جولىڭىز ءتۇسىپ, اتىراۋعا بارا قالساڭىز, حالەل دوسمۇحامەدوۆ اتىنداعى مەملەكەتتىك ۋنيۆەرسيتەتتىڭ الدىنان وسى تۇلعالاردىڭ تاس ءمۇسىندەرىن كورە الاسىز. ءبىلىم ورداسىنىڭ الدىنان ورىن العان حالەل ەسكەرتكىشىنىڭ ەكى جاعى قازاق ەلىنىڭ تاريحىندا ەسىمدەرى قۇرمەتپەن اتالاتىن كورنەكتى تۇلعالاردىڭ بيۋست بەينەلەرىمەن تولىقتى. «تۇلعالار اللەياسىنىڭ» اشىلۋ سالتاناتىنا ءمۇسىندەرى قويىلعان قايراتكەرلەردىڭ ۇرپاقتارى ارنايى كەلىپ قاتىستى.
– ۇلتىمىزدىڭ تاريحى مەن رۋحانياتىنا ولشەۋسىز ەڭبەك سىڭىرگەن تۇلعالاردى جاستار ءبىلىپ جۇرسە ەكەن, سولاردىڭ ءومىر جولدارىنان تاعىلىم الىپ, ەلىنە, جەرىنە قىزمەت ەتسە ەكەن دەگەن نيەتپەن وسىنداي باستاما كوتەرگەن ەدىك. ەلدىگىمىز ءۇشىن قىزمەت ەتكەن ارداقتى تۇلعالارىمىزدىڭ مۇسىندەرى ءبىلىم ورداسىنىڭ كورنەكتى جەرىنەن ورىن العانى – ءبىز ءۇشىن ۇلكەن ابىروي, ماقتانىش, – دەيدى ۋنيۆەرسيتەت رەكتورى, حيميا عىلىمدارىنىڭ دوكتورى ابزال تالتەنوۆ.
«تۇلعالار اللەياسىنىڭ» اشىلۋ سالتاناتىندا قازاقستاننىڭ رەسەيدەگى توتەنشە جانە وكىلەتتى ەلشىسى يمانعالي تاسماعامبەتوۆتىڭ قۇتتىقتاۋ حاتى وقىلدى.
– ءبىر الاڭداعى سەگىز ارىستىڭ سەگىز مىڭنان استام جاس ءبىلىم الاتىن قاراشاڭىراقتىڭ كىرەبەرىسىندە تۇرعانىنىڭ ءوزى رۋح بەرەدى. جىگەرىڭدى جانيدى. ۇلىلاردىڭ جانىنا ايالداماي وتۋگە ءداتىڭ بارمايتىنداي اسەرلى ءمۇسىندەر, اسىرەسە ەسكەرۋسىز قالىپ جۇرگەن ارىستارىمىزدىڭ تۇعىرعا قونعانىنا ريزا پەيىلدەمىز, – دەپ اتاپ ءوتتى قوعام قايراتكەرى راشيليا مۇرساليەۆا.
اللەيانىڭ اشىلۋ ساتىنە ايماقتاعى زيالى قاۋىم وكىلدەرى, جاستار مەن قوعامدىق ۇيىم مۇشەلەرى كۋا بولدى. رۋحاني جاڭعىرۋدىڭ سوزبەن ەمەس, وسىلايشا ىسپەن كورسەتىلۋى دە كوڭىلگە قۋانىش سىيلايدى.
اتىراۋ
