كۇن تارتىبىندەگى جالعىز ماسەلە – ءتورتىنشى سەسسيانىڭ جۇمىسىن ۇزارتۋعا بايلانىستى ۇكىمەت باسشىسى اسقار مامينگە ءسوز بەرىلدى.
– مەملەكەت باسشىسى قاسىم-جومارت توقاەۆ ساباقتاستىق نەگىزىندە ەلباسى نۇرسۇلتان نازارباەۆتىڭ الەۋمەتتىك ستراتەگياسىن جالعاستىرىپ, حالىقتىڭ وزەكتى ءماسەلەلەرىن شەشۋگە باعىتتالعان ىرگەلى شارالاردى قابىلداۋدا. پرەزيدەنت الەۋمەتتىك تۇرعىدا از قامتىلعان ازاماتتاردىڭ بورىش جۇكتەمەسىن ازايتۋ شارالارى تۋرالى جارلىققا قول قويدى. وسى قابىلدانعان شەشىمنىڭ ارقاسىندا الەۋمەتتىك تۇرمىسى تومەن ازاماتتارعا كومەك كورسەتىلەدى. مەملەكەت باسشىسىنىڭ تاپسىرماسى بويىنشا ۇكىمەت حالىقتىڭ ەڭ وزەكتى الەۋمەتتىك ماسەلەلەرىن شۇعىل ءتۇردە شەشۋگە ارنالعان جانە حالىقتىڭ ءال-اۋقاتىن ارتتىرۋ ماقساتىندا جەدەل شارالار توپتاماسىن ازىرلەدى, – دەدى ا.مامين.
ۇكىمەت باسشىسىنىڭ ايتۋىنا قاراعاندا, وسى شارالاردىڭ ىسكە اسۋى ناتيجەسىندە اعىمداعى جىلدىڭ اياعىنا دەيىن جۇمىسسىز 300 مىڭنان استام ادام «باستاۋ بيزنەس» جانە «جاس كاسىپكەر» باعدارلامالارى بويىنشا كاسىپتىك ءبىلىم بەرۋ ارقىلى جۇمىسقا ورنالاستىرۋ شارالارىمەن قامتىلادى. سونىمەن قاتار جەكە كاسىپكەرلىكتى ۇزاق مەرزىمدى نەسيەلەر جانە گرانتتار ۇسىنۋ ارقىلى دامىتۋ شارالارى, از قامتىلعان وتباسىلارعا جالدامالى باسپانا قۇرىلىسى كولەمىن ەكى ەسە ءوسىرۋ, جۇمىس ىستەيتىن جاستارعا جالدامالى ءۇيدىڭ قۇرىلىسىن ءۇش ەسەگە ارتتىرۋ شارالارى قولعا الىنادى.
سونداي-اق از قامتىلعان وتباسىلاردىڭ بالالارىنا كەشەندى الەۋمەتتىك قولداۋ شارالارى ۇيىمداستىرىلادى. سونىڭ ىشىندە بيىل 5 مىڭ ءبىلىم گرانتى ءبولىنىپ, تەگىن جول ءجۇرۋ, مەكتەپتەر قاجەت زاتتارمەن قامتاماسىز ەتىلەدى.
– وسى ماڭىزدى ۇلكەن شارالاردى ىسكە اسىرۋ ءۇشىن 2019-2021 جىلدارعا ارنالعان رەسپۋبليكالىق بيۋدجەت تۋرالى زاڭعا وزگەرىستەر ەنگىزۋ قاجەت. وسىعان بايلانىستى بيۋدجەتكە ەنگىزىلەتىن وزگەرىستەردى قاراستىرۋ ءۇشىن پارلامەنت سەسسياسىنىڭ جۇمىس مەرزىمىن ۇزارتۋ ماسەلەسىن قاراستىرۋدى سۇرايمىن. وسى رەتتە الداعى ۋاقىتتا پارلامەنت پەن ۇكىمەت اتالعان الەۋمەتتىك ماڭىزى ۇلكەن شارالاردى قابىلداۋدا بەلسەندى جۇمىس اتقاراتىنىنا سەنەمىن, – دەدى ۇكىمەت باسشىسى.
اتالعان ۇسىنىس نەگىزىندە ءماجىلىس توراعاسى نۇرلان نىعماتۋلين التىنشى سايلانعان پارلامەنتتىڭ ءتورتىنشى سەسسياسىن 5 شىلدەگە دەيىن ۇزارتۋ مۇمكىندىگى بار ەكەنىن جەتكىزدى.
– مەملەكەت باسشىسى العا قويعان مىندەتتەردى جۇزەگە اسىرۋ ءۇشىن قوس پالاتا دەپۋتاتتارى وسى بيۋدجەت جوباسىن جان-جاقتى تالقىلاپ, قابىلداۋىمىز قاجەت. وسىعان بايلانىستى سەناتتاعى ارىپتەستەرىمىزبەن اقىلداستىق, پارلامەنت سەسسياسى جۇمىسىنىڭ مەرزىمىن ۇزارتۋدى قاراستىردىق. مۇنداي مۇمكىندىك بار. وسى جەردە ايتا كەتۋ كەرەك, كونستيتۋتسيامىزدىڭ 59-بابىنىڭ 3-تارماعىندا پارلامەنتتىڭ كەزەكتى سەسسياسى قىركۇيەكتىڭ ءبىرىنشى جۇمىس كۇنىنەن ماۋسىمنىڭ سوڭعى جۇمىس كۇنىنە دەيىن وتكىزىلەدى دەپ بەلگىلەنگەن. سونىمەن بىرگە كونستيتۋتسيالىق كەڭەستىڭ كونستيتۋتسيا نورماسىنا بەرگەن رەسمي تۇسىندىرمەسىن نەگىزگە الا وتىرىپ, التىنشى سايلانعان پارلامەنتتىڭ ءتورتىنشى سەسسياسىن 2019 جىلعى 5 شىلدەگە دەيىن ۇزارتۋدى ۇسىنامىن, – دەدى ن.نىعماتۋلين.
اتالعان ماسەلە دەپۋتاتتار تاراپىنان تولىق قولداۋ تاۋىپ, سەسسيا جۇمىسى ۇزارتىلاتىن بولىپ شەشىلدى.
