قازاقستان مەن قىتاي سىرتقى ساياسي ۆەدومستۆولارىنىڭ باسشىلارى ساياسي, ساۋدا-ەكونوميكالىق سالالارداعى ەكىجاقتى ىنتىماقتاستىق, سونداي-اق كوپجاقتى قۇرىلىمدارداعى ءوزارا ىقپالداسۋ ماسەلەلەرىن تالقىلادى.
قازاقستان ءسىم باسشىسى بيىلعى جىلدىڭ 25-28 ساۋىردە ءساتتى وتكەن «ءبىر بەلدەۋ, ءبىر جول» 2-ءشى حالىقارالىق ىنتىماقتاستىق فورۋمىنا قاتىسۋ ءۇشىن قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ ساپارىنىڭ ماڭىزدىلىعىن اتاپ ءوتتى.
وسى فورۋمدا ەلباسى ن.نازارباەۆ الەمدىك قوعامداستىققا گەوساياسي احۋالدىڭ «ءۇش د» ۇلگىسىن ۇسىندى جانە قىتايلىق تاراپتى ونى جۇزەگە اسىرۋ ءۇشىن ودان ءارى جان-جاقتى قولداۋدى سۇرادى.
ۆان ي اعىمداعى جىلدىڭ 14-16 مامىردا قكپ ورتالىق كوميتەتى تۇراقتى كوميتەتىنىڭ مۇشەسى, قحر مەملەكەتتىك كەڭەسىنىڭ ۆيتسە-پرەمەرى حان چجەننىڭ قازاقستان مەن قىتاي 2-ءشى وڭىرارالىق ىنتىماقتاستىق فورۋمىنا جانە 12-ءشى استانالىق ەكونوميكالىق فورۋمىنا قاتىسۋ ءۇشىن قازاقستانعا ساپارىن ويداعىداي وتكىزىلگەنى ءۇشىن العىس ءبىلدىردى.
قىتاي ءسىم باسشىسى قازاقستاندا الداعى ۋاقىتتا وتەتىن پرەزيدەنتتىك سايلاۋدىڭ تابىستى بولاتىنىنا سەنىم ءبىلدىردى. ول مەملەكەت باسشىسى قاسىم-جومارت توقاەۆ حالىقتىڭ كەڭ اۋقىمدى قولداۋىنا يە ەكەنىن اتاپ ءوتتى.
قىتايلىق تاراپ «ءبىر بەلدەۋ, ءبىر جول» باستاماسىن جۇزەگە اسىرۋدا قازاقستاننىڭ جەتەكشى ءرولىن ەرەكشە اتاپ ءوتىپ, ونى «نۇرلى جول» جەس-پەن تەرەڭ ۇشتاستىرۋ ارقىلى ءوزارا كولىك بايلانىستارىن كوتەرۋدى, سونداي-اق ونى ىلگەرىلەتۋدە ەكى ەلدىڭ كوشباسشىلىعىن ساقتاۋدى ۇسىندى. بۇل ءوز كەزەگىندە, ءبىزدىڭ ەلدەر اراسىندا تسيفرلىق ەكونوميكانى دامىتۋ, تسيفرلاندىرۋ, جوعارى تەحنولوگيالىق, يننوۆاتسيالىق جانە ەلەكتروندىق كوممەرتسيا سالاسىنداعى جاڭا جوبالاردىڭ سانىن ارتتىرۋ بويىنشا يندۋستريالىق-ينۆەستيتسيالىق ىنتىماقتاستىقتى نىعايتۋعا ىقپال ەتەدى.
ۆان ي قىتاي قازاقستانمەن كوپجاقتى كۇن تارتىبىندەگى كەڭ اۋقىمدى ماسەلەلەر بويىنشا دا ءوزارا تىعىز ىنتىماقتاستىققا, قازاقستان رەسپۋبليكاسىنىڭ تۇڭعىش پرەزيدەنتى - ەلباسى ن.نازارباەۆ قۇرۋدىڭ باسىندا تۇرعان شىۇ, اوسشك سياقتى حالىقارالىق ۇيىمدار شەڭبەرىندە ءتيىمدى ۇيلەستىرۋگە مۇددەلى ەكەنىن اتاپ ءوتتى.
سىرتقى ساياسي ۆەدومستۆولارىنىڭ باسشىلارى ەكى ەلدىڭ شىۇ-دا بىرقاتار باستامالارىنا ءوزارا قولداۋدى اتاپ ءوتتى, اتاپ ايتقاندا شىۇ دامۋ بانكىن قۇرۋ, ۇلتتىق ۆاليۋتاداعى ءوزارا ەسەپ ايىرىسۋ ۇلەسىن ۇلعايتۋ, ترانزيت-كولىكتىك الەۋەتىن پايدالانۋ جانە ت.ب.
تاراپتار ءوزارا قىزىعۋشىلىق تۋدىراتىن ماسەلەلەر بويىنشا تۇراقتى بايلانىستار مەن قولداۋدى جالعاستىرۋعا كەلىستى.
