ايماقتار • 24 ءساۋىر، 2019

قاراعاندى وبلىسىندا ەكىنشى كۇن ەلەكتر ستانساسى ىسكە قوسىلدى

611 رەت كورسەتىلدى

قاراعاندى وبلىسىنداعى بالقاش قالاسىنان 60 شاقىرىمداي جەردەگى گۇلشات ەلدى مەكەنىنىڭ جانىنان سالىنعان جاڭا كۇن ەلەكتر ستانساسىنىڭ قۇرىلىسى اياقتالىپ، نىسان سالتاناتتى تۇردە ىسكە قوسىلدى.

جاڭا ستانسا ءبىر جىلعا جەتەر-جەتپەس ۋاقىت ىشىندە سالىنىپ ءبىتتى. قۇرىلىس جۇمىستارىنا 300-گە جۋىق ادام جۇمىلدىرىلعان. نىسان ورىن تەپكەن 104 گەكتار اۋماققا 120 مىڭنان استام كۇن پانەلى ورنالاستىرىلدى. مامانداردىڭ ەسەبىنە سۇيەنسەك، قۋاتتىلىعى 40 مۆت بولاتىن كۇن ەلەكتر ستانساسى 70 مىڭنان استام تۇرعىنى بار بالقاش سياقتى بەس قالانى ەلەكتر ەنەرگياسىمەن تولىقتاي قامتاماسىز ەتە الادى ەكەن.

ايتا كەتەرلىك جايت، گۇلشات كۇن ەلەكتر ستانساسى تولىقتاي شەتەل ينۆەستورلارىنىڭ قاراجاتىنا سالىندى. قۇرىلىس جۇمىستارىنا جانە قاجەتتى قۇرال-جابدىقتار الۋعا 46 ميلليون اقش دوللارى كولەمىندە قارجى جۇمسالعان.

جىل سايىن 58 ملن كۆ/ساع استام ەلەكتر ەنەرگياسىن وندىرەتىن جاڭا نىساندى ىسكە قوسۋ سالتاناتىنا وبلىس اكىمى ەرلان قوشانوۆ پەن ەنەرگەتيكا ۆيتسە-ءمينيسترى سۇڭعات ەسىمحانوۆ جانە ەۋروپالىق قايتا قۇرۋ جانە دامۋ بانكىنىڭ وكىلدەرى، قازاقستاندىق كۇن ەنەرگەتيكاسى قاۋىمداستىعىنىڭ وكىلدەرى، ارداگەرلەر، بالقاش قالاسىنىڭ قۇرمەتتى ازاماتتارى، «جاسىل ەكونوميكا» بايقاۋىنىڭ جەڭىمپازدارى قاتىستى.

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار