اقتوبە قالاسى اكىمدىگىنىڭ قولداۋىمەن 2019 جىلدىڭ 10-14 شىلدە كۇندەرى وبلىس ورتالىعىنىڭ 150 جىلدىعىنا ارنالعان «Baqytty bala» ءىى اشىق بالالار ۆوكالدىق فەستيۆال-بايقاۋى وتەدى. كونكۋرسقا وتىنىمدەردى قابىلداۋ 2019 جىلدىڭ 31 مامىرىنا دەيىن جالعاسادى.
بۇل بالالار بايگەسى جاڭا ەسىمدەردى انىقتاۋدى, ولاردىڭ, جەتىلۋىنە تانىلۋىنا جاعداي جاساۋدى, سونداي-اق قاتىسۋشىلاردىڭ ورىنداۋشىلىق شەبەرلىگىن شىڭداۋدى, ۆوكالدىق ونەردىڭ ۇزدىك داستۇرلەرىن دامىتۋدى ماقسات ەتەدى.
«Baqytty bala» بايقاۋىن جاس تالانتتار فابريكاسى دەپ اتاۋعا دا بولادى. «Baqytty bala - 2018» فيناليستەرى جىل بويى وزدەرىنىڭ جاستىعىنا قاراماستان, تابىستى ارتىستەر رەتىندە كورسەتتى. مىسالى, "junior Eurovision" حالىقارالىق ءان بايقاۋىنىڭ ۇلتتىق ىرىكتەۋ سۋپەرفيناليستتەرىنىڭ جارتىسى – «Baqytty bala» I فەستيۆالىنىڭ قاتىسۋشىلارى. ەرجان ماكسيم بولسا, رەسەيلىك كوپشىلىككە بەلگىلى «گولوس. دەتي» جوباسىندا - فەستيۆالدىڭ ەكى گران-ءپريىنىڭ ءبىرىن جەڭىپ الىپ, ءوزىنىڭ تالانتىمەن, دارىنىمەن ماسكەۋ كورەرمەندەرىن مويىنداتتى. ەرجاننىڭ اناسى گۇلميرا الىبەكوۆانىڭ ايتۋىنشا, اقتوبەدەگى بالالار بايقاۋى ۇلىنىڭ شىعارماشىلىعى ءۇشىن تاماشا ترامپلين بولعان.
"وتكەن جىلى مەن اقتوبە قالاسىندا وتكەن «Baqytty bala» بايقاۋىنا قاتىسىپ, گران-پري يەگەرى اتاندىم. بايقاۋ جوعارى دەڭگەيدە ءوتتى. مەن سول كەزدە ءوزىمنىڭ ونەردەگى كۋميرىم ديماش قۇدايبەرگەنمەن جەكە تانىستىم. ول قاتىسۋشىلارعا فەستيۆال باعدارلاماسى اياسىندا شەبەرلىك ساعاتىن وتكىزدى. باعدارلاما وتە مازمۇندى بولدى. «Baqytty bala» -دان مەن وسى كۇنگە دەيىن جىلى ۇشىراساتىن, تاتۋلىق قارىم-قاتىناستاردى قولدايتىن شىنايى دوستارىمدى تاپتىم.
«Baqytty bala» بايقاۋى ءوز اتاۋىنا سايكەس كەلەدى. بۇل بايقاۋ مەنىڭ جادىمدا ومىرىمدەگى ەڭ باقىتتى ەستەلىكتەردىڭ ءبىرى رەتىندە ساقتالادى. مەن ءادىل كونكۋرسقا قاتىسىپ, گران-پري الدىم جانە بارلىق ونەرلى بالالارعا «Baqytty bala» فەستيۆال-بايقاۋىنا ءوتىنىم بەرۋگە كەڭەس بەرەمىن. سەبەبى, بۇل – قازاقستانداعى ەڭ ءادىل بايقاۋ! «Baqytty Bala-2019» ساحناسىندا كەزدەسكەنشە, دوستارىم!"- دەدى ەرجان ماكسيم.
ايتا كەتۋ كەرەك, «Baqytty bala» بايقاۋىنىڭ فينالىنا فينليانديا, اقش, گەرمانيا, مالايزيا, جاپونيا, پولشا, فرانتسيا, رەسەي, يندونەزيا, ۋكراينا, قىتاي ەلدەرىنەن كەلگەن ديماشتىڭ جانكۇيەرلەرى دە كۋا بولادى. ماسەلەن, جاڭا زەلانديانىڭ تۇرعىنى – انيتا روي ۋورد مۇگەدەك ارباسىنا تاڭىلعان اۋىر ناۋقاس. سولاي بولا تۇرا, ول ءوز كۋميرىن كورۋ ءۇشىن 15 مىڭ شاقىرىمدى باعىندىرىپ, قازاقستانعا كەلدى.
فەستيۆال-كونكۋرستىڭ جالپى جۇلدە قورى 2 500 000 تەڭگەنى قۇرايدى. فەستيۆال جاس قاتىسۋشىلار مەن قازاقستاندىق شوۋ-بيزنەستىڭ تانىمال جۇلدىزدارى, سونداي-اق شەتەلدىك قوناقتار قاتىساتىن جارقىن ۆوكالدىق شوۋمەن اياقتالادى دەپ كۇتىلۋدە. شاقىرىلعان قوناقتار اراسىندا وتكەن جىلعى گران-پري يەگەرى ەرجان ماكسيم دە بار.
«Baqytty bala - 2019» ونەر دوداسىنا قاتىسۋعا نيەت بىلدىرۋشىلەردىڭ بارلىعى كونكۋرستىڭ رەسمي سايتىندا ءوتىنىم بەرۋ جولدارىمەن جانە ەرەجەسىمەن تانىسا الادى: www.baqyttybala.kz
ەسكە سالا كەتەيىك, بىلتىر ماۋسىم ايىندا اقتوبەدە «Baqytty bala» ءى اشىق بالالار ۆوكالدىق فەستيۆال-بايقاۋى وتكەن بولاتىن. ونى "ديماشالي"شىعارماشىلىق ورتالىعىنىڭ قولداۋىمەن وبلىس اكىمدىگى ۇيىمداستىردى. ەلىمىزدە تەڭدەسى جوق جوباعا قازاقستان, رەسەي, وزبەكستان, ۋكراينا, گرەتسيا ەلدەرىنىڭ وكىلدەرى قاتىستى. حالىقارالىق دەڭگەيدەگى ديماش قۇدايبەرگەن, دانەليا تولەشوۆا, دجوردان اراكەليان, ۆلاد سىتنيك, جەڭىس ىسقاقوۆا, سۆەتلانا جانە قانات ايتباەۆتار سىندى ارتىستەر فەستيۆالدىڭ تورەشىلەرى مەن ارنايى قوناقتارى بولدى.
