قر تۇڭعىش پرەزيدەنتى – ەلباسى نۇرسۇلتان نازارباەۆ اتاپ وتكەندەي, شىمكەنت ورتالىق ازيانىڭ قۋاتتى ەكونوميكالىق ورتالىعىنا, قوناقتار مەن تۇرعىندارعا ارنالعان قولايلى جاعدايلار جاسالعان ءىرى ءارى تارتىمدى مەگاپوليسكە اينالۋى ءتيىس.
قر ۇكىمەتىنىڭ باسشىسى جۇمىس ساپارى بارىسىندا مەگاپوليس توڭىرەگىندەگى ينفراقۇرىلىمدىق جانە الەۋمەتتىك جوبالاردىڭ ىسكە اسىرىلۋىن تەكسەردى. «تۇران» شاعىن اۋدانىندا ۇزىندىعى 3,3 شاقىرىم بولاتىن ءۇش ماگيسترالدى كوشەنىڭ ءبىرى — جول ينفراقۇرىلىمىنىڭ قۇرىلىسى قارالدى. پرەمەر-مينيسترگە وسى جىلدىڭ سوڭىنا دەيىن جولدىڭ پايدالانۋعا بەرىلەتىنى باياندالدى. تۇرعىندارعا قولايلى بولۋى ءۇشىن ۆەلوسيپەد جولدارى قاراستىرىلعان. جالپى, اتالعان تۇرعىن شاعىن اۋداندا 7,7 شاقىرىم جول ينفراقۇرىلىمى قۇرىلىس جۇمىستارىمەن قامتىلعان.
«نۇرلى جول» مەملەكەتتىك باعدارلاماسى اياسىندا 2022 جىلدىڭ ءىىى توقسانىنىڭ سوڭىنا دەيىن جاڭا اۆتوماتتاندىرىلعان گاز تاراتۋشى ستانتسيا سالىنادى, ول ارتىپ كەلە جاتقان سۇرانىستى ەسكەرە وتىرىپ, شالعايداعى ەلدى مەكەندەردىڭ, سونىڭ ىشىندە «تۇران» شاعىن اۋدانىنىڭ تۇرعىندارىن گازبەن قامتاماسىز ەتۋگە جول اشادى. قالا توڭىرەگىندەگى تۇرعىن ۇيلەردى ەلەكترمەن جابدىقتاۋ ءۇشىن ەلەكتر جەلىلەرىن سالۋ جۇمىستارى پىسىقتالۋدا.
قر پرەمەر-ءمينيسترى «بوزارىق 220/110/10 كۆ» قوسالقى ستانتسياسىنىڭ قۇرىلىسى ءجۇرىپ جاتقان جەردە جوبانى ۋاقىتىلى اياقتاۋ ماسەلەسىنە ەرەكشە كوڭىل ءبولدى. قالانى دامىتۋدىڭ 2030 جىلعا دەيىنگى باس جوسپارى اياسىندا شىمكەنتتىڭ سولتۇستىك بولىگىندە تۇرعىن ءۇي قۇرىلىسى جۇرگىزىلىپ جاتىر, بۇل ەلەكتر قۋاتىنىڭ قوسىمشا كوزىن سالۋ جۇمىستارىن جانداندىرۋدى تالاپ ەتەدى.
قالا اكىمدىگىنىڭ مالىمەتتەرىنە سايكەس, «بوزارىق 220/110/10 كۆ» بيىل قاراشا ايىندا پايدالانۋعا بەرىلەدى. سونىڭ ناتيجەسىندە, شامامەن 250 مىڭ ادام تۇراتىن 10 جاڭا تۇرعىن ءۇي الابى ۇزدىكسىز ەلەكتر قۋاتىمەن قامتاماسىز ەتىلەدى.
«تاسساي» يندۋستريالىق ايماعىنىڭ اۋماعىندا پرەمەر-مينيستر ا. مامين «Asia Trafo» جشس جاڭا زاۋىتىنىڭ تەحنولوگيالىق وندىرىستىك پروتسەسىمەن جانە ەلەكتروتەحنيكالىق زەرتحاناسىنىڭ جۇمىسىمەن تانىستى. يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا ىسكە قوسىلعان كاسىپورىن قۋاتتىلىقتارى 110-220, 500 كۆ دەيىن جەتەتىن ترانسفورماتورلار شىعارادى. بيىل 7 ملرد تەڭگە سوماسىنا ءونىم شىعارۋ جوسپارلانعان. جىل سايىنعى كولەمى 120 بىرلىكتى قۇرايتىن جوعارى ساپالى زاماناۋي ءوندىرىستى جەرگىلىكتەندىرۋ ىشكى نارىق قاجەتتىلىكتەرىن قاناعاتتاندىرىپ, ەنەرگەتيكالىق جابدىقتاردىڭ 40%-عا جۋىعىن تمد, يران, اۋعانستان, پاكىستان جانە ت.ب. ەلدەرگە ەكسپورتتاۋعا مۇمكىندىك بەرەدى. كاسىپورىندا 220 ادام جۇمىس ورىندارىمەن قامتىلعان.
جۇمىس ىستەپ تۇرعان كاسىپورىنداردى تەكسەرۋ قورىتىندىسى بويىنشا قر ۇكىمەتىنىڭ باسشىسىنا قۇرىلۋى قولدا بار اۋماقتاردى بارىنشا تولىقتىرۋعا باعىتتالعان «جۇلدىز» كوپسالالى يندۋستريالىق ايماعى جانە مەگاپوليستىڭ ازىق-ت ۇلىك قاۋىپسىزدىگى بەلدەۋىن قامتاماسىز ەتۋگە باعىتتالعان «شىمكەنت» اگرو-يندۋستريالىق ايماعى تانىستىرىلدى.
ەلباسى تاپسىرماسى بويىنشا دامىتۋعا 600 ملرد تەڭگە قاراجات بولىنگەن «قاراپايىم زاتتار ەكونوميكاسى» ماسەلەسىنە ەرەكشە كوڭىل ءبولىندى. پرەمەر-مينيسترگە حالىق تۇتىناتىن تاۋارلار ءوندىرىسىن ارتتىرۋ ءۇشىن قولايلى جاعدايلار جاسالعانى باياندالدى. سونىڭ ناتيجەسىندە, بۇگىنگى تاڭدا مەگاپوليس ۇلەسىنە قازاقستاننىڭ جەڭىل ونەركاسىبى كولەمىنىڭ 23% تيەسىلى.
