سەمينار جۇمىسىنا استانانىڭ 50 مەملەكەتتىك بالاباقشاسىنىڭ جەتەكشىلەرى مەن جاس ماماندارى قاتىستى. شارانىڭ نەگىزگى ماقساتى – مەكتەپكە دەيىنگى ۇيىمداردا روبوتوتەحنيكا تۋرالى ءبىلىم بەرۋ اياسىنداعى تاجىريبەمەن الماسۋ.
№54 بالاباقشانىڭ ورىنباسارى زارياكۇل يمانباەۆا قوناقتارعا مۋلت-ستۋديانى, روبوتوتەحنيكا جانە ارت-تەراپيا كابينەتتەرىن كورسەتتى.
«الەمنىڭ ۇزدىك ساراپشىلارىنىڭ ايتۋىنشا, 2025 جىلعا قاراي روبوتتاردىڭ قىزمەت كورسەتۋى جانە باسقارۋ ەڭ قاجەتتى ماماندىق بولادى. ءبىزدىڭ جاس ۇرپاق زامانعا ساي بولۋى ءۇشىن ولاردى جاستايىنان جاڭا داعدىلاردى ۇيرەنۋگە بەيىمدەۋ كەرەك. ءبىزدىڭ بالاباقشادا بۇل باعىتتا ءبىلىم بەرۋ 3-4 جاستان باستالادى. روبوتوتەحنيكا ءتۇرلى ەلەمەنتتەردى قولدانۋ ارقىلى جوبالاۋ مەن جاساپ شىعارۋعا داعدىلاندىرادى. بالا روبوتتى مودەلدەۋدى ۇيرەنەدى, قوسىمشانىڭ ماقساتىن انىقتايدى, باعدارلامانى قۇراستىرادى جانە ونى باسقارۋدى ۇيرەنەدى. ارينە, جۇمىس كەزىندە بالانىڭ جاسى ەسكەرىلەدى», – دەدى ول.
سونىمەن قاتار, ونىڭ ايتۋىنشا, قۇراستىرۋ بالانىڭ ۇساق موتوريكاسىن دامىتۋعا, سول ارقىلى سويلەۋ قابىلەتىنىڭ دامۋىنا, وڭاي بەيىمدەلۋىنە مۇمكىندىك بەرەدى.
«بالالاردىڭ قىزىعۋشىلىعى وتە جوعارى, ۇيىرمەگە 140 شاقتى بالا قاتىسادى. سونىمەن قاتار, بالاباقشاداعى باسقا بالالار دا وسى جيناقتاردى پايدالانۋ مۇمكىندىگىنە يە. ولاردىڭ تاربيەشىلەرى ءوز ساباقتارىندا قۇراستىرۋدى پايدالانا الادى», – دەپ قورىتىندىلادى ول.
