بۇل تۋرالى مادەنيەت جانە ونەر قىزمەتكەرلەرى كۇنىندە ايماق باسشىسى اماندىق باتالوۆ ايتقان بولاتىن. سالا ماندارىن قۇتتىقتاعىن ول:
- ءبىزدىڭ بۇگىنگى قوعامدا ونەردىڭ سان الۋان ءتۇرى بار. دەسە دە ولاردىڭ بارلىعىنىڭ دا ماقسات-مىندەتى ءبىر. ول – ادامنىڭ ەستەتيكالىق تالعامىن قالىپتاستىرۋعا, سەزىمىن تاربيەلەۋگە, قورشاعان ورتانى كوركەمدىك كوزىمەن كورۋگە ۇيرەتۋ. سول ارقىلى ادامزاتقا رۋحاني ازىق بەرۋ. «شەبەردىڭ قولى ورتاق, شەشەننىڭ ءسوزى ورتاق» دەگەندە حالىق وسىنى ايتسا كەرەك. كەز كەلگەن ەل ونەرىمەن, مادەنيەتىمەن تانىلىپ, باعالاناتىنى انىق. سوندىقتان دا اتقارىپ جاتقان يگى ىستەرىڭىزگە تابىس تىلەيمىن. ونەردىڭ ورەسى بيىك, ايدىنى كەڭ بولىپ, ەلىمىزدىڭ رۋحاني بايلىعى ارتا بەرسىن! بارشا جەتىسۋلىق ونەرپازدارعا شىعارماشىلىق جەتىستىك پەن باقىت تىلەيمىن, - دەدى.
سونداي-اق, شارادا «ۇزدىك مادەنيەت قىزمەتكەرى» نوميناتسياسى بويىنشا وبلىستىڭ اۋدان, قالالارىنان 20 قىزمەتكەر ماراپاتتالدى. ولاردىڭ اراسىندا ارتىستەر, اۋىلدىق كلۋبتاردىڭ, مادەنيەت ۇيلەرىنىڭ, كىتاپحانالاردىڭ, شىعارماشىلىق ورتالىقتاردىڭ, اۋداندىق مادەنيەت جانە تىلدەردى دامىتۋ بولىمدەرىنىڭ قىزمەتكەرلەرى بار. ءاربىر جەڭىمپازعا ديپلوم مەن 100 مىڭ تەڭگەنىڭ سەرتيفيكاتى بەرىلدى. جانە «حالىقتىق, ۇلگىلى اتاعى بار ۇزدىك ۇجىم», «ۇزدىك تەاتر ءارتىسى», «ۇزدىك مادەنيەت ءۇيى», «ۇزدىك كىتاپحانا», «ۇزدىك مۋزەي», «ۇزدىك ءانشى», «ۇزدىك اسپاپشى», «ۇزدىك ءبيشى», «ۇزدىك وبلىستىق مادەنيەت مەكەمەسى» اتالىمدارى بويىنشا دا توپ جارعاندار انىقتالدى. اتاپ ايتقاندا, «ۇزدىك وبلىستىق مادەنيەت مەكەمەسى» نوميناتسياسىن ۇستا داركەمباي اتىنداعى قولونەر مۋزەيى جەڭىپ الدى, مۋزەيگە جۇلدە سىيى رەتىندە «لادا گرانتا» اۆتوكولىگىنىڭ كىلتى تاپسىرىلدى.
وبلىستىڭ مادەنيەت سالاسىن دامىتۋعا قوسقان ۇلەسى ءۇشىن بىرقاتار ازاماتتار «مادەنيەت سالاسىنىڭ ۇزدىگى» ءتوس بەلگىسىمەن ماراپاتتالدى. ولاردىڭ قاتارىندا ءسۇيىنباي اتىنداعى وبلىستىق فيلارمونيانىڭ م. تولەباەۆ اتىنداعى حالىق اسپاپتارى وركەسترىنىڭ اسپاپشى ءارتىسى مۇحتار ستىباەۆ, كەربۇلاق اۋدانى التىنەمەل اۋىلدىق مادەنيەت ءۇيىنىڭ مۋزىكا جەتەكشىسى ساۋلە قوجاحانوۆا دا بار.
سونىمەن بىرگە جيىرماعا جۋىق مامانعا قر مادەنيەت جانە سپورت مينيسترلىگىنىڭ, وبلىس اكىمىنىڭ قۇرمەت گراموتالارى مەن العىس حاتتارى بەرىلدى.
