«اق جول» دەموكراتيالىق پارتياسىنان پرەزيدەنتىككە كانديدات دانيا ەسپاەۆا سەنىم بىلدىرىلگەن وكىلدەرىمەن بىرگە سولتۇستىك قازاقستان وبلىسىندا كەزدەسۋ وتكىزدى. كانديدات ءوزىنىڭ سايلاۋالدى باعدارلاماسىن پەتروپاۆل اۋىر ماشينا جاساۋ زاۋىتىنىڭ ۇجىمىنا تانىستىردى. كاسىپورىندا 1000-عا جۋىق جۇمىسشى ىستەيدى. پرەزيدەنتتىكتەن ۇمىتكەر ەڭبەك شارتىمەن تانىسىپ, ەڭبەك ۇجىمىنا قازاقستاندىق كاسىپورىنداردى, ولاردىڭ ماماندارىن قولداۋ تۋرالى ۇسىنىستارىن ايتىپ بەردى.
بۇل زاۋىت مۇناي-گاز, قورعانىس, ەنەرگەتيكا سالالارىنا ارنالعان جابدىقتاردى دايارلايدى. ونىڭ تاريحى وتكەن عاسىردىڭ 60-ىنشى جىلدارىنان باستاۋ الادى. سول كەزدە ول زىمىران, زىمىران كەشەنى, سۋاستى قايىقتارىنىڭ سناريادتارىن جيناعان ەدى. قازىرگى تاڭدا زاۋىت ءوز باعىتىن كەڭەيتىپ, تەك قورعانىس مينيسترلىگىنىڭ عانا ەمەس, مۇناي جانە تەمىرجول كومپانيالارىنىڭ تاپسىرمالارىن ورىنداپ ءجۇر. جۇمىستىڭ جالپى اۋقىمى ءجۇز تۇردەن اسادى. بۇگىندە ونەركاسىپتى قايتا جاڭعىرتۋعا 4,5 ملرد تەڭگەدەن اسا قارجى ءبولىنىپ وتىر. جوبا 2020 جىلعا دەيىن, ياعني ءۇش جىلعا جوسپارلانعان. قايتا جاڭعىرتۋ پروتسەسى ونەركاسىپ اۋماعىن ۇلعايتىپ, جاڭا ونىمدەردى شىعارۋعا سەرپىن بەرەدى. بىلتىر زاۋىت 3,5 ملرد تەڭگە سوماسىندا جابدىقتار شىعارسا, بيىل ونىڭ قاراجاتىن 5-6 ملرد تەڭگەگە ۇلعايتۋ جوسپارلانعان. وتاندىق كاسىپورىن شەتەل كومپانيالارىنىڭ تەندەرلەرىنە دە قاتىسادى.
«اۋىل» حالىقتىق-دەموكراتيالىق پاتريوتتىق پارتياسى ۇسىنعان پرەزيدەنتتىككە كانديدات تولەۋتاي راحىمبەكوۆ اتىراۋ وبلىسىنداعى ماحامبەت اۋدانى سارايشىق اۋىلىنا بارىپ, ونداعى حالىقپەن جۇزدەسىپ, الما باعىن ارالادى. «ەڭبەكتىڭ نانى ءتاتتى», دەگەندەي كۇندەلىكتى شارۋاشىلىقتان ناپاقاسىن تاۋىپ جۇرگەن قاراپايىم جۇرت ۇمىتكەرگە كوكەيدە جۇرگەن ماسەلەلەرىن جەتكىزىپ, ونىڭ شەشىمىنە قاتىستى ۇسىنىستارىن ايتتى.
«اتىراۋ ءوڭىرىنىڭ قىسى قىتىمىر بولسا, جازى قاپىرىق, ىستىق. اۋا رايى قۇبىلمالى, قۇرعاقشىلىققا بەيىم. سوعان قاراماستان سارايشىقتا جايقالىپ ءوسىپ تۇرعان 40 مىڭ ءتۇپ اعاشى بار باقتا المانىڭ 34 سورتىنان جىل سايىن 400 تونناعا دەيىنگى ءونىم جينالادى. الما باعى زاماناۋي ۇلگىدەگى تەحنيكامەن جابدىقتالعان, سۋ ۇنەمدەۋ رەسۋرسى بار, ياعني مۇندا تامشىلاتا سۋارۋ جۇيەسى جۇمىس ىستەيدى. تەك الماتىدا, وڭتۇستىك وڭىرلەردە عانا ەمەس, ەلىمىزدىڭ باتىسىندا, اتىراۋدا دا الما باعى ءوسىپ تۇر. بۇل ەرەن ەڭبەكتىڭ ارقاسى, ارينە. سونىمەن قاتار اۋىل شارۋاشىلىعىنىڭ مۇمكىندىكتەرى مول ەكەنىن كورسەتەدى. قازىرگى تاڭدا ءدال وسى الما باعى اۋىلدىڭ 15 ادامىن تۇراقتى جۇمىسپەن قامتىپ وتىر», دەدى ت.راقىمبەكوۆ.
سودان كەيىن شتاب مۇشەلەرى «قازفوسفات» جشس-ءنىڭ مينەرالدى تىڭايتقىشتار زاۋىتىندا بولىپ, جۇمىسشىلارعا كانديداتتىڭ سايلاۋالدى باعدارلاماسىن تانىستىردى. كانديداتتىڭ سايلاۋالدى باعدارلاماسىنىڭ باسىمدىقتارى تۋرالى «Egemen Qazaqstan» رەسپۋبليكالىق گازەتى» اق باسقارما توراعاسى دارحان قىدىرالى, «اتامەكەن» ۇلتتىق كاسىپكەرلىك پالاتاسىنىڭ باسقارما توراعاسى ابىلاي مىرزاحمەتوۆ, وليمپيادا چەمپيونى ەرماحان ىبىرايىموۆ, قازاقستان حالقى اسسامبلەياسى توراعاسىنىڭ ورىنباسارى شەرزود پۋلاتوۆ سىندى رەسپۋبليكالىق شتاب مۇشەلەرى جان-جاقتى اڭگىمەلەدى.
رەسپۋبليكالىق قوعامدىق شتاب مۇشەلەرى تاراز قالاسىنداعى «استانا» شاعىن اۋدانىنداعى سايلاۋشىلاردىڭ ۇيلەرىندە دە بولدى.
«ۇلت تاعدىرى» ۇلتتىق-پاتريوتتىق قوزعالىسى اتىنان پرەزيدەنتتىك سايلاۋعا ءتۇسىپ جاتقان ءامىرجان قوسانوۆتىڭ شىعىس قازاقستان وبلىسىنداعى سايلاۋالدى قوعامدىق شتابى زايسان, اياگوز, قالباتاۋ جانە تاعى باسقا كەنتتەردى ارالادى. سەنىم بىلدىرىلگەن ادامدار جەرگىلىكتى تۇرعىندارمەن كەزدەسىپ, كانديداتتىڭ سايلاۋالدى باعدارلاماسىن ەگجەي-تەگجەيلى تانىستىردى. حالىقپەن كەزدەسۋدە ناسيحاتشىلار توبى پرەزيدەنتتىكتەن ۇمىتكەردىڭ نەگىزگى ۇستانىمدارىن اتاپ ءوتىپ, تۇرعىنداردى تولعاندىرعان سۇراقتارعا جاۋاپ بەردى.
ەل وڭىرلەرىندە ءوتىپ جاتقان وسىنداي كەزدەسۋلەردە كانديداتتىڭ سايلاۋالدى تۇعىرناماسىندا كورسەتىلگەن باستى ۇستانىمدار جان-جاقتى ءتۇسىندىرىلىپ جاتىر. ونىڭ باعدارلاماسىنداعى «ۇلتتىق بولمىس» اتتى تاراۋىندا قازاق ءتىلىنىڭ كونستيتۋتسيالىق مارتەبەسىن قوعام ءومىرىنىڭ بارلىق سالاسىندا ورنىقتىرىپ, ونىڭ قازاقستان حالقىن بىرىكتىرۋشى فاكتورى رەتىندەگى ءرولىن كۇشەيتۋ, «مەملەكەتتىك ءتىل تۋرالى» جاڭا زاڭ قابىلداپ, وندا زاڭدىق تۇرعىدان مەملەكەتتىك ءتىلدى ءبىلۋ, مىندەتتى ماماندىقتار ءتىزىمىن بەكىتۋ, ازاماتتاردى, اسىرەسە جاس ۇرپاقتى كيەلى الاشوردا يدەيالارىنا باۋلۋ, شەتەلدەردەگى قانداستاردىڭ قازاقستانعا ورالۋىنا كەپىلدىك بەرۋ تۋرالى ايتىلعان.
ع.بالتاباي كەزدەسۋگە جينالعان كوپشىلىكتى كانديداتتىڭ ءومىر جولى مەن قايراتكەرلىك كەلبەتى تۋرالى كەڭىنەن بايانداپ, جان-جاقتى تانىستىردى. ءسويتىپ قاتىسۋشىلاردىڭ سۇراقتارىنا جاۋاپ بەرىپ, الداعى سايلاۋدى بەلسەندى قولداۋ كورسەتۋگە شاقىردى.
سونىمەن قاتار س.تۇگەلدىڭ الماتى وبلىسىنداعى سايلاۋالدى قوعامدىق شتابىنىڭ وكىلدەرى تالدىقورعان قالاسىندا ۇلتتىق جəنە ات سپورتى تۇرلەرىنەن سپورت مەكتەبىنىڭ ۇجىمىمەن جانە قالا تۇرعىندارىمەن كەزدەستى. سەنىم بىلدىرىلگەن ادامدار كوپشىلىكتىڭ الدىندا وسى كۇنگە دەيىنگى وتكىزگەن ءىس-شارالارعا توقتالىپ, ءوز كانديداتتارىنىڭ قىرلارىن جاقسىلاپ اشىپ كورسەتەتىندەي سۇحبات قۇردى. وڭىرلىك شتاب جەتەكشىسى باقىتگۇل قوجابەرگەنوۆا ءوز كەزەگىندە س.تۇگەلدىڭ سايلاۋالدى تۇعىرناماسىن كەڭىنەن تانىستىردى. باعدارلامادا كورىنىس تاپقان ماسەلەلەر قىزۋ تالقىلاندى. Əسىرەسە دەموگرافياعا زور كوڭىل ءبولىپ, مەملەكەت تاراپىنان كومەك كورسەتۋ جانە مەملەكەتتىك ءتىلدىڭ مəرتەبەسىن كوتەرۋ مəسەلەسى كەڭىنەن ايتىلدى. جيىنعا ۇلتتىق جəنە ات سپورتى تۇرلەرىنەن سپورت مەكتەبىنىڭ ۇجىمى قاتىسقاندىقتان, ۇلتتىق ات سپورتىن دامىتۋعا قاتىستى باعىتتار اڭگىمە ارقاۋىنا اينالدى.
حاميت ەسامان,
ورىنبەك وتەمۇرات,
«Egemen Qazaqstan»
