يگى شارا بارىسىندا پارلامەنت ءماجىلىسىنىڭ دەپۋتاتتارى نۇرلان دۋلاتبەكوۆ, ارمان قوجاحمەتوۆ, وبلىس اكىمىنىڭ ورىنباسارى اسحات ايماعامبەتوۆ, Nur Otan پارتياسى فيليالىنىڭ, ەتنومادەني بىرلەستىكتەردىڭ وكىلدەرى, مەتسەناتتار جانە قحا «جاڭعىرۋ جولى» قوزعالىسى وڭىرلىك شتابىنىڭ جاستارى قولدارىنا كۇرەك الىپ, كوشەت وتىرعىزدى.
جەرگىلىكتى ءماسليحات دەپۋتاتى, مەتسەنات, ايماقتىڭ وركەندەۋىنە ۇلەس قوسىپ جۇرگەن يۆان گەورگيادي باستاماشى بولعان اكتسيا بارىسىندا اراسىندا قاراعاي, شىرشا, پيراميدالى تەرەك جانە الما اعاشتارى بار 100 كوشەت ەگىلدى. وتىرعىزىلعان شىبىقتاردىڭ ءبارى دە جەرگىلىكتى تابيعي-كليماتتىق جاعدايىنا بەيىمدەلگەن سۇرىپتاردان ەكەنىن ايتا كەتكەن ءجون.
ءماجىلىس دەپۋتاتى نۇرلان دۋلاتبەكوۆ ۇيىمداستىرىلعان يگى شارانىڭ اسسامبلەيا داستۇرلەرىنىڭ جالعاسى ەكەنىن اتاپ ءوتىپ, جىلى لەبىزىن ءبىلدىردى.
كورەي ەتنومادەني بىرلەستىگىنىڭ ءتورايىمى ليليا كيم اتالعان اكتسياعا ءتۇرلى ەتنوس وكىلدەرىنىڭ ءبىر كىسىدەي ات سالىسقانىنا قۋانىشتى ەكەنىن جەتكىزدى.
– بۇگىنگى ەگىلگەن جاس كوشەتتەر بىرنەشە جىلدا گۇلدەنىپ, ۇلكەن اللەياعا اينالاتىنىنا سەنىمىمىز مول. جارقىن بولاشاقتا بۇگىنگى قاتىسۋشىلاردىڭ ءبىرى نەمەرەسىن وسى باققا اكەلىپ, ءوزى وتىرعىزعان ماۋەلى اعاشتى كورسەتەتىن بولار, – دەدى ل.كيم.
ال «نامۋس» ازەربايجان مادەني ورتالىعىنىڭ توراعاسى گيۋلاعا رزاەۆ مۇنداي شارالاردىڭ جاستار ءۇشىن ۇلگى بولاتىنىن, ءارى ەتنوسارالىق تاتۋلىقتىڭ ىرگەسىن بەكىتە تۇسەتىنىن اتاپ ءوتتى.
