پرەزيدەنت • 24 ءساۋىر، 2019

قاسىم-جومارت توقاەۆ ماجارستاننىڭ پرەمەر-ءمينيسترى ۆيكتور وربانمەن كەلىسسوزدەر وتكىزدى

761 رەتكورسەتىلدى

بۇل تۋرالى اقوردانىڭ ءباسپاسوز قىزمەتى حابارلادى.

رەسمي قارسى الۋ راسىمىنەن كەيىن ەكى ەل باسشىلارى ەكىجاقتى ىنتىماقتاستىق، وڭىرلىك جانە حالىقارالىق كۇن تارتىبىندەگى بىرقاتار وزەكتى ماسەلەلەر جونىندە كەلىسسوزدەر جۇرگىزدى.

قاسىم-جومارت توقاەۆ قازاق-ماجار ستراتەگيالىق سەرىكتەستىگىنىڭ ءوزارا سەنىمگە نەگىزدەلگەنىن اتاپ ءوتىپ، ماجارستاننىڭ پرەمەر-ءمينيسترى ءوزىنىڭ قازاقستان پرەزيدەنتى رەتىندە قابىلداپ وتىرعان العاشقى ەۋروپالىق باسشى ەكەنىن ايتتى.

– قازاقستان مەن ماجارستاندى ورتاق قۇندىلىقتار مەن تاريحي تامىر بىرىكتىرەتىنىن بىلەسىز. مەن سىرتقى ىستەر ءمينيسترى لاۋازىمىن اتقارعان كەزدەن باستاپ ەكىجاقتى قاتىناستارىمىزدىڭ قالىپتاسۋىنا كۋا بولدىم. ورتالىق ەۋروپا ەلدەرىنىڭ ىشىندە قازاقستاننىڭ ەلشىلىگى اشىلعان تۇڭعىش ەل بولعانى ءۇشىن ماجارستانعا ەرەكشە ريزاشىلىعىمىزدى بىلدىرەمىز، – دەدى قازاقستان پرەزيدەنتى.

مەملەكەت باسشىسى قازاقستاننىڭ سىرتقى ساياساتىندا تۇڭعىش پرەزيدەنت – ەلباسىنىڭ ستراتەگيالىق باعدارىن جالعاستىرا بەرەتىنىن، ەلىمىزدىڭ ماجارستانمەن جان-جاقتى ىنتىماقتاستىقتى نىعايتۋعا بەيىلدى ەكەنىن ايتتى.

قاسىم-جومارت توقاەۆ ۆيكتور ورباندى ماجارستاننىڭ ەۋروپالىق وداققا مۇشەلىگىنە 15 جىل جانە سولتۇستىك اتلانت شارتى ۇيىمىنا كىرگەنىنە 20 جىل تولۋىنا وراي قۇتتىقتادى. قازاقستان پرەزيدەنتى بۋداپەشتتىڭ حالىقارالىق ارەناداعى بەدەلىنىڭ ارتۋى جانە ماجار ەكونوميكاسىنىڭ تۇراقتى ءوسۋى قازىرگى ۇكىمەت ساياساتىنىڭ تيىمدىلىگىن كورسەتەتىنىن ايتتى.

تاراپتار سىندارلى ديالوگ پەن ءوزارا جەمىستى ءىس-قيمىلدار ەكى ەل حالىقتارىنىڭ يگىلىگى ءۇشىن ۇزاق مەرزىمدى نەگىزدە جالعاسا بەرەتىنىنە سەنىم ءبىلدىردى.


سوڭعى جاڭالىقتار

ۇقساس جاڭالىقتار