ساراپشىلار بۇل يندۋستريانىڭ ءوسۋ قارقىنى مۇناي ەكسپورتتاۋشىلاردىڭ ءال-اۋقاتىنا ايتارلىقتاي قاۋىپ ءتوندىرىپ وتىر دەپ سانايدى. سانداردى سويلەتسەك, قىتايدا ساتىلعان ەلەكتر كولىكتەردىڭ سانى سوڭعى ءبىرنەشە جىلدا 59 مىڭنان 189 مىڭعا دەيىن كوبەيگەن. بۇل ەل زاماناۋي كولىكتەردى ساتۋدىڭ نەگىزگى نارىعىنا اينالىپ, ساتۋ كولەمى جاعىنان اقش-تى باسىپ وزۋعا جاقىن قالىپتى.
ەۋروپاداعى كولىك ساۋداسىنىڭ وسۋىنە قاراماستان, بۇرىنعىسىنشا قىتايلىقتاردان ارتتا قالىپ كەلەدى. ماسەلەن, ۇلىبريتانيادا جىلىنا 28 مىڭعا دەيىن ەلەكتركولىك شىعارىلسا, فرانتسيادا بۇل مەجە 27 مىڭ بىرلىكتى قۇراپ وتىر. نورۆەگيادا 20 مىڭنان 25 مىڭعا دەيىن بارادى, ال گەرمانيادا جىل سايىن 13 مىڭنان 23,5 مىڭعا دەيىن كولىك وندىرىلەدى ەكەن. گەرمانيانىڭ قۇرلىقتاعى ەڭ ءىرى اۆتووندىرۋشى ەكەندىگىن ەسكەرۋ قاجەت. ماماندار, ەلدەگى ەلەكتروموبيل نارىعىنىڭ دامۋى ءبىرىنشى كەزەكتە بيلىكتىڭ ساياساتىنا بايلانىستى دەيدى.
– كەيبىر مەملەكەتتەر كومىرسۋتەگى ونىمدەرىن پايدالانبايتىن كولىكتەردىڭ كوبىرەك شىعارىلۋىنا, ساتىلۋىنا مۇددەلى. سول سەبەپتى وعان بارىنشا قولداۋ كورسەتۋگە تىرىسادى. مىسالى, قىتايدا بۇل باعىت سۋبسيديالانادى. ەكولوگيالىق قاۋىپسىز اۆتوموبيلدەردى ءوندىرۋگە ارنالعان بىرلەسكەن كاسىپورىن قۇرىلىپ, ەلەكتروموبيلدى ساتىپ الۋشىلارعا جەڭىلدىكتەر بەرىلەدى, – دەيدى PhD دوكتورى جىبەك ابىلقاسىموۆا. عالىم وپتيميستىك بولجامدارعا ساي جاھاندىق اۆتوپاركتەگى ەلەكتر كولىكتەرىنىڭ ۇلەسى 2040 جىلعا قاراي 40%-عا ءوسۋى ابدەن ءمۇمكىن دەيدى. قازىر بۇل كورسەتكىش 0,2%-عا ەندى جەتكەن.
جاقىندا اقش-تىڭ لوس-اندجەلەس قالاسىندا وتكەن Tesla كولىگىنىڭ كەزەكتى سەرياسىنىڭ تانىستىرىلىمى وتكەنى بەلگىلى. كومپانيا جەتەكشىسى يلون ماسك وسى جيىندا ەلەكتركارلارعا ارنالعان Supercharger قۋاتتاۋ ستانسالارىنىڭ قازاقستاندا سالىنۋى مۇمكىن ەكەنىن جوققا شىعارعان جوق. ول ءوزىنىڭ Twitter-دەگى پاراقشاسىندا: «ءبىز قازاقستاندا قۋاتتاۋ ستانسالارىن سالامىز», دەپ بەكىتە تۇسكەن-ءدى. بۇگىنگى ءداۋىردىڭ دا ۆينچيىنە بالانىپ جۇرگەن يلون ماسكتىڭ ءسوزى قانشالىقتى جۇزەگە اساتىنىنا ۋاقىت تورەشى. دەسە دە, ۇكىمەت بۇل باستامانىڭ جۇزەگە اسۋىنا اتسالىسۋعا دايىن سىڭايلى. ماسەلەن, شىمكەنت شاھارىنىڭ يستەبليشمەنتى, زاۋىت قۇرىلىسىنا ارنايى جەر تەلىمىن بولۋگە, جەڭىلدىكتى نەسيە الىپ بەرۋگە, ءتىپتى بولاشاق كاسىپورىندى سالىقتىق مىندەتتەمەلەردەن بوساتۋعا دەيىن كومەكتەسۋگە ءازىر ەكەن. وسى ءجونىندە قالا باسشىسىنىڭ ورىنباسارى الەۋمەتتىك جەلىدە ارنايى جازبا قالدىرعانى ەسىمىزدە.
جاقسىلىق مۇراتقالي,
جۋرناليست
