باسپانالى بولىپ, قۋانىشقا كەنەلگەن كۇلزيرا ابدۋللاەۆا بايقادام اۋىلدىق وكرۋگىندە تۇرادى. وزدەرىنىڭ جەكە ۇيلەرى بولماعاندىقتان, ولار ۇزاق جىلدار بويى جالدامالى پاتەردە تۇرىپ كەلگەن. بۇگىندە باسپانالى بولعان وتباسى تۇرعىن ءۇي ماسەلەسىن شەشىپ بەرگەن كاسىپكەر توقتاسىن بىلاليەۆكە العىس ايتتى. «وسى ءبىر قۋانىشتى ءساتتى ءبىز ۇزاق جىل كۇتتىك. ەندى مىنە قامقور جانداردىڭ ارقاسىندا ءبىزدىڭ ءوز ءۇيىمىز بار. توقتاسىن بىلاليەۆ جەرلەسىم, ءوزى دە كوپ بالالى وتباسىندا وسكەن ازامات. كومەگى مەن قامقورلىعى ءۇشىن ول كىسىگە العىس بىلدىرەمىن. جەر اۋماعى كەڭ, جەمىس تالدارى مول ۇيگە قول جەتكىزگەنىمە سەنە الار ەمەسپىن. ەندى ۇيىمە باۋ-باقشا ەگىپ, بالالارىمنىڭ يگىلىگىنە جاراتامىن», دەيدى بەس بالانىڭ اناسى كۇلزيرا ابدۋللاەۆا. ال, ءوز كەزەگىندە توقتاسىن بىلاليەۆ كاسىپكەرلەردى مۇقتاج جاندارعا ءاردايىم قول ۇشىن سوزۋعا شاقىردى. «وسىنداي قايىرىمدى ىستەن ەشكىم تىس قالماۋى كەرەك. بىزدەر, كاسىپكەرلەر مۇقتاج جاندارعا قولدان كەلگەن كومەگىمىزدى اياماعانىمىز ءجون. بيزنەس وكىلدەرى بۇل باستاماعا قولداۋ كورسەتىپ, از قامتىلعان وتباسىلارعا كومەك كورسەتەدى دەپ سەنەمىن», دەيدى كاسىپكەر.
سونىمەن قاتار, سارىسۋ اۋدانىنىڭ ورتالىعى جاڭاتاس قالاسىندا قازاقستاننىڭ قۇرمەتتى قۇرىلىسشىسى, «التىن وردا – 2006» جشس باسشىسى داۋلەتالدى جانباەۆ جەتى بالانىڭ اناسى گۇلسانا قاليەۆاعا ءۇش بولمەلى پاتەر كىلتىن تابىستادى. «ءاردايىم ءوز ءۇيىمىز بولسا دەپ ارمانداۋشى ەدىك. بىزگە كومەكتەسكەن ازاماتتارعا العىس ايتامىن. جەتى بىردەي بالام بار. ونىڭ ءبىرى مۇگەدەك. بالالاردى جالعىز ءوزىم قالاي اسىراپ, جەتىلدىرىپ, قاشان پاتەر الامىن دەپ ۋايىمداۋشى ەدىم. قاسيەتتى ايدا توسىننان كەلگەن سىي وتباسىمىزدى قۋانتتى. بىزدەردىڭ جاعدايىمىزدى ويلاعان وبلىس اكىمى اسقار مىرزاحمەتوۆكە, سونىمەن قاتار كاسىپكەر ازاماتتارعا العىس ايتامىن», دەيدى گۇلسانا قاليەۆا. سونىمەن قاتار, كوپبالالى انا كاسىپكەر داۋلەتالدى جانباەۆقا العىسىن ءبىلدىردى.
جاڭاتاس قالاسىندا ورنالاسقان پاتەر جارىق ءارى تازا. بارلىق بولمەسى زاماناۋي جوندەۋدەن وتكەن. ال, كوپبالالى اناعا باسپانا الىپ بەرگەن كاسىپكەر داۋلەتالدى جانباەۆ جاقسىلىق جاساۋدى ءوزىنىڭ ازاماتتىق پارىزى دەپ بىلەتىنىن ايتتى. «بالالاردىڭ بۇگىنگى قۋانىشتى جۇزدەرىنە قاراپ تۇرىپ, ءوزىم دە قۋاندىم. بۇل پاتەر گۇلسانا قارىنداسىمىزدىڭ يگىلىگىنە جاراسىن. بالالارى ۇلكەن ازامات بولىپ, ەل تىرەگىنە اينالسىن», دەدى كاسىپكەر.
جامبىل وبلىسى
