«ازيا بىرىنشىلىگى وتە ءساتتى ءوتتى جانە جوعارى دەڭگەيدە ۇيىمداستىرىلعان. بۇل مەن قاتىسقان العاشقى ءىرى جارىستاردىڭ ءبىرى. ءدۇبىرلى دودادا ەلىمىزگە التىن جۇلدە سىيلاپ, ءانۇرانىمىزدى شىرقاتقانىمىز ءۇشىن قۋانىشتىمىن. قۇرلىق باسەكەسىندە بارلىق كەزدەسۋلەرىم دە وڭاي بولعان جوق. اسىرەسە, فينالعا جولداما بەرەتىن بەلدەسۋدە وتە تالانتتى يران بالۋانىن جەڭدىم. وسى كەزدەسۋىم كوپكە دەيىن ۇمىتىلماسى حاق. ال فينالعا وتكەن سوڭ, جانكۇيەرلەردى جەرگە قاراتپاي, قول سوزىم جەردەگى التىننان كوز جازىپ قالماۋ ءۇشىن بارىمدى سالدىم. بۇل جەڭىسىمدى باپكەرلەرىم مەن ماعان جانكۇيەر بولعان بارشا قازاق ەلىنە ارنايمىن. ەندىگى ماقسات – ءوز ەلىمىزدە وتەتىن الەم چەمپيوناتىندا كوك تۋىمىزدى كوتەرۋ», - دەيدى 20 جاسىندا توپ جارعان نۇرقوجا قايپانوۆ.
ال ازيا ويىندارىنىڭ اقتىق سىنىندا ءسۇرىنىپ, بيىلعى قۇرلىق چەمپيوناتىندا قارسىلاس شىداتپاعان دانيار قايسانوۆ ەڭ نەگىزگى قارسىلاسىنىڭ جارىستان سىرت قالعانىن ايتادى.
«مەنىڭ سالماعىمدا 16 بالۋان كۇرەستى. بارلىعىن دا جاقسى بىلەمىن. ال ءوزىم ءۇشىن ەڭ اۋىر كەزدەسۋ موڭعول سپورتشىسىنا قارسى ءوتتى. ول جاقىندا موڭعوليا چەمپيونى اتانعان جانە ازيا چەمپيوناتىندا توپ جارعان بالۋان. دەسە دە, ءوز تاجىريبەم مەن شەبەرلىگىم ارقاسىندا جەڭىسكە جەتتىم. ايتپاقشى, مەنىڭ ەڭ ازۋلى قارسىلاسىم, رەسەيدىڭ ەكى دۇركىن چەمپيونى ادام باتىروۆ جاراقاتىنا بايلانىستى كىلەمگە شىققان جوق. ول بۇگىندە باحرەين اتىنان سىنعا ءتۇسىپ ءجۇر. بۇل مەدال مەنىڭ ءارى قاراي ۇزدىكسىز دايىندالىپ, الەم چەمپيوناتىندا ءساتتى ونەر كورسەتۋىمە سەرپىن بەرەدى. سونداي-اق, الداعى وليمپيادا ويىندارىنا جولداما الۋ ماقساتى ءبىرىنشى ورىندا تۇر. ەندى ءبىر اپتاداي دەمالىس الىپ, جاتتىعۋ جۇمىستارىنا قايتا كىرىسەمىن. مامىر ايىنىڭ اياعىندا يتاليادا رەيتينگىلىك جارىس وتەدى. سول باسەكەگە قاتىسامىن», - دەيدى قايسانوۆ.
ەسكە سالا كەتەيىك, ەركىن كۇرەستەن قازاقستان قۇراماسى اسەت سەرىكباەۆ جاتتىقتىرادى.
