وعان قاتىسۋشىلار قازاقستان ەڭبەك نارىعىنىڭ قازىرگى جاعدايى مەن دامۋ كەلەشەگىن تالقىلاپ, الەۋمەتتىك ساۋالناما قورىتىندىسىن تانىستىردى. K-Bagdar قوعامدىق قورىنىڭ ساراپشىلارى دامىعان ەلدەردىڭ تاجىريبەسىنە زەرتتەۋ جۇرگىزۋ نەگىزىندە جۇمىسپەن قامتۋ ورتالىقتارىن جاڭعىرتۋ جانە ولاردىڭ قىزمەتىن جەتىلدىرۋگە ارنالعان ءىس-شارالار جوسپارىن ۇسىندى, وعان كەلەسى ءىس-شارالار كىرىپ وتىر: جۇمىسپەن قامتۋ ورتالىقتارىنا دەگەن سەنىمدى كوتەرۋ, جاردەماقىنىڭ ماڭىزدىلىعىن ارتتىرۋ, جاستارمەن جانە 50 جاستان اسقان تۇلعالارمەن جۇمىس جاساۋ, مەكتەپ وقۋشىلارىنا كاسىبي باعدار بەرۋ جۇيەسى, جۇمىس بەرۋشىلەرگە بەرىلەتىن ارتىقشىلىقتار, اقپاراتتىق-تۇسىندىرمە جۇمىستارىن جۇرگىزۋ ستراتەگياسى, جۇمىسپەن قامتۋ ورتالىقتارى قىزمەتكەرلەرىنىڭ بىلىكتىلىگىن كوتەرۋ.
ماسەلەن, كومپانيالاردى ەكونوميكالىق تۇرعىدا ىنتالاندىرۋ ارقىلى جاستاردى جۇمىسقا تارتۋعا ارنالعان شارالار ۇسىنىلىپ وتىر: مەملەكەت ەسەبىنەن الەۋمەتتىك جانە سالىقتىق تولەمدەر بويىنشا شىعىنداردى وتەۋ; جۇمىسپەن قامتۋ ورتالىقتارى جانىنان جاستار مانسابىنىڭ ورتالىعىن قۇرۋ; جوعارعى سىنىپ وقۋشىلارىن وقۋدان تىس ۋاقىتىندا ولاردىڭ تاڭداعان ماماندىعى بويىنشا قوعامدىق جۇمىستارعا ورنالاستىرۋ, سونداي-اق, KASIP تسيفرلىك جۇيەسى ارقىلى مەكتەپ وقۋشىلارىمەن كاسىبي باعدار بەرۋ جۇمىستارىن جۇرگىزۋ.
ساراپشىلار جۇمىس بەرۋشىلەرگە قولداۋ كورسەتۋ شارالارى ىشىندە مۇگەدەكتەردى جۇمىسقا الاتىن جۇمىس بەرۋشىلەرگە جالاقىنىڭ ءىشىنارا سۋبسيدياسىن, جۇمىس ورىندارىنىڭ قىسقارۋىنا جول بەرمەۋ ءۇشىن بىلىكتى جۇمىسشىلاردىڭ ايىرىلعان تابىسىن ءىشىنارا وتەۋ, قىزمەتكەرلەر بىلىكتىلىگىن كوتەرۋ ءۇشىن مەملەكەتتىك گرانتتار ۇسىنۋ سىندى شارالاردى ۇسىنىپ وتىر. ساراپشىلاردىڭ پىكىرىنشە, وسىنداي ىنتالاندىرۋ ادىستەرىن ەندىرۋ جۇمىسپەن قامتۋ ۇلەسىن ۇلعايتىپ, بىلىكتى كادرلاردىڭ سانىن ساقتاپ ارتتىرۋعا جاعداي جاساماق.
سونداي-اق, ساراپشىلار soft-skills داعدىلارىن دامىتۋعا, مەملەكەتتىك جۇمىسپەن قامتۋ قىزمەتتەرىندە ەڭبەك ەتەتىن قىزمەتكەرلەردىڭ ءوزىنىڭ بىلىمدەرى مەن داعدىلارىن جەتىلدىرۋگە ەرەكشە كوڭىل ءبولىپ وتىر. Soft skills, ياعني «يكەمدى» الەۋمەتتىك داعدىلار – قارىم-قاتىناس قۇرا ءبىلۋ, ۋاقىتتى باسقارۋ, كوشباسشىلىق ساپالار, كرەاتيۆتىلىك – مۇنىڭ ءبارى قازىرگى زامانعى ەڭبەك نارىعىنداعى تۇراقتى ترەند بولىپ تابىلادى.
زەرتتەۋشىلەردىڭ كۇتىپ وتىرعان ۇمىتتەرىنە سايكەس دايىندالعان شارالار ازاماتتاردىڭ ۇزاق مەرزىمدى جانە ناتيجەلى ەڭبەككە تۇرۋىنا جاعداي جاساماق.
