– رەسپۋبليكالىق سايىس قاشىقتىق ارقىلى وتكىزىلدى, – دەيدى ەليزاۆەتا. – ءبىر وكىنىشتىسى, جالعىز بالىم جەتپەي قالدى. بىراق ودان ۇنجىرعام ءتۇسكەن جوق, قايتا ءالى دە كەم ءتۇسىپ جاتقان ولقىلىعىمدى وي ەلەگىنەن وتكىزىپ, ءتىل ۇستارتۋ جۇمىستارىن ۇدەتە ءتۇستىم. ماعان قازاق ءتىلى وتە ۇنايدى. ءبىز ۇيدە التى بالامىز, قازاق تىلىندە سويلەيتىن مەن عانا. ءتىپتى اكە-شەشەم دە ءبىلە قويمايدى. ال مەن بولسام ءبىرىنشى سىنىپتان باستاپ ءتىل ۇيرەنۋگە ۇمتىلدىم. قازىر نەگە ەكەنىن دە ءتۇسىندىرىپ بەرە الماس ەدىم. ايتەۋىر ىنتا-ىقىلاسىم زور.
تىلگە قۇمار قىزدىڭ ءتىرشىلىكتەگى ماقسات-مۇراتى دا كىسى قىزىعارلىق. ورتا مەكتەپتى اياقتاعان سوڭ كوكشەتاۋ قالاسىنداعى شوقان ءۋاليحانوۆ اتىنداعى مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە تۇسپەك. ءسويتىپ قازاق ءتىلى مەن ادەبيەتىنىڭ مامانى بولىپ شىقسام دەيدى. ادەبيەت تۋرالى اڭگىمە ءوز الدىنا, ۇلى ابايدىڭ «ەسكەندىر», «ماسعۇت», «ءازىمنىڭ اڭگىمەلەرى» پوەمالارىن جاتقا وقيتىن جاس قىز ءوز ولەڭدەرىن وقىپ بەردى. بالاۋسا سەزىم, ءمولدىر مۇڭ. تابيعات, كەيبىر قۇربىلارى جايىنداعى تىرناقالدى تۋىندىلارى. ال قازاق پوەزياسىنىڭ كورنەكتى وكىلدەرىنىڭ كوپتەگەن ولەڭ-جىرلارىن جاتقا وقيدى ەكەن. وقىعاندا دا ەشبىر اكتسەنتسىز, كادىمگى قالىڭ قازاقتىڭ ىشىندە وسكەن قازاق بالاسى ءتارىزدى. ءتىپتى تىلىندە ءبىر ءمۇكىس جوق.
قازاق تىلىنەن ۇستازى انار قوجاحمەتوۆا ساباق بەرەدى. تىلگە دەگەن ماحابباتىن وياتقان, قۇشتارلىعىن ارتتىرعان دا وسى ۇستازى. ارينە, بۇل جەردە ءوزىنىڭ ىنتا-ىقىلاسى دا ايتارلىقتاي ءرول اتقارعانى كۇمانسىز. قالاي بولعان كۇندە دە, قازاق تىلىندە جاتىق, ۇعىنىقتى سويلەپ تۇرعان جاس قىزدىڭ تالابى تاس جارعانداي.
– قۇربىلارىمنىڭ كوبى قازاقتىڭ قىزدارى. سولارمەن كوبىرەك سويلەسىپ, ءتىل جاتتىقتىرۋعا تىرىسامىن. كوشەدە دە اتا-اجەلەرمەن قازاقشا سويلەسەمىن. مەنى تانىمايتىنداردىڭ كوبى تاڭىرقاپ جاتادى. كورشىلەرىمىز دە قازاقتار. ولار مەنىڭ ءوز تىلدەرىندە ءسويلەسەتىنىمدى جاقسى بىلەدى. سول ءۇشىن ءاردايىم قۇرمەت كورسەتىپ جاتادى, – دەيدى ەليزاۆەتا.
