نۇرسۇلتان نازارباەۆ ەلورداداعى وقۋشىلار سارايىندا قازاقستان رەسپۋبليكاسىنىڭ پرەزيدەنتىن سايلاۋ راسىمىنە قاتىسىپ, داۋىس بەردى.
ەلباسى بۇقارالىق اقپارات قۇرالدارىنىڭ وكىلدەرى الدىندا سويلەگەن سوزىندە قازاقستان حالقىنىڭ وسى تاريحي سايلاۋ ارقىلى ەل بولاشاعىن ايقىندايتىنىن ايتتى.
– بۇگىن ازاماتتارىمىز سايلاۋعا قاتىسىپ, داۋىس بەرىپ جاتىر. سايلاۋ ناۋقانى بارلىق ەلدە جانە ءاردايىم حالىق ءۇشىن تاريحي ءسات سانالادى. ازاماتتار ەل پرەزيدەنتىن عانا ەمەس, سونىمەن قاتار ءوز بولاشاعى مەن تاعدىرىن تاڭدايدى, – دەدى نۇرسۇلتان نازارباەۆ.
ەلباسى, سونداي-اق, بيىلعى پرەزيدەنت سايلاۋىنىڭ ەرەكشەلىگىنە توقتالدى.
– بيىلعى سايلاۋدىڭ ەرەكشەلىگىن بىلەسىزدەر. مەن پرەزيدەنتتىك وكىلەتتىگىمدى توقتاتىپ, جاستارعا جول بەردىم. بۇل – دۇرىس شەشىم. توڭىرەگىمىز تۇگەل دامىپ كەلەدى. قازاقستاندى جاڭا بەلەسكە باستاۋ ءۇشىن ەل باسشىلىعىنا وزىق ويلى جاڭا بۋىن كەلۋى كەرەك. پرەزيدەنتتىك وكىلەتتىگىمدى توقتاتۋ جونىندەگى شەشىمىم بۇكىل الەمدە تۇسىنىستىكپەن قابىلداندى. مەن كوپتەگەن ەلدىڭ كوشباسشىلارىنان حات الدىم. ولار قازاقستاندا بيلىكتى بەرۋ پروتسەسىنىڭ بەيبىت جاعدايدا ءوتىپ جاتقانىن جوعارى باعالاۋدا, – دەدى قازاقستاننىڭ تۇڭعىش پرەزيدەنتى.
سوڭىندا نۇرسۇلتان نازارباەۆ بارشا قازاقستاندىقتارعا اماندىق, ەلىمىزگە تىنىشتىق پەن باق-بەرەكە تىلەدى.
