رۇقسات ەتىلگەن ميتينگ نەگىزىنەن ەلدىڭ بىرلىگىنە, قوعامدا ورىن الىپ جاتقان ماسەلەلەرگە ارنالعان. سونىمەن قاتار, وندا ءسوز سويلەگەندەر نەگىزىنەن قوعامنىڭ كوڭىلىن سىرتتان كەلىپ جاتقان ءتۇرلى يدەيالارعا سەنبەي, ەلدىڭ تۇتاستىعىنا, مەملەكەت تاراپىنان قابىلدانىپ جاتقان الەۋمەتتىك باعدارلامالاردى قولداۋعا شاقىردى. ماسەلەن, پارلامەنت ءماجىلىسىنىڭ دەپۋتاتى بەكبولات تىلەۋحان xالىقتى ارانداتۋشىلىققا ەرمەۋگە شاقىردى.
«تاۋەلسىزدىك جىلدارىندا جەتىستىكتەر از ەمەس. قاي ەل كەيىنگى 20-30 جىلدا استانا سالىپتى, قاي ەل ءوزىنىڭ قانداستارىن سىرتتان الدىرىپتى؟ بۇگىندە بىرنەشە ەلدەن باۋىرلارىمىز قونىس اۋداردى. قاراپ وتىرساق, قانشاما جەتىستىكتەر بار. وسىنىڭ بارلىعىنان ايىرىلىپ قالۋ قانداي ازاپ, قاسىرەت ەكەنىن بىلەسىزدەر مە؟ ءبىزدى تاريحى 2-3 عاسىرعا سوزىلعان ەۋروپا ەلدەرىمەن سالىستىرىپ جاتادى. ونى قالاي سالىستىراسىز, كەشە عانا بۇعاۋدان شىقتىق. ەندى ەسىمىزدى جيىپ كەلە جاتقاندا بىزگە سابىر مەن شۇكىرشىلىك كەرەك», دەدى ب. تىلەۋحان
ءوز كەزەگىندە بەلگىلى مەملەكەت جانە قوعام قايراتكەرى ورازكۇل اسانعازى وتباسىلىق قۇندىلىق ماسەلەلەرىنە توقتالدى.
«اركىم ءوز وتباسىنا يە بولۋى كەرەك. ەر ازامات - العان ايەلىڭدى, پەرزەنتىڭدى جىلاتپا! ايەلدەردى كوشەگە شىعارىپ قويىپ, جىگىتتەردىڭ ۇيدە وتىرعانى جاراسپايدى. وتباسىنىڭ جاۋاپكەرشىلىگى ەر ازاماتتا. مۇنىمەن قوسا, ايەلدەر قاۋىمى ەر ازاماتتارىمىزدى باعالاۋدى ۇپىتپايىق», دەدى و. اسانعازى.
سونىمەن قاتار, ءماجىلىس دەپۋتاتى باقىتبەك سماعۇل پرەزيدەنت قاسىم-جومارت توقاەۆ ءاربىر قازاقستاندىقتىڭ مۇددەسى ءۇشىن جۇمىس ىستەۋگە, ۇلتتىق مۇددەنى قورعاۋعا ۋادە ەتكەنىن ايتا كەلە: «بارلىقتارىڭىزدى پروبلەمالاردى بىرگە شەشۋگە, جاقسىلىققا سەنۋدى, ارسىزدار مەن ارانداتۋشىلىققا ەرمەۋدى, نامىستى قولدان بەرمەۋدى, بيىككە عانا ورلەۋدى ماقسات تۇتساق دەپ بارشا قازاقستاندىقتاردى شاقىرامىن. قازاقستان ءبىزدىڭ ورتاق جەرىمىز! ال ءبىزدىڭ جەرىمىزدە ارقاشان دا بەيبىتشىلىك پەن تۇراقتىلىق قاجەت», دەدى.
