اقتوبە وبلىسىندا ۇلتتىق بىرىڭعاي تەست تاپسىرۋ سوڭعى ەكى كۇننەن بەرى ءوتىپ جاتىر. بۇعان دەيىن اۋدان ورتالىقتارىندا باستالسا, بۇگىن قالادا باستاۋ الادى. ول ءۇشىن ءوڭىر ورتالىعىندا ءۇش ارنايى ورتالىق جاساقتالعان. سونىڭ ءبىرى – ءبىز تۇرعان №8 ورتا مەكتەپ.
وسىدان ءبىر ساعات بۇرىن مۇندا ءبىلىم جانە عىلىم مينيسترلىگىنىڭ وكىلدەرى كەلدى. ولار تەست تاپسىرۋ بارىسىن سوڭىنا دەيىن قاداعالايتىن بولادى. ودان بولەك بەس ادامنان قۇرالعان مەملەكەتتىك كوميسسيانىڭ مۇشەلەرى بار. ولاردىڭ دا اتقاراتىن جاۋاپكەرشىلىگى زور. بارلىعى دا ءتيىستى ورىندارىنا جايعاستى. بۇگىن بۇل ورتالىقتا 340 تالاپكەر ۇلتتىق بىرىڭعاي تەست تاپسىرادى. قازىردەن باستاپ مەكتەپ تۇلەكتەرىن اۋديتورياعا كىرگىزۋ باستالدى. ارينە, بارلىعى دا بۇل سىناقتىڭ وتە ماڭىزدى جانە جاۋاپكەرشىلىككە تولى ەكەنىن تۇسىنەدى.
جالپى, اقتوبەنىڭ وزىندە 2425 مەكتەپ تۇلەگى ۇلتتىق بىرىڭعاي تەست تاپسىراتىن بولادى. ولاردىڭ 159-ى «التىن بەلگى» جانە جۇزگە جۋىعى ۇزدىك اتتەستات يەگەرى. اۋديتوريالارعا بەينەباقىلاۋ كامەرالارى ورناتىلىپ, قاۋىپسىزدىك شارالارى قاتاڭ باقىلاۋدا. ال تالاپكەرلەردىڭ سىناق تاپسىرۋ ءساتىن ولاردىڭ اتا-انالارى ونلاين رەجيمىندە كورۋ مۇمكىندىگى يە.
ال وبلىس بويىنشا تالاپكەرلەردىڭ ۇبت تاپسىرۋى ماۋسىمنىڭ سوڭعى كۇنىنە دەيىن جالعاسادى. جاڭا فورمات بويىنشا تەست سىناقتارى جىل باسىنان بەرى ەكى رەت ءوتتى. بىراق مەملەكەتتىك گرانت يەسى اتانۋ ءۇشىن وسى جولعىسى ماڭىزدى.
ايتا كەتۋ كەرەك, جالپىلاي العاندا, وبلىستا 5178 تالاپكەر تەست تاپسىرادى. تامىز ايىندا وتەتىن تاعى ءبىر سىناق جوعارى وقۋ ورىندارىنىڭ اقىلى بولىمىنە تۇسۋگە مۇمكىندىك بەرۋى ءتيىس.
