مادەنيەت جانە سپورت مينيسترلىگىنىڭ ءتىل ساياساتى كوميتەتى جانە «شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى» كوممەرتسيالىق ەمەس اكتسيونەرلىك قوعامى ۇيىمداستىرعان ءداستۇرلى بايقاۋعا بيىل 120 اۆتوردان 250-گە جۋىق ماتەريال قابىلدانعان. ءتورت اتالىم بويىنشا سىنعا تۇسكەن ايتۋلى دودادا بارشا ءارىپتەسىمىز انا ءتىلىمىزدىڭ بۇگىنى مەن بولاشاعى, ەرتەڭى حاقىندا ۇلكەن ماسەلەلەردى قوزعاپ, قالامدى تەرەڭنەن تەربەدى.
يگى شارانىڭ شىمىلدىعىن اشقان مادەنيەت جانە سپورت ءمينيسترى اقتوتى راحمەتوللاقىزى ءوز كەزەگىندە بۇگىندە اقپارات اعىنى تاسقىنداپ تۇرعان اسا جاۋاپتى كەزەڭدە ەلىمىزدىڭ ايناسى بولىپ تابىلاتىن جۋرناليستەر قاۋىمىنىڭ ورنى ەرەكشە ەكەنىن اتاپ ءوتتى.
– كەز كەلگەن اقپارات ەڭ الدىمەن ۇلت مۇددەسىنە, ۇرپاق بولاشاعىنا, مەملەكەتىمىزدىڭ قاۋىپسىزدىگىنە تىكەلەي ىقپال ەتەدى. ءتورتىنشى بيلىك وكىلدەرىن وسى تۇرعىدا ەلىمىزدى اقپارات كەڭىستىگىندە ۇنەمى قولداپ كەلە جاتقانى ءۇشىن العىس بىلدىرەمىز. الدا دا بىزبەن بىرگە اۋقىمدى, كۇردەلى ماسەلەلەردە بىرىگىپ جۇمىس ىستەۋگە شاقىرامىز», –دەدى مينيستر.
بايقاۋعا ۇسىنىلعان ماتەريالداردى ەلىمىزگە بەلگىلى جۋرناليستەردەن قۇرالعان ارناي كوميسسيا قاراپ, باعالاعان. بايقاۋ قورىتىندىسى بويىنشا «ۇزدىك ماقالا» اتالىمىنىڭ ءبىرىنشى ورنى «وگني الاتاۋ» گازەتىنىڭ باس رەداكتورى اتساليم يديگوۆقا بەرىلسە, «ۇزدىك راديوباعدارلاما» اتالىمى بويىنشا ءبىرىنشى ورىندى «شالقار» راديوسىنان ارىپتەسىمىز گۇلبانۋ مۇحتارقۇلوۆا يەلەندى.
ال, «ۇزدىك تەلەباعدارلاما» اتالىمى بويىنشا ءبىرىنشى ورىن «Qazaqstan» ۇلتتىق ارناسىنىڭ ءجۋرناليسى نارتاي سارسەنعاليەۆقا بۇيىرسا, «ۇزدىك سايت ماقالاسى» اتالىمى بويىنشا ءبىرىنشى ورىنعا «Qamshy.kz» پورتالىنىڭ ءجۋرناليسى بەرىك بەيسەن ۇلى لايىق دەپ تانىلدى.
ەڭ نەگىزگى جۇلدە, ياعني «مەملەكەتتىك ءتىل جانە باق» بايقاۋىنىڭ باس جۇلدەسى ءوزىمىزدىڭ «Egemen Qazaqstan» گازەتىنىڭ شولۋشىسى قالام ۇستاعان كۇننەن ۇلتىمىزدىڭ جوعىن جوقتاپ, قازاق ءتىلىنىڭ قامىن جەپ كەلە جاتقان بەكەن قايرات ۇلىنا بۇيىردى. ارىپتەسىمىز ءوزى دە ايتىپ وتكەندەي, بايگە دەگەن ءبىر ادامنىڭ عانا ەمەس, بۇكىل ۇجىمنىڭ ەڭبەگىمەن كەلەدى. باس جۇلدە يەگەرىنە دەگەن بۇل قوشەمەت – باس باسىلىمنىڭ عاسىر تويىنا بەرىلگەن بايعازى دەپ بىلەتىنىن جەتكىزدى.
ايتا كەتكەن ءجون, جۇلدەگەرلەرىمىز ءار اتالىم بويىنشا ءبىرىنشى ورىن يەگەرلەرى 500 مىڭ تەڭگەدەن, ال باس جۇلدە يەگەرى 1 ملن تەڭگە كولەمىندە سىياقىعا يە بولدى.
سونداي-اق شارا بارىسىندا 2019 جىلعى مادەنيەت, سپورت, تۋريزم, ءتىل سالالارىن بۇقارالىق اقپارات قۇرالدارىندا جان-جاقتى ناسيحاتتاۋعا ۇلەس قوسقان جۋرناليستەرگە مادەنيەت جانە سپورت ءمينيسترى ا.رايىمقۇلوۆانىڭ العىس حاتى تابىستالدى. بۇل توپتىڭ ىشىندە دە ەگەمەندىك ءتىلشى, اقىندارىمىزشا ايتساق «قالامى قازدىڭ قاڭقىلىنان قايماق جالاتاتىن» قارىمدى جۋرناليست نازەركە جۇمابايدىڭ اتى اتالىپ, ماراپات بيىگىنەن تابىلدى.
جالپى جۋرناليستەردىڭ كاسىبي مەرەكەسى قارساڭىنداعى بيىلعى بايگەلەر باس باسىلىمعا باس بارماعىمەن باعا بەرىپ جاتقانداي اسەرگە بولەۋدە ءبىزدى. جوعارىداعى جاقسى جاڭالىقتارىمىزدى ەسەلەپ, تۋرا سول كۇنى قازاقستان جۋرناليستەر وداعىنىڭ سىيلىعىنا تاعى ءبىر ءارىپتەسىمىز, اتاپ ايتساق گازەتتىڭ ماڭعىستاۋداعى مەنشىكتى ءتىلشىسى گۇلايىم شىنتەمىرقىزى دا يە بولدى.
وداق جۇلدەسى 10 جۋرناليسكە بەرىلگەن. ارىپتەسىمىز «ەكونوميكالىق شولۋ» اتالىمى بويىنشا ماراپاتتالىپ وتىر.
مۇنداي ماراپاتتار قالامعا شابىت, قادامعا قارقىن ەسەلەيدى. قۇتتى بولسىن دەمەكپىز!
