قازىر وڭىردە 4 جانە ودان دا كوپ بالانى تاربيەلەپ وتىرعان 3839 وتباسى بولسا, تۇرعىن ءۇي كەزەگىندە تۇرعان 691 كوپ بالالى وتباسىنىڭ جاعدايى تۇراقتى نازاردا. جالپى, ءوڭىردىڭ جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ مالىمەتىنشە, بيىل وبلىستاعى كوپ بالالى جانە از قامتىلعان وتباسىلاردى الەۋمەتتىك قولداۋعا 3 ملرد تەڭگە قاراستىرىلدى.
ءساۋىر ايىنان باستاپ از قامتىلعان وتباسىلارداعى ءار بالاعا بەرىلەتىن ايلىق ءتولەماقى 20789 تەڭگەگە جەتىپ, اتاۋلى الەۋمەتتىك كومەكتى ەسەپتەۋدىڭ جاڭا تەتىگى ەنگىزىلگەنى بەلگىلى. وڭىردەگى از قامتىلعان 1251 وتباسى جالپى سوماسى 100 ميلليون تەڭگە بولاتىن قارجىلاي قولداۋعا يە بولدى.
– اقسۋ قالاسى مەن اقسۋ اۋىلدىق اۋماعىنا قاراستى اۋىلداردا تۇراتىن كوپ بالالى وتباسىلارمەن كۇندەلىكتى جۇمىس ىستەۋدەمىز. قالا مەن اۋىلدىق اۋماقتا كوپ بالالى 380 وتباسى تۇراتىن بولسا, ولاردىڭ 108-ءى تۇرعىن ءۇي كەزەگىنە جازىلعان. سونىمەن بىرگە 37 جاعدايى تومەن وتباسىن جەكە باقىلاۋعا الدىق. كوپ بالالى انالارمەن كەزدەسىپ, ولاردى جەكە قابىلداۋ بارىسىندا بارلىعىنىڭ قانداي مۇقتاجدىقتارى بارىن, ماسەلەلەرىن انىقتادىق, – دەيدى قالا باسشىسى بالعاباي ىبىراەۆ.
ال جولقۇدىق اۋىلىندا تۇراتىن قۋاندىق ماسىمبەك پەن نۇرباقىت نيازدىڭ وتباسىنا, كوپ بالالى انا الماگۇل ورداباەۆاعا قالاداعى «ەۋروازياتتىق ەنەرگەتيكالىق كورپوراتسياسى» اق ۆيتسە-پرەزيدەنتى تاتيانا نوساچەۆا ارنايى بارىپ, وتباسىن تۇراقتى قامقورلىققا الىپ, كورپوراتسيا اتىنان 120 مىڭ تەڭگەنىڭ ەكى تورپاعى, ازىق-ت ۇلىك تولى پاكەتتەر, ءتاتتىلەر, بالالارعا ارنالعان كيىم-كەشەك تابىستادى. كورپوراتسيانىڭ ءوندىرىستىك ۇجىمى بۇعان دەيىن دە بەرەكە, م.وماروۆ اتىنداعى اۋىلداردا تۇراتىن كوپ بالالى وتباسىلارعا كومەك كورسەتكەن.
