-جىگەردى جۇمىلدىرۋ قاجەت. ءبىز ارىس قالاسىنداعى بارلىق زاقىمدانعان جانە بۇزىلعان نىسانداردى 2019 جىلدىڭ 1 تامىزىنا دەيىن جوندەپ, سالۋىمىز كەرەك. بارلىق مىندەتتەر وڭتايلى, ساپالى ءارى ۋاقتىلى ورىندالۋى كەرەك», – دەدى پرەمەر-مينيستر.
كەڭەس قورىتىندىسى بويىنشا ۇكىمەت باسشىسى ا.مامين قالانىڭ ءتىرشىلىگىن قالىپقا كەلتىرۋ ءجانە ونىڭ الەۋمەتتىك-ەكونوميكالىق دامۋىن قامتاماسىز ەتۋ ءۇشىن 10 كەشەندى شارانى اتاپ ايتتى.
1. ءبىر اي ىشىندە قالاداعى بارلىق تۇرعىن ۇيلەردى ءجوندەۋ.
2. قوسىمشا الەۋمەتتىك قولداۋ شارالارى رەتىندە قالانىڭ ءاربىر تۇرعىنىنا (44 781 ادام) 100 مىڭ تەڭگە كولەمىندە ءبىر رەتتىك وتەماقى تولەۋ.
3. ارىس قالاسىنان 4 مىڭ بالانى ساۋىقتىرۋ لاگەرلەرىنە جىبەرۋ.
4. الەۋمەتتىك نىسانداردى جوندەۋدى ۇلتتىق كومپانيالاردىڭ كومەگىمەن ىسكە اسىرۋ كوزدەلگەن. سونداي-اق قۇرىلىس جۇمىستارىنا ءىرى ونەركاسىپتىك كاسىپورىندار مەن بيزنەس قاۋىمداستىق تارتىلاتىن بولادى. 66 الەۋمەتتىك نىساندى «سامۇرىق-قازىنا» ۇاق» جوندەيدى.
5. بيزنەستىڭ الەۋمەتتىك جاۋاپكەرشىلىگى اياسىندا 300-دەن استام شوب كاسىپورنىنا «اتامەكەن» ۇكپ ارقىلى ءىرى بيزنەس قاراجاتى ەسەبىنەن قالپىنا كەلتىرۋ جانە جوندەۋ جۇمىستارىندا كومەك كورسەتىلەدى.
6. قالا كاسىپكەرلەرىنە بيىلعى 1 شىلدەدەن باستاپ 5 ملن تەڭگەگە دەيىن جەڭىلدىكپەن نەسيە بەرىلەدى. جىل سوڭىنا دەيىن سالىقتىق كانيكۋلدار ۇسىنىلادى.
7. ينجەنەرلىك ينفراقۇرىلىم, ەلەكترمەن جابدىقتاۋ جانە بايلانىس ۇكىمەت قورىنىڭ قاراجاتى ەسەبىنەن قالپىنا كەلتىرىلەدى.
8. گاز جانە سۋمەن جابدىقتاۋ جۇيەلەرىن جاڭعىرتۋ جانە قايتا جوندەۋ جوسپارلانعان.
9. مەديتسينالىق قىزمەت كورسەتۋ ساپاسىن ارتتىرۋ ماقساتىندا قالا تۇرعىندارىنا ارنالعان اۋرۋحانا مەن ەكى ەمحانا سالىنادى.
10. 2 اپتا بويى قارۋ-جاراقتار اكەتىلە باستايدى. ارسەنال قايتا ورنالاستىرىلادى.
الدىن الا باعالاۋلار بويىنشا, قالادا 104 كوپقاباتتى تۇرعىن ءۇي, 7 200-گە جۋىق جەكەمەنشىك ءۇي, 14 مەكتەپ, 2 اۋرۋحانا, 28 بالاباقشا, اۋماقتىق مەملەكەتتىك ورگاندار عيماراتتارى زارداپ شەككەن.
