استىقتى ولكەدە جىل سايىن كۇزگى جيىن-تەرىن كەزىندە كوش باستايتىن اۋداننىڭ ديقان-مەحانيزاتورلارى بيىل ءتاپ-ءتاۋىر دايىندىق جاساعان سىڭايلى. جۇمىس اۋقىمى دا از ەمەس. 459,3 مىڭ گەكتار القاپقا بيداي, ءداندى جانە بۇرشاق داقىلدارى, مايلى داقىلدار سەبىلمەكشى. ونىڭ ۇستىنە 472 گەكتار جەرگە كارتوپ پەن كوكونىس وتىرعىزۋ مەجەلەنگەن.
نەگىزىنەن جازىق دالا بولعاندىقتان, كوكتەمگى دالا جۇمىستارىنا دەيىن توپىراقتىڭ كەۋىپ كەتەتىنى بار. قىستا قار توقتاتۋدىڭ دا مۇمكىنشىلىگى از. سوندىقتان, ەندىگىسى ىلعال جابۋ. 224,8 مىڭ گەكتار جەردىڭ ىلعالىن جابۋ جوسپارلانسا, ونىڭ 32,5 پايىزى عانا جۇزەگە اسىرىلىپتى. ءداندى داقىلدىڭ نەگىزگى شارتى ىلعال بولاتىن بولسا, القاپتاردى ارامشوپتەن ارىلتۋ, كۇنى بۇرىن وڭدەۋدەن وتكىزۋ دە اسا ماڭىزدى. بۇل ورايدا ديقانداردىڭ نيەتى كوڭىل قۋانتادى. ولار 140 مىڭ گەكتاردان استام القاپقا ءدان سىڭىرمەس بۇرىن وڭدەۋ جۇرگىزبەكشى. ونىڭ ىشىندە 90 مىڭ گەكتاردان استام القاپ حيميالىق ادىسپەن وڭدەلمەك. جاقسىنىڭ ديقاندارى ىلعال جيناعىش تەحنولوگيانى دا قولدانۋدا. بيىلعى ەگىستە 308,4 گەكتار القاپقا وسىنداي ءادىس قولدانىلادى.
ءار جىل سايىن ەگىس القاپتارىن تىڭايتقىشپەن بايىتۋ دا قولعا الىنعان. اۋدان ديقاندارى 4,5 مىڭ توننا امموفوس, امياكتىق سەليترا, سۋلفوامموفوس تىڭايتقىشتارىن ساتىپ العان.
جىل سايىن تۇقىمدى جاڭالاپ وتىرۋعا, ساپاسىن جاقسارتۋعا كوپ كوڭىل بولەمىز. كوكتەمگى ەگىسكە قاجەتتى 55,8 مىڭ توننا تۇقىم زەرتحانادا ساراپتامادان وتكىزىلدى. ساپالى تۇقىممەن ءوزىمىزدى عانا ەمەس, كورشىلەس اۋدان شارۋاشىلىقتارىن دا قامتۋعا قاۋقارىمىز جەتەدى, – دەيدى اۋدان اكىمىنىڭ ورىنباسارى رۇستەم رامازانوۆ, – قازىر ءبىزدىڭ شارۋاشىلىقتاردا 15 توننادان استام تۇقىم ساتۋعا قويىلعان.
ءبىر جاقسىسى, ماشينا-تراكتور پاركى دە ءىشىنارا جاڭارۋ ۇستىندە ەكەن. وتكەن جىلى 125 قۋاتتى تەحنيكا ساتىلىپ الىنىپتى. كوكتەمگى دالا جۇمىستارىنا قاجەتتى ءار ءليترى 183 تەڭگەدەن باعالانعان 6110 توننا ديزەل وتىنى جەتكىزىلگەن.
جاقسى اۋىلىنىڭ ىرگەسىندەگى «ايبات» جاۋاپكەرشىلىگى شەكتەۋلى سەرىكتەستىگىندە بولعانىمىزدا شارۋاشىلىق باسشىسى اسقار جاپاروۆپەن تىلدەستىك. باسشىنىڭ ايتۋىنا قاراعاندا, وتكەن جىلى سەرىكتەستىك 26434 توننا استىق جيناعان ەكەن. اگروتەحنيكالىق شارالاردى ۋاقتىلى ورىنداۋىنىڭ ارقاسىندا گەكتار بەرەكەسى 17,3 تسەنتنەردەن اينالىپتى. بۇل جاقسى كورسەتكىش. سەرىكتەستىك ديقاندارى شەتەلدىك اۋىل شارۋاشىلىعى تەحنيكالارىنىڭ كەيبىر اقاۋلارىن ارنايى تسەحتا جوندەۋ ۇستىندە. كوكتەمگى دالا جۇمىستارىن 19 مامىردا باستاپ, ون كۇننىڭ ىشىندە اياقتاپ شىعۋدى مەجەلەپ وتىر.
جاقسىنىڭ جالپاق دالاسىن يگىلىك القابىنا اينالدىرعان قاجىرلى جاندار قاۋىرت ناۋقانعا تىڭعىلىقتى دايىندىق جاساعان ەكەن. كوكتەن ءيىپ, جەردەن بەرسە, ىرىزدىق تا مول بولارى ءسوزسىز.
اقمولا وبلىسى,
جاقسى اۋدانى
