اۋىل كاسىپكەرلىگىن قارجىلاندىرۋ باستالدى

«اۋىل شارۋاشىلىعىن قارجىلاي قولداۋ قورى» اق باسقارما توراعاسى جاندار وماروۆتىڭ ايتۋىنشا، 2017-2021 جىلدارعا ارنالعان «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدار­لاماسى «جۇمىسپەن قامتۋدىڭ جول كار­تاسى-2020» باعدارلاماسىنىڭ جالعا­سى. باعدارلامانىڭ وپەراتورلارى «قازاگرونىڭ» ەنشىلەس كومپانيالارى – «اگرارلىق نەسيە كورپوراتسياسى» اق، «اۋىل شارۋاشىلىعىن قارجىلاي قولداۋ قورى» اق جانە «قازاگروكەپىل» اق. باع­دار­لامانىڭ ماقساتى – ەلدىڭ جۇمىسسىز ازاماتتارى، ءوزىن ءوزى جۇمىسپەن قامتىعان تۇر­عىن­دار، كاسىپكەرلەر، اۋىل شارۋاشىلىعى كووپەراتيۆتەرى مەن ولاردىڭ مۇشەلەرى، زەي­نەت­كەرلىك جاسقا تولماعان ادامدار، زاكىرلىك كووپەراتسياعا قاتىسۋشىلاردى قوسا العاندا، شارۋا جانە فەرمەر قوجالىقتارىنا قولداۋ كورسەتۋ.

ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا نەسيەلەر ءارتۇرلى ماقساتقا جىلىنا 6 پايىزدىق سىياقى مولشەرلەمەسىمەن بەرىلەدى.  بۇل رەتتە ءتيىمدى جىلدىق مولشەرلەمە 6،7 پايىزدان اسپايدى. نەسيە ونىمىنە بايلانىستى كەزەڭى، سوماسى، جەڭىلدىك كەزەڭىنىڭ ۇزاقتىعى وزگەرەدى.

اعىمداعى جىلى اۋىل شارۋاشىلىعىن قارجىلاي قولداۋ قورى 62،1 ملرد تەڭگە سوماسىندا قارىز بەرۋدى جوسپارلاپ وتىر. ونىڭ ىشىندە ناتيجەلى جۇمىسپەن قامتۋ باعدارلاماسى بويىنشا – 27،5 ملرد تەڭگە. ەتتى جانە ءسۇتتى مال شارۋاشىلىعىن دامىتۋ جونىندەگى جوبالاردى قارجىلاندىرۋعا باسىمدىق بەرىلەتىنىن ايتا كەتۋ كەرەك.

ال «اگرارلىق نەسيە كورپوراتسياسى» اق باسقارۋشى ديرەكتورى گۇلميرا ەرعاليەۆا كورپو­راتسيانىڭ باعدارلاماعا قاتىسۋ­شى­لار­­دى قارجىلاندىرۋدى ميكروقارجىلىق ۇيىمدار ارقىلى جۇرگىزەتىنىن ايتتى. بۇل ساتۋ ارنالارىنىڭ سانىن ارتتىرادى جانە اۋدان ورتالىقتارى مەن شالعاي اۋىلداردا نەسيە الۋعا مۇمكىندىك بەرەدى. كورپوراتسيا قارىز الۋشىلارعا 84 اي مەرزىمگە 8000 اەك-كە دەيىن 6 پايىزبەن نەسيە بەرەدى. بۇل قارجى مال شارۋاشىلىعىنا، وسىمدىك شارۋاشىلىعىنا، سونداي-اق اۋىلدىق جەرلەردەگى اۋىل شارۋاشىلىعى ەمەس بيزنەس تۇرلەرىنە ارنالعان. 2019 جىلى 17،482 ملرد تەڭگە كولەمىندە قارجى ءبولۋ جوسپارلانىپ وتىر.

نەسيە الۋشىلار كەپىل مۇلكى جەتىسپەگەن جاعدايدا باعدارلاماعا قاتىساتىن تاعى ءبىر ۇيىم «قازاگروكەپىل» اق ارقىلى بيۋدجەت قاراجاتى ەسەبىنەن كەپىلدىككە يە بولا الادى. بۇل ۇيىم ءىسىن جاڭا باستاعان كاسىپكەرلەردىڭ ستارتاپ جوبالارىن باستاۋعا، سونداي-اق جۇمىس ىستەپ تۇرعان بيزنەستى كەڭەيتۋگە باعىتتالعان قولداۋدى جۇزەگە اسىرادى.

– كەپىلدىك بەرۋ قۇرالىن 726 فەرمەر پايدالاندى، باسىم بولىگى بيزنەسىن نولدەن باستاعان كاسىپكەرلەر. قازىر ءبىزدىڭ ۇيىم ارقىلى بەرىلگەن كەپىلدىكتەردىڭ جالپى سوماسى 2 596 ملن تەڭگەگە جەتتى. كەپىلدىكپەن بەرىلگەن قارىزدىڭ ورتاشا سوماسى – 6،6 ملن تەڭگە، ورتاشا سوما 3،2 ملن تەڭگە، – دەدى «قازاگروكەپىل» اق باسقارما توراعاسى قازبەك يمانقۇلوۆ.

قازىرگى ۋاقىتتا «قازاگرو» ۇلتتىق حول­دينگىنىڭ ەنشىلەس كومپانيالارىنىڭ بار­لىق فيليالدارىندا  نەسيە بەرۋگە جانە كەپىلدەندىرۋگە وتىنىمدەر قابىلداۋ باستالدى.