24 ءساۋىر، 2019

BI Marathon حالىقارالىق سەرتيفيكاتسيادان ءوتتى

779 رەتكورسەتىلدى

وسى جىلعى BI Marathon - قازاقستانداعى ءۇش سەرتيفيكاتتالعان مارافوننىڭ ءبىرى بولدى. «حالىقارالىق جەڭىل اتلەتيكا فەدەراتسياسى (IAAF) جانە حالىقارالىق مارافون اسسوتسياتسياسىنىڭ (AIMS) سەرتيفيكاتىن العاننان كەيىن ونىڭ سپورتتىق جارىس رەتىندەگى مارتەبەسى كوتەرىلدى، دەپ حابارلايدى BI GROUP ءتىلشىسى.

سونىمەن بۇل سەرتيفيكاتتىڭ قانداي ماڭىزى بار، بۇل تۋرالى BI Marathon سپورت ديرەكتورى سەرگەي بودروۆ ايتىپ بەردى:

– وسى سەرتيفيكاتتىڭ ارقاسىندا ءبىزدىڭ مارافونشىلار الەمنىڭ ءىرى قالالارىندا وتەتىن مارافوندارعا قاتىسۋعا ۇمىتكەر بولا الادى، ولار: بوستون، بەرلين، چيكاگو، نيۋ-يورك جانە توكيو مارافوندارى. مارافون تراسساسىن ءبىز قالا تۇرعىندارىنىڭ تىلەكتەرىن ەسكەرە وتىرىپ جاسادىق. وعان قوسا، ءبىزدىڭ قاتىسۋشىلار ەلوردامىزدىڭ ەڭ كورىكتى جەرلەرىمەن اتاپ ايتساق، اق وردا، بايتەرەك، حان شاتىر، ورتالىق ساياباق جانە ەسىل جاعالاۋى سەكىلدى جەرلەرمەن جۇگىرىپ وتەدى، ال مارە سىزىعى ترياتلون پاركىندە بولادى.

سەرتيفيكاتتاۋدى تمد ەلدەرى اۋماعىندا ا ساناتىنداعى مارافوندار مەن جۇگىرىستەر تراسسالارىنىڭ رەسمي ولشەۋىشى يليا ميحايلوۆسكي جۇرگىزدى، ول وسى ۋاقىتقا دەيىن رەسەي مەن قازاقستانداعى 29-عا جۋىق مارافون تراسسالارىن ولشەۋگە قاتىسقان.

– ماعان سىزدەردىڭ جارقىن دا ادەمى قالالارىڭىز قاتتى ۇنادى، سول سەبەپتى  جۇمىس ىستەۋ ماعان دا جاقسى اسەر سىيلادى. ولشەۋ ەرەجەسى بويىنشا تراسسانىڭ بەتكى قاباتى مىندەتتى تۇردە اسفالتتالعان بولۋى كەرەك. اۋا-رايى جاعدايىنا بايلانىستى شاعىن قيىندىقتار تۋىندادى. ەرەجە بويىنشا، قار بار جەردە ولشەۋ جۇمىستارىن جۇرگىزۋگە بولمايدى. سول سەبەپتى جايلى جاعدايدى كۇتۋگە تۋرا كەلدى، دەيدى يليا ميحايلوۆسكي.

BI Marathon العاش رەت 2016 جىلى وتكىزىلدى، وسى ۋاقىت ارالىعىندا 2000-عا جۋىق ادامعا ارنالعان كورپوراتيۆتىك ءىس-شارادان حالىقارالىق دەڭگەيدە وتەتىن اۋقىمدى سپورتتىق شاراعا اينالدى. 2018 جىلى مارافونعا 22 ەلدەن قاتىسۋشى تىركەلدى. ال 2018 جىلى مارافونعا قاتىسۋشىلاردىڭ جالپى سانى 7200 ادامدى قۇرادى. ال وسى جىلى 10 000-عا جۋىق ادام قاتىسادى دەپ جوسپارلانۋدا.

BI Marathon 2019 جىلدىڭ 26 مامىرىندا استانا ترياتلون پاركىندە وتەدى. قازىر جارىسقا قاتىسۋ ءۇشىن تىركەلۋ ءجۇرىپ جاتىر.  جەڭىسكە بىرگە جەتەيىك!


سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار