ايماقتار • 24 ءساۋىر، 2019

قاراعاندىدا «عاسىردىڭ بيىك تۇلعاسى» اتتى كورمە ءوز جۇمىسىن باستادى

649 رەت كورسەتىلدى

كەنشىلەر استاناسىندا اكادەميك قانىش ساتباەۆتىڭ 120 جىلدىق مەرەيتويىنا ارنالعان «عاسىردىڭ بيىك تۇلعاسى» اتتى كورمە ءوز جۇمىسىن باستادى.

وسى شاراعا وراي وبلىستىق تاريحي-ولكەتانۋ مۇراجايىندا «قازاق عىلىمىنىڭ تەمىرقازىعى» دەگەن تاقىرىپتا دوڭگەلەك ۇستەل ۇيىمداستىرىلىپ، وعان باياناۋىل جانە جەزقازعاننان كەلگەن قوناقتار، قانىش ساتباەۆتىڭ ۇرپاقتارى، جوو عالىمدارى مەن وقىتۋشىلارى، مادەنيەت قايراتكەرلەرى، قوعامدىق ۇيىمداردىڭ مۇشەلەرى جانە «ورتالىققازجەرقويناۋى» گەولوگيالىق مۇراجايىنىڭ قىزمەتكەرلەرى قاتىستى. 

دوڭگەلەك ۇستەل بارىسىندا قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، پروفەسسور ارستان عازاليەۆ، وبلىستىق تاريحي-ولكەتانۋ مۇراجايىنىڭ ديرەكتورى ەرجان نۇرماعانبەتوۆ عۇلاما عالىمنىڭ مەرەيتويى اياسىندا ىستەلىپ جاتقان يگى شارۋالار تۋراسىندا اڭگىمە قوزعاپ، قانىش يمانتاي ۇلىنىڭ قازاق حالقىنا سىڭىرگەن ەڭبەگىنىڭ ءمان-ماعىناسى مەن قادىر-قاسيەتى ۋاقىت وتكەن سايىن ارتا تۇسەتىنىن اتاپ ءوتتى.

سونداي-اق، شارا اياسىندا تاريحي-ولكەتانۋ مۇراجايى عيماراتىنىڭ الدىنا  ۇلىتاۋ اۋدانىنداعى ورمان شارۋاشىلىعىنان جەتكىزىلگەن ءۇش قايىڭ كوشەتى وتىرعىزىلدى. ونىڭ ءبىرىنشىسىن باياناۋىلدان كەلگەن قوناقتار مەن عالىمنىڭ تۋىستارى وتىرعىزسا، ەكىنشىسىن ۇلىتاۋ مەن قارساقباي تۇرعىندارى ەكتى. ال ءۇشىنشى قايىڭ كوشەتىن وتىرعىزۋ قاراعاندىلىقتاردىڭ ەنشىسىنە ءتيدى.

«عاسىردىڭ بيىك تۇلعاسى» كورمەسىنىڭ جەزدى كەنتىندە ورنالاسقان م. تورەگەلدين اتىنداعى تاۋ-كەن جانە بالقىتۋ ءىسى تاريحى مۇراجايى مەن اكادەميك ق.ساتباەۆتىڭ باياناۋىل مەموريالدىق مۇراجايىمەن بىرلەسىپ ۇيىمداستىرىلعانىن ايتا كەتكەن ءجون.

كورمەگە قويىلعان 200-دەن استام ەكسپوناتتىڭ اراسىندا ەرتوقىم، كيىم-كەشەك، مينەرالدار كوللەكتسياسى، سونداي-اق عالىم-گەولوگتىڭ عىلىمي جۇمىستارى، قولجازبالار مەن ماراپاتتارى، اكادەميكتىڭ دومبىراسى، فوتوماتەريالدار، كىتاپتار، شاپان، جەزقازعان مىسى سياقتى جادىگەرلەر بار. سونداي-اق، ەكسپوزيتسيا سورەسىنەن الكەي مارعۇلاننىڭ عۇلاما عالىم ءۇشىن ارنايى تاپسىرىسپەن جاساتقان مىلتىعى دا ورىن العان. ءا.مارعۇلان قارۋدى مۇراجايعا 1999 جىلى تاپسىرىپتى.

 ماڭىزدى مادەني شارانىڭ سوڭىنا تامان اكادەميك قانىش ساتباەۆتىڭ تۋىسى كۇلتاي بايازيتقىزى تاريحي-ولكەتانۋ مۇراجايىنىڭ ۇجىمىنا اۋلەت اتىنان العىس ايتتى.

«عاسىردىڭ بيىك تۇلعاسى» كورمەسى ءساۋىر ايىنىڭ 30-نا دەيىن جالعاسادى.


قاراعاندى وبلىسى

سوڭعى جاڭالىقتار

دوللار ارزاندادى

ەكونوميكا • بۇگىن، 16:52

قوسشىدا جاڭا مەكتەپ اشىلادى

ءبىلىم • بۇگىن، 16:25

ۇقساس جاڭالىقتار