فەستيۆالگە قاتىسقان ءار ۇلت ءوزىنىڭ تانىم-تاريحىن, قاسيەت قالىبىن تانىتاتىن ۇلتتىق قۇندىلىقتارىن پاش ەتۋگە تىرىسىپ باقتى. باستى ۇستانىمىمىز بىرلىك دەپ ۇرانداتقان قحا قاراستى ەتنومادەني بىرلەستىكتەردىڭ وكىلدەرى جينالعاندار نازارىنا وزدەرىنىڭ باي داستارحاندارىن ۇسىندى. ۇيىمداستىرۋشىلار شارانىڭ نەگىزگى ماقساتى حالىقتار اراسىنداعى ىنتىماقتاستىق مادەنيەتىن قالىپتاستىرۋ. سول ارقىلى كوپشىلىكتى قازاقستاندا تۇراتىن ەتنوستاردىڭ اسپازدىق ەرەكشەلىكتەرىمەن تانىستىرۋ جانە ءتۇرلى ەتنوستار اراسىنداعى مادەنيەتارالىق تۇسىنىستىكتى نىعايتۋ ەكەنىن ايتادى. قاتىسۋشىلار ءار ەتنوستىڭ قوناق كۇتۋ سالتى, تاعامدارىنىڭ دەنساۋلىققا پايداسى, ازىرلەنۋ ادىستەرى تۋرالى اڭگىمەلەپ, ءان مەن بيدەن شاشۋ شاشتى.
فەستيۆالگە قاتىسقانداردىڭ ىشىندە كاسىبي اسپازدارمەن قاتار مۇعالىم, دارىگەر سىندى باسقا سالانىڭ قازانىندا قايناعان اۋەسقوي اسپازدار دا بولدى. «قولىڭ ءتاتتى بولسا, دايىنداعان استىڭ دا ءدامى ءتىل ۇيىرەدى. ەگەر اس جاقسى نيەتپەن, ماحابباتپەن, كوتەرىڭكى كوڭىل-كۇيمەن ازىرلەنسە ءسوزسىز ءدامدى بولادى, دەيدى تاعام كورمەسىنە قاتىسۋشىلاردىڭ ءبىرى قازىنا بەكەتوۆا.
م «بىرلىك دەگەن ۇعىمنىڭ ءسوز كۇيىندە قالىپ قويماي, ىسپەن دالەلدەنگەنى قانداي جاقسى. ۇزبەي وتكىزىلىپ كەلە جاتقان بۇگىنگى ءداستۇرلى تاعامدار كورمەسى سونىڭ ايعاعى» دەگەن قوعام قايراتكەرى اسلى وسمان, قيىن تاعدىردىڭ قيلى كەزەڭىندە پانا سۇراپ كەلگەن بارشا جۇرتتى باۋىرىنا باسقان قازاق ەلىنىڭ قۇشاعى, كەڭ داستارحانى قاشاندا جيىلماي كەلە جاتقانىن ايتادى.
