جاسۇلان رايبەك ۇلى تۇركىستان وبلىسى تۇلكىباس اۋدانى تۇرار رىسقۇلوۆ اۋىلىنىڭ تۋماسى. وتباسىندا 5 اعايىندى: 3 ۇل, 2 قىز. ول - ءۇيىنىڭ ۇلكەنى. اكەسى مال دارىگەرى. اناسى بالاباقشادا ادىسكەر بولىپ جۇمىس ىستەيدى. قازىرگى تاڭدا جاسۇلان حالىقارالىق بيزنەس جانە كوممۋنيكاتسيا كوللەدجىندە 1-كۋرستا وقيدى. ۇستازدارىنىڭ ايتۋىنشا, جاسۇلان وقۋعا تۇسكەننەن باستاپ قوعامدىق جۇمىستارعا اتسالىسىپ, جاۋاپكەرشىلىگى مول ستۋدەنت ەكەنىن بىردەن بايقاتقان. كوللەدج ستۋدەنتتەرىنەن قۇرالعان جايدارمان ويىندارىندا ۇزدىك ويىنشىلاردىڭ ءبىرى. وقۋدا ۇزدىك ستۋدەنت.
«مەن حالىقارالىق بيزنەس جانە كوممۋنيكاتسيا كوللەدجىنىڭ 1-كۋرس ستۋدەنتىمىن. ماماندىعىم قارجىگەر. مەنى گرانتقا اۋىستىرعانى ءۇشىن كوللەدج ديرەكتورى سەرىك شاپحات ۇلىنا العىسىم شەكسىز. وسى گرانتقا وتۋىمە, وقۋىمنىڭ 3 جىلدىق قارجىسىن تولەپ بەرگەن تيمۋر اعايعا راحمەتىمدى ايتامىن. سونىمەن قاتار, گرانتقا اۋىسۋىما كومەكتەسكەن مۇعالىمدەرگە, قۇرالاي بەلدەبايقىزىنا جانە دە كۋراتورىم قۋاتبەك بەركىنباي ۇلىنا العىس ايتقىم كەلەدى. گرانتقا اۋىسقانىمدى حابارلاعان كەزدە وتە قاتتى قۋاندىم, اتا-انام دا قاتتى قۋاندى. ءبىزدىڭ وتباسىمىز ءۇشىن بۇل جاعداي وتە ءبىر كەرەمەت وقيعا بولدى. مەيىرىمدى جاندار كوبەيە بەرسىن» دەيدى ستۋدەنت.
سەرىك شاپحات ۇلى باسشىلىق ەتەتىن كوللەدج 2009 جىلدان باستاپ جۇمىس ىستەپ كەلەدى. العاشىندا زاڭ, ەكونوميكا جانە نانوتەحنولوگيا كوللەدجى دەپ اتالىپ, 2014 جىلدان باستاپ حالىقارالىق بيزنەس جانە كوممۋنيكاتسيا كوللەدجى دەگەن اتاۋعا يە بولدى.
سوڭعى 8 جىل جۇمىس ىستەۋ بارىسىندا حالىقارالىق بيزنەس جانە كوممۋنيكاتسيا كوللەدجى 1100-گە جۋىق ماماندى ەكونوميكا, راديوەلەكترونيكا جانە بايلانىس, ەسەپتەۋ تەحنيكاسى جانە باعدارلامالىق قامتاماسىزداندىرۋ, اقپاراتتىق جۇيەلەر, قۇقىقتانۋ جانە اۋدارما ءىسى, ەكونوميكا جانە بيزنەس سالالارى بويىنشا ۇزدىك مامانداردى دايارلاپ شىققان.
