يۋنەسكو-نىڭ ءبىلىم بەرۋ جونىندەگى ازيا-تىنىق مۇحيتى وڭىرلىك بيۋروسى (يۋنەسكو بانگكوك) مەن يۋنەسكو-نىڭ الماتىداعى كلاستەرلىك بيۋروسى ازيا-تىنىق مۇحيتى وڭىرىندە ينتەرناتسيونالداندىرۋ ساياساتى مەن تاجىريبەسىنە ارنالعان ايماقتىق فورۋمدا ورتالىق ازيا ۋنيۆەرسيتەتتەرىنەن, سونداي-اق ەۋروپا مەن ازيا-تىنىق مۇحيتى ايماعىنان كەلگەن ساراپشىلار جاھاندىق ۇدەرىس جاعدايىنداعى جوعارى ءبىلىمدى دامىتۋ تاقىرىبىن قوزعادى.
يۋنەسكو بۇۇ-نىڭ جوعارى ءبىلىم بەرۋ سالاسىنداعى جۇمىس مانداتى بار اگەنتتىگى رەتىندە حالىقارالىق ىنتىماقتاستىقتى نىعايتۋداعى جۇمىستارىنا توقتالعان الماتىداعى يۋنەسكو كلاستەرلىك بيۋروسىنىڭ ديرەكتورى كريستا پيكاتت ايماق ەلدەرىنىڭ ءبىلىم سالاسىنداعى بىرلەسكەن قادامدارىنىڭ ماڭىزدىلىعىنا توقتالىپ ءوتتى.
2015 جىلى 17 تۇراقتى دامۋ ماقساتتارىن قابىلداعان بۇۇ مۇشە مەملەكەتتەرى 2030 جىلعا قاراي بارلىق ايەلدەر مەن ەرلەردىڭ قولجەتىمدى ءارى ساپالى كاسىپتىك-تەحنيكالىق, سونداي-اق جوعارى ءبىلىم الۋ مۇمكىندىكتەرىن قاراستىرا وتىرىپ, ينتەرناتسيونالداندىرۋ باعىتىنداعى شارالارعا باسىمدىق بەرەدى.
قازاقستان رەسپۋبليكاسىنىڭ ءبىلىم جانە عىلىم مينيسترلىگى بولون پروتسەسى جانە اكادەميالىق ۇتقىرلىق ورتالىعىنىڭ ديرەكتورى الماگۇل قۇلتۋمانوۆا ينتەرناتسيالاندىرۋ ۇدەرىسى قازاقستاندىق وقۋ ورىندارىنا زاماناۋي جەتىستىكتەرمەن الماسۋعا مۇمكىندىك بەرەدى دەيدى. بالون كونۆەنتسياسى اياسىندا سوڭعى 8 جىلدا 14 مىڭ ستۋدەنت ەۋروپانىڭ جوعارى وقۋ ورىندارىندا اكادەميالىق ءبىلىمىن جەتىلدىرسە, بۇل باعىتتا مەملەكەت تاراپىنان جىلىنا 600 ورىن ءبولىنىپ, قازاقستاندىق ستۋدەنتتەردىڭ شەتەلدەردە اكادەميالىق ءبىلىمىن شىڭداۋ مۇمكىندىگى قاراستىرىلعان. سونداي-اق شەتەلدىك ستۋدەنتتەردىڭ دە قازاقستاندا ءبىلىم الۋ باعدارلامالارى جۇزەگە اسۋدا. بيىلعى جىلى 160 ورىنعا ستيپەنديالىق گرانت ءبولىنىپ, ونىڭ ىشىندە ەتنيكالىق قازاقتاردىڭ دا ەلگە كەلىپ وقۋىنا كەڭىنەن جول اشىلىپ وتىر. ال ەلىمىزدىڭ جوعارى وقۋ ورىندارىندا جۇمىس ىستەپ جاتقان 25 توپ-مەنەدجەرلەر باسقارۋ جۇيەسى بويىنشا تاجىريبە الماسۋدا. سالا ماماندارى ينتەرناتسيالاندىرۋ ءۇردىسى زاماناۋي تەحنولوگيالاردى يگەرۋگە, قازاقستاندىق جوعارى وقۋ ورىندارىنىڭ وقۋ باعدارلاماسىندا جاڭا مازمۇن, تىڭ وزگەرىستەر ەنگىزۋگە مۇمكىندىك بەرەتىندىگىن قۇپتادى.
ءححى عاسىر تالابىنا سايكەس كاسىبي ءبىلىم بەرۋ, اقپاراتتىق تەحنولوگيالاردى مەڭگەرۋ, زاماناۋي وقۋ باعدارلامالارىن جەتىلدىرۋدىڭ ايماق ەلدەرى ءۇشىن ماڭىزدى ەكەندىگىنە توقتالعان يۋنەسكو الماتى قالاسى بويىنشا حالىقارالىق باعدارلاما بويىنشا مامانى لينا بەنەتەنىڭ ايتۋىنشا, ەۋروپاداعى ليسسابون كونۆەنتسياسى جانە توكيو كونۆەنتسياسى شەڭبەرىندە ساپانى قامتاماسىز ەتۋ, بىلىكتىلىكتى ارتتىرۋداعى بايلانىستاردى نىعايتۋ ىقپالداستىق پەن ترانسشەكارالىق ۇتقىرلىقتى دامىتۋدىڭ كەپىلى.
جوعارى ءبىلىمدى ينتەرناتسيالاندىرۋ جانە ينستيتۋتسيونالدىق سيپاتتاعى تاجىريبەلەرىمەن ءبولىسىپ, قازاقستاندىق ءبىلىم بەرۋ جۇيەسىن اۋعانستان, ءۇندىستان, قىتاي, تۇركيا, پاكىستان, ەگيپەت, رەسەي جانە باسقا ەلدەر ءۇشىن جوبالاۋ-ءبىلىم بەرۋ حابىنا اينالدىرۋ باعىتىنداعى ماسەلەلەردى تالقىلاعان حالىقارالىق ساراپشىلار, ەرەكشە ءبىلىم بەرۋ قاجەتتىلىكتەرى بار ستۋدەنتتەر ءۇشىن تەڭ جاعداي جاساۋ, قاشىقتىقتان ءبىلىم بەرۋ تەحنولوگيالارىن يگەرۋ باعىتىنداعى ماسەلەلەرگە دە نازار اۋداردى.
الماتى
