پاللياتيۆتىك كومەك – ايىقپاس دەرتكە شالدىققان ناۋقاستاردىڭ اۋرۋىن جەڭىلدەتۋ ماقساتىندا كورسەتىلەتىن الەۋمەتتىك-مەديتسينالىق قىزمەتتەر جيىنتىعى. 2018 جىلدىڭ مامىر ايىنان باستاپ جۇرگىزىلگەن زەرتتەۋ اۆتورى مارات ماماەۆتىڭ مالىمەتىنشە, قازاقستاندا شامامەن 27 مىڭعا جۋىق ادام پاللياتيۆتىك كومەككە ءزارۋ. ولاردىڭ دەنىن ابدەن اسقىنىپ, اقىرعى كەزەڭگە وتكەن ونكولوگيالىق اۋرۋلار قۇرايدى. دەنساۋلىق ساقتاۋ سالاسىنا بولىنەتىن قارجىنىڭ ازدىعىنا بايلانىستى بۇل كومەكتى سىرقاتتاردىڭ جارتىسى عانا پايدالانا الادى.
«ءبىز زەرتتەۋ بارىسىندا پاللياتيۆتىك كومەككە دەگەن سۇرانىسقا باعا بەردىك. ونىڭ رەسمي مالىمەتتەردەن ايىرماشىلىعى بولۋى دا ابدەن مۇمكىن. سەبەبى, ەسەپتەۋ ادىستەمەلەرىندە وزگەشەلىكتەر بار جانە پاللياتيۆتىك كومەك تۇرلەرىنىڭ ءبىرسىپىراسى بىزدە كورسەتىلەتىن مەديتسينالىق قىزمەتتەر تىزىمىنە ەنبەگەن. ادەتتە, ولار رەسمي ستاتيستيكادا باسقاشا اتاۋلارمەن, ستاتسيوناردى الماستىراتىن كومەك تۇرلەرى رەتىندە بەرىلەدى», - دەپ اتاپ ءوتتى ساراپشى.
سونىمەن, قازاقستاندا پاللياتيۆتىك كومەكتى دامىتۋعا نە كەدەرگى بولىپ وتىر؟ جوبانى تانىستىرۋ بارىسىندا ساراپشىلار ونىڭ نەگىزگى دەگەن ءۇش سەبەبىن اتاپ ءوتتى. ايتۋلارىنشا, بىزدە رىنوك دامىماعان جانە ناۋقاسقا پاللياتيۆتىك كومەكتى ۇيدە كورسەتەتىن قىزمەت مۇلدەم جوق دەۋگە بولادى. ەكىنشىدەن, اۋىر دەرتكە شالدىققان ناۋقاستاردى كۇتۋمەن اينالىساتىن تۋىستارىنا الەۋمەتتىك جاردەماقى تولەۋ ماسەلەسى شەشىلمەگەن. ۇشىنشىدەن, پاللياتيۆتىك كومەك كورسەتەتىن ارنايى مەكەمەلەردە ياعني, حوسپيستەر مەن ستاتسيونارلاردا ورىن جەتىسپەيدى.
«وكىنىشكە وراي, پاللياتيۆتىك كومەكتى ۇنەمى ءۇي جاعدايىندا كورسەتۋ مۇمكىن بولا بەرمەيدى. مىسالى, پاتسيەنتتىڭ ءۇيى تار بولۋى مۇمكىن. كەيدە اجال اۋزىندا جاتقان ناۋقاسقا كۇردەلى مەديتسينالىق كومەك تۇرلەرىن كورسەتۋ قاجەت بولىپ جاتادى. جالپى, ەلىمىز بويىنشا پاللياتيۆتىك كومەك كورسەتۋگە 41-اق ورىن بولىنەدى. ال, قازاقستاندا 1352 پاتسيەنت پاللياتيۆتىك كومەكتى قاجەت ەتەدى. ستاندارت بويىنشا, كومەكتىڭ بۇل ءتۇرىن كورسەتۋ ءۇشىن ءار 400 مىڭ ادامعا 30 ورىن ءبولىنۋى ءتيىس», - دەپ ءتۇسىندىردى «ۇلتتىق عىلىمي ونكولوگيا ورتالىعى» باسقارما توراعاسىنىڭ ورىنباسارى گۇلنار كۇلكاەۆا.
پاللياتيۆتىك كومەك سالاسىنداعى قارجى تاپشىلىعىن جويۋ ءۇشىن مەديتسينالىق قىزمەتتەرگە قوسىمشا 3,4 ملرد تەڭگە ءبولۋ كەرەك. وعان قوسا, ستاتسيونارلار مەن حوسپيستەردەگى ورىن تاپشىلىعىن بىرتىندەپ قىسقارتۋعا تاعى 1 ملرد تەڭگەگە جۋىق قاراجات قاجەت. ساراپشىلار پىكىرىنشە, اۋىر دەرتكە شالدىققان پاتسيەنتتەردى باعاتىن تۋىستارىنا الەۋمەتتىك جاردەماقى تولەۋگە رەسپۋبليكالىق بيۋدجەتتەن 9-11 ملرد تەڭگە قاجەت بولۋى مۇمكىن.
«قازاقستاندا پاللياتيۆتىك كومەك سالاسى ۇلكەن داعدارىستى باستان كەشىپ جاتىر. ونىڭ ۇستىنە, حالىق سانىنىڭ كوبەيۋىنە بايلانىستى اتالعان قىزمەتكە دەگەن سۇرانىس الداعى ۋاقىتتا ارتپاسا, كەمىمەيدى. سوندىقتان بۇل تاقىرىپتى كۇنتارتىبىنە شىعارىپ, جۇرتشىلىق نازارىن اۋدارۋدىڭ ماڭىزى زور. مەملەكەت دەنساۋلىق ساقتاۋ سالاسىن قارجىلاندىرۋ جۇيەسىن تۇبەگەيلى وزگەرتۋگە بەت بۇرعانى ابزال», - دەپ اتاپ ءوتتى تاۋەلسىز ساراپشى, زەرتتەۋدىڭ رەتسەنزەنتى ءالي نۇرعوجاەۆ.
