سەكسەن كولدى ومىراۋىنا التىن القا ەتىپ تاققان كوكشەتاۋ مەن قورعالجىن وڭىرىندە بالىق وسىرۋگە مۇمكىندىك مول. وسى مۇمكىندىكتى قالت جىبەرمەگەن اكەلى-بالالى شيشكيندەر ساندىقتاۋ, زەرەندى, اتباسار اۋداندارىنىڭ اۋماعىنداعى ءتورت توعاندى جالعا العان. ارينە, تابيعاتقا زالال كەلتىرمەۋ ءبىرىنشى كەزەكتە. ەسەسىنە بۇرىن بالىق تۇگىل باقا ورىستەمەگەن كەيبىر توعاندار قازىر ىرىسقا شۇپىلدەپ تۇر. كاسىپكەرلەر چەليابينسك قالاسىنداعى بالىق تۇقىمدارىن وسىرەتىن زاۋىتتان 15 ميلليون موڭكە بالىعىنىڭ شاباعىن اكەلىپ, كولگە جىبەرگەن. ارقانىڭ كەيبىر كولدەرى تىم تايىز بولىپ كەلەدى. سوندىقتان, قىس بويى مۇزىن ويىپ, وتتەگىن جىبەرىپ كۇتپەسە جانە بولمايدى.
– بالىق سىرىن جەتە مەڭگەرۋ ءۇشىن ونىمەن تۇبەگەيلى اينالىسۋ كەرەك,–دەيدى كاسىپكەر يۋري شيشكين,–ماسەلەن, ءبىز بالىق تابيعاتىن, ونى ءوسىرۋدىڭ قىر-سىرىن جەتە مەڭگەرۋگە تىرىسۋدامىز. كولدەگى بالىق كوبەيسە, جالعىز كاسىپكەر ءۇشىن ەمەس, ەلگە دە پايدالى. ايدابول كولىندە بالىقتىڭ 7-8 ءتۇرى بار. قىسى-جازى بالىق اۋلاۋعا كەلەتىن بالىقشىلار كوپ. ال ءبىز بولساق, سۇيەگى از, ەتى تولىمدى بالىق تۇرلەرىن كوبەيتۋگە مۇددەلىمىز. دەمەك, تابيعاتتان العانىمىزبەن وعان بەرە دە بىلەمىز.
كاسىپكەر تىلگە تيەك ەتىپ وتىرعان ايدابول كولىنە بيىلعى جىلى 12 ميلليونعا جۋىق شاباق جىبەرىلگەن ەكەن. مامانداردىڭ بولجامىنا قاراعاندا, وسىنشاما شاباقتىڭ 40 پروتسەنتكە جۋىعى قاتارعا قوسىلىپ كەتۋى ابدەن مۇمكىن. دەمەك, كاسىپكەردىڭ جوعارىدا ايتقان پىكىرىنىڭ جانى بار.
– مەن اۋەسقوي بالىقشىمىن ءارى قوعامدىق نەگىزدەگى قورىقشىمىن,–دەيدى ۆيكتوروۆكا سەلوسىنىڭ تۇرعىنى الەكساندر اكينچين, – وسى كول بۇرىن قاراۋسىز جاتقان. بالىعى بار كەزدە كول ۇستىندە قۇستاي قاپتاعان اۋەسقوي بالىقشىلار بالىق ازايعان سوڭ كورىنبەي كەتىپ ەدى. ەندى مىنە, قايتادان قاپتادى. ويتكەنى, كولدى ۇزاق مەرزىمگە جالعا العان كاسىپكەرلەردىڭ ارقاسىندا بالىق ورىستەي باستادى. دەمەك, ءار ىسكە يە كەرەك.
مەملەكەت تاراپىنان اۋىل شارۋاشىعىمەن اينالىساتىن كاسىپكەرلەرگە تولىمدى كومەك كورسەتىلۋدە. بالىق شارۋاشىلىعى دا ەسكەرىلسە ەكەن دەيسىز. ويتكەنى, بۇل دا اق داستارحاننىڭ بەرەكەسىن ارتتىراتىن ىرىستىڭ ءبىر ءتۇرى عوي.
اقمولا وبلىسى
ساندىقتاۋ اۋدانى
