سايلاۋ مەرزىمىنە از عانا ۋاقىت قالدى. ساراپشىلاردىڭ پىكىرىنشە, كانديداتتاردىڭ جەر-جەرلەردى ارالاپ ءوز ۇستانىمدارىن, سايلاۋالدى باعدارلامالارىن جۇرتشىلىققا تولىققاندى جەتكىزۋىنە ۋاقىت تار. سوندىقتان مەملەكەتتىك اقپارات كوزدەرى باستاعان ءباسپاسوز قۇرالدارى ۇمىتكەرلەردىڭ ءۇنىن حالىققا جەتكىزۋدە بارىنشا بەلسەندىلىك تانىتۋعا ءتيىس. وسى رەتتە سالماعى اقپارات قۇرالدارىنان كەم تۇسپەيتىن الەۋمەتتىك جەلىلەردى دە بۇل جۇمىستارعا وڭىنان پايدالانعان ءجون. پىكىرتالاستار ۇيىمداستىرۋدىڭ, ۇمىتكەرلەردىڭ ماقسات-مىندەتتەرىن تانىتاتىن بەينەروليكتەردى كوبىرەك ۇسىنۋدىڭ ماڭىزدىلىعى زور.
– ءبارىمىز كورىپ وتىرعانداي ەل تاريحىندا تۇڭعىش رەت پرەزيدەنتتىك سايلاۋعا ايەل ادام تۇسكەلى وتىر. ايتپاعىمىز, «اقجول» پارتياسىنان سىنعا تۇسەتىن دانيا ەسپاەۆا تۋرالى. بۇل قوعامنىڭ ءبىرشاما جاڭارعانىن, ايەل زاتىنا دەگەن كوزقاراستىڭ وزگەرگەنىن كورسەتەدى. ءبىز مۇنى بولاشاقتا ايەل ازاماتتاردىڭ ساياسي ناۋقاندارعا ارالاسىپ, بەلسەندىلىك تانىتۋىنا جول اشاتىن جاقسى مۇمكىندىك دەپ ەسەپتەيمىز. باستى ماسەلە, ومىرگە جاڭا ۇرپاق كەلدى. قوعامنىڭ ەتنودەموگرافياسى وزگەردى. توقسانىنشى, 2000-شى جىلدارداعى ەرەجەلەردى بىلمەيتىن, ولاردى مويىنداي بەرمەيتىن تاۋەلسىزدىك ۇرپاقتارى بوي كورسەتتى. ولاردىڭ سايلاۋ مەن سايلاۋ ينستيتۋتىنا دەگەن كوزقاراسى قانداي دەگەن ساۋال تۋىندايدى. ءبىز ولاردىڭ سايلاۋ مادەنيەتىن قالىپتاستىرۋعا, جالپى ساياساتقا ارالاسۋىنا مۇمكىندىك بەرۋىمىز كەرەك. بيلىك ءوزىنىڭ جالعىز كانديداتىن ۇسىنىپ بىرلىگىن دالەلدەدى. قوعامعا ءبارىمىز ءبىراۋىزدان ءموناليتتى تۇردە سايلاۋعا شىقتىق دەگەن ناقتى سيگنال بەرىلدى. قوعامنىڭ ساياسي مادەني جاۋاپكەرشىلىگى بيىك بولۋى كەرەك. بۇل مەنىڭ مەملەكەتىم. بۇل مەملەكەتتىڭ ىشىندە بولىپ جاتقان دۇنيەلەر ماعان تىكەلەي قاتىستى دەگەن پايىم, فيلوسوفيا, ساياسي مادەنيەت تۇسىنىك بار ما, جوق پا دەگەن ماسەلەلەر تۋىندايدى. ءادىل سايلاۋ وسىنى قالىپتاستىرادى. وكىنىشكە وراي, بىزدە بۇل سايلاۋ نە شەشەدى, مەن قاتىسقاننان نە وزگەرەدى دەگەن قولدى ءبىر سىلتەۋشىلىك بار. ەڭ قاۋىپتى ۇدەرىس وسى. سايلاۋدا ۇيدە جاتىپ قالۋ ازاماتتاردى مەملەكەتتىڭ دەنەسىنەن اجىراتىپ قالاتىن دۇنيە سەكىلدى. ءبىز ءبىر اعزامىز. قوعام دا. مەملەكەت تە. ەلىمىزدە بولىپ جاتقان ءار وزگەرىسكە ءبىزدىڭ قاتىسىمىز بار دەگەن ماسەلەنى ايتۋ, قالىپتاستىرۋ اسا ماڭىزدى, – دەيدى ساياساتتانۋشى ايدوس سارىم.
كونفەرەنتسيانى جۇرگىزگەن ساياسي عىلىمداردىڭ دوكتورى ەسەنجول الياروۆ مەملەكەتتىڭ دامۋ جولىندا پرەزيدەنتتىك سايلاۋدىڭ اتقاراتىن ءرولى جوعارى ەكەنىن, ەل ەرتەڭىن سىنعا سالعان تاعدىرشەشتى ساتتە وتانداستارىمىز تۇتاستاي بەلسەندىلىك تانىتۋ قاجەتتىگىن ايتادى. وسى پىكىرگە قوسىلعان ساياساتتانۋشىلار ەكونوميكا, الەۋمەت سىندى مەملەكەتتىڭ نەگىزگى تىرەگى سانالاتىن سالالاردى ورىستەتۋگە كۇش سالاتىن كوشباسشى عانا ساياسي تۇراقتىلىقتى ودان ءارى جالعاي الاتىنىن جەتكىزدى.
جينالعاندار, حالىق ۇمىتكەرلەردەن مەملەكەتتى وركەندەتۋگە باعىتتالعان ناقتى قادام كۇتەدى. ەڭ باستىسى كوپشىلىكتىڭ تاڭداۋى سىن ساعاتتا ەل مۇددەسىن قورعاي الاتىن كانديداتتار مەن تۇلعالارعا ءتۇسۋى كەرەك دەگەن پىكىرگە توقايلاستى.
الماتى
