باعدارلاما ىسكە اسىرىلعان ءتورت جىلدان بەرى رەسپۋبليكالىق بيۋدجەتتەن 210,5 ملرد تەڭگە ءبولىنىپ, بۇل قاراجات 13 مىڭ شوب سۋبەكتىسىن قارجىلاندىرۋعا, ورتا ەسەپپەن جىلىنا 20 مىڭ كاسىپكەردى وقىتۋعا, 10 مىڭ جۇمىس ورنىن قۇرۋعا, 3,3 ترلن تەڭگە سوماسىنا ءونىم شىعارۋعا جۇمسالىپتى.
− جالپى, باعدارلاما ىسكە اسىرىلعان ءتورت جىلدا رەسپۋبليكالىق جانە جەرگىلىكتى بيۋدجەتتەردەن 247,1 ملرد تەڭگە كولەمىندە 13 380 جوباعا قولداۋ كورسەتىلدى, – دەدى ۇلتتىق ەكونوميكا ۆيتسە-ءمينيسترى ەرمەك الپىسوۆ.
ونىڭ ايتۋىنشا, بولىنگەن قاراجاتتىڭ باسىم بولىگى, ياعني 126 ملرد تەڭگەسى نەمەسە بارلىق سومانىڭ 60,1 پايىزى نەسيەلەر بويىنشا سىياقى مولشەرلەمەسىن سۋبسيديالاۋعا باعىتتالعان. قالعان 53 ملرد تەڭگەسى نەمەسە 25,2 پايىزى فابريكالارعا, زاۋىتتارعا جانە شوب وندىرىستىك نىساندارىنا جەتكىلىكسىز ينفراقۇرىلىمدى تارتۋعا بولىنگەن. ودان كەيىن نەسيەلەردى كەپىلدەندىرۋگە, گرانتتار ۇسىنۋعا, كاسىپكەرلەردى وقىتۋعا جانە ولارعا كەڭەس بەرۋ قىزمەتتەرىنە جۇمسالدى.
ايتا كەتەرلىگى, «بيزنەستىڭ جول كارتاسى» باعدارلاماسى 2025 جىلعا دەيىن ۇزارتىلماق. قازىر باعدارلامانىڭ تۇجىرىمداماسى جاسالىپ, ونىڭ تىڭ باعىتتارىن ايقىندايتىن جۇمىس توبى قۇرىلدى.
